Yeremia 26:1-24
26 Di Kownu Yoyakim, a manpikin fu Yosia, bigin tiri Yuda, Yehovah seni a boskopu disi:
2 „Disi na san Yehovah taki: ’Go tanapu na ini a dyari fu na oso fu Yehovah èn taki nanga den sma fu ala den foto fu Yuda di e kon boigi gi Yehovah na en oso. Mi o taigi yu san yu musu taigi den. Iya, yu musu taigi den ala san mi taigi yu.
3 Kande den o arki èn den o tapu nanga den ogri di den e du. Dan mi no o tyari rampu kon na den tapu moro. Bika mi abi na prakseri fu strafu den gi den ogri di den du.
4 Yu musu taigi den: „Disi na san Yehovah taki: ’Un musu arki mi èn un musu hori a wèt di mi gi unu.
5 Un musu arki mi futuboi di e wroko leki profeiti gi mi. Mi e opo fruku fu seni den gi unu, ma unu no wani arki.
6 Fu dati ede mi o meki na oso disi tron leki na oso na Silo èn mi o meki ala pipel fu grontapu fluku a foto disi.’”’”
7 Den priester, den profeiti, nanga a heri pipel yere san Yeremia ben taki na ini na oso fu Yehovah.
8 Di Yeremia kaba taigi a heri pipel ala san Yehovah ben taigi en fu taki, dan den priester, den profeiti, nanga a heri pipel grabu en. Den taki: „Na dede yu o dede.
9 Fu san ede yu e taki dati Yehovah seni yu fu taki: ’Na oso disi o tron leki na oso na Silo, èn a foto disi o tron wan brokopresi pe nowan sma e tan’?” Disiten sma bigin lontu Yeremia moro nanga moro na ini na oso fu Yehovah.
10 Baka wan pisi ten den granman fu Yuda kon yere a tori. Ne den komoto na a oso fu kownu èn den go na a oso fu Yehovah. Dan den go sidon na a nyun portu fu na oso fu Yehovah.
11 Den priester nanga den profeiti bigin taigi den granman nanga a heri pipel: „Nanga un eigi yesi unu yere sortu profeititori a man disi taki fu a foto disi. Na dedestrafu a musu kisi.”
12 Dan Yeremia taigi ala den granman nanga a heri pipel: „Ala den sani di unu yere fu na oso disi èn fu a foto disi, na den profeititori di Yehovah seni mi fu taki.
13 Meki un pasi kon reti, du san bun, èn gi yesi na Yehovah un Gado. Dan Yehovah o sari unu èn a no o tyari rampu kon na un tapu soleki fa a ben taki.
14 Luku, mi de na ini un anu. Unu kan du nanga mi san unu wani èn san unu feni bun.
15 Ma un musu sabi taki efu unu kiri mi, dan unu, a foto fu unu, nanga den sma di e tan na ini a foto o abi brudu-paiman, fu di unu kiri wan sma fu soso. Bika a de so trutru taki Yehovah seni mi fu taigi unu ala den sani di unu yere.”
16 Dan den granman nanga a heri pipel taigi den priester nanga den profeiti: „A man disi no musu kisi nowan dedestrafu, bika na ini a nen fu Yehovah wi Gado a taki nanga wi.”
17 Boiti dati, wan tu fu den owru man fu a kondre opo taigi den sma di ben de drape:
18 „Na ini a ten di Kownu Heskia ben tiri Yuda, Mika fu Moreset ben taki profeititori tu. A ben taigi ala sma fu Yuda: ’Disi na san Yehovah di e tiri den legre taki: „Sma o plugu Sion leki wan gron, èn Yerusalem o tron wan brokopresi. A bergi pe a tempel de o tron leki wan bergi na ini busi.”’
19 Di a taki den sani disi, Kownu Heskia fu Yuda nanga den sma fu Yuda no kiri en, a no so? A ben lespeki Yehovah èn a begi Yehovah fu sori sari-ati. Dati meki Yehovah sari den èn a no tyari rampu kon na den tapu soleki fa a ben taki, a no so? Sobun, efu wi kiri Yeremia, dan na wan bigi rampu wi e tyari kon na tapu wisrefi.
20 Wan tra man di taki profeititori na ini a nen fu Yehovah na Uria, a manpikin fu Semaya fu Kiriat-Yarim. A srefi sani di Yeremia taki, a ben taki tu fu a foto nanga a kondre disi.
21 Di Kownu Yoyakim, den granman, nanga ala den tranga man fu en yere san a taki, dan a kownu ben wani kiri en. Ma di Uria yere disi a kon frede èn a lon gowe teleki a doro na Egepte.
22 Ne Kownu Yoyakim seni den man fu en go na Egepte. A seni Elnatan, a manpikin fu Akbor, nanga wan tu tra man go na Egepte.
23 Ne den grabu Uria na Egepte èn den tyari en go na Kownu Yoyakim. A kiri en nanga feti-owru èn a trowe en dedeskin na a beripe fu den mofinawan.”
24 Wan tra man di ben yepi Yeremia, so taki a pipel no kisi en fu kiri, ben de Ahikam, a manpikin fu Safan.
