Yona 4:1-11
4 Ma Yona no ben lobi a sani disi kwetikweti. En ati bron srefisrefi.
2 Dati meki a begi Yehovah. A taki: „Yehovah, di mi ben de na ini mi kondre, mi ben sabi kaba taki a sani disi ben o pasa. Dati meki mi ben wani lowe go na Tarsis. Mi ben sabi taki yu na wan Gado di abi switifasi nanga sari-ati, yu ati no e bron esi, yu abi bun-ati pasa marki èn yu no lobi fu tyari rampu kon.
3 We Yehovah, grantangi, meki mi dede, bika a moro bun fu dede, leki fu tan na libi.”
4 Dan Yehovah aksi en: „Yu denki taki yu abi leti fu atibron so?”
5 Ne Yona komoto na ini a foto. Di a ben de na owstusei fu a foto, a saka sidon. A bigin meki wan kampu fu man feni pikinso kowru. A ben wani sidon luku san ben o pasa nanga a foto.
6 Fu puru Yona na ini a nowtu, Yehovah Gado meki wan krabasibon gro. Na so Yona ben kan kisi pikinso kowru. Yona ben prisiri srefisrefi nanga a krabasibon.
7 Ma a tamara fu en, di dei broko, a tru Gado meki wan woron nyan a krabasibon. Te fu kaba a bon kon drei.
8 Boiti dati, Gado meki wan faya winti fu owstusei wai di son opo. A faya son ben e skèin na tapu Yona ede èn a ben e bron en so te, taki pikinmoro a flaw. Doronomo a ben e aksi fu dede èn a ben taki: „A moro bun fu dede, leki fu tan na libi.”
9 Dan Gado aksi Yona: „Yu denki taki yu abi leti fu atibron so, fu di a krabasibon dede?”
Yona taki: „Iya, mi abi leti fu atibron. Mi ati e bron te fu dede srefi.”
10 Ma Yehovah taki: „Yu e sari fu di a krabasibon dede, aladi yu no du nowan muiti fu meki a gro. A no yu meki a kon bigi. Na ini wán dei nomo a gro èn na ini wán dei nomo a dede.
11 We dan, mi no musu sari den sma fu a bigi foto Ninefei? Moro leki wán hondro tutenti dusun sma e tan drape nanga den furu osometi fu den. Den no sabi srefi san na den reti-anu èn san na den kruktu-anu.”
