Sakaria 5:1-11
5 Dan mi opo mi ede baka. Ne mi si wan bukulolo e frei.
2 Na engel aksi mi: „San yu e si?”
Mi piki: „Mi e si wan bukulolo e frei. A langa aiti meter nanga neigitenti centimeter èn a bradi fo meter nanga fotenti na feifi centimeter.”
3 Dan a taigi mi: „Na a wan sei a bukulolo disi abi den fluku gi den wan di e fufuru, èn na a tra sei a abi den fluku gi den wan di e meki sweri. A e frei na heri grontapu, fu di den sma disi no kisi strafu.
4 ’Na mi meki a frei’, na so Yehovah di e tiri den legre taki. ’A musu go na ini na oso fu den fufuruman èn na ini na oso fu den wan di e sweri na ini mi nen aladi den e lei, dan a musu tan na ini na oso. A musu pori na oso, den postu fu en, nanga den ston fu en.’”
5 Dan na engel di ben e taki nanga mi, kon na fesi èn a taigi mi: „Opo yu ede, grantangi, èn luku san e kon.”
6 Ne mi aksi: „San na en?”
A piki: „Na wan baki fu marki sani e kon.” A taki tu: „Na so den ogri sma na heri grontapu de.”
7 A tapun fu a baki ben lontu èn a ben de fu loto. Ne mi si a tapun e opo èn wan uma ben e sidon na ini a baki.
8 Na engel taki: „Na uma nen Ogridu.” Ne a trowe na uma go baka na ini a baki èn a trowe a tapun fu loto baka na tapu a baki.
9 Dan mi opo mi ede èn mi si tu uma e kon. Den ben abi frei leki den di fu wan bigi fowru* èn a winti ben e tyari den. Ne den opo a baki safrisafri fu grontapu go na loktu.
10 Mi aksi na engel di ben e taki nanga mi: „Pe den e tyari a baki go?”
11 A piki mi: „Den e tyari en gowe fu bow wan oso gi na uma na ini a kondre Sineyar. A o de wan steifi oso. Na drape den o poti en na en yoisti presi.”
Futuwortu
^ Bakratongo: „ooievaar.”
