Kapitel 12

A dopoe foe Jesus

SO WAN siksi moen baka di Johanes bigin preiki, Jesus, di abi 30 jari now, e kon na en na Jordan liba. Foe san ede? Foe go loekoe Johanes leki mati? Na sabi Jesus wani sabi nomo fa a e go nanga a wroko foe Johanes? Nôno, Jesus e aksi Johanes foe dopoe en.

Wantewante Johanes e taki dati a no man: „Na joe moesoe dopoe mi, èn joe e kon na mi?” Johanes sabi taki en neef Jesus na a spesroetoe Manpikin foe Gado. Ija, Johanes ben djompo opo foe prisiri ede na ini en mama bere, di Maria, di ben de nanga bere foe Jesus, ben kon loekoe den! A no abi misi, taki Elisabet, a mama foe Johanes, ben froeteri en foe a tori disi baka ten. Èn a ben sa froeteri Johanes toe foe na engel di ben meki bekènti taki Jesus ben gebore, èn foe den engel di ben sori densrefi na den skapoeman a neti di Jesus ben gebore.

So boen, Jesus no de wan freimdesma gi Johanes. Èn Johanes sabi taki a dopoe di a e dopoe sma, no de wan sani di Jesus moesoe doe toe. A dopoe di Johanes e dopoe sma, na gi den wan di abi berow foe den sondoe foe den, ma Jesus no abi sondoe. Ma tokoe, ala di Johanes e tan taki dati a no man, Jesus e horidoro: „Meki a de so a leisi disi, bika na so fasi a fiti wi foe doe ala sani di de regtfardiki.”

Foe san ede a de wan joisti sani taki Jesus teki dopoe? Bikasi a dopoe foe Jesus na wan simbôl, no foe berow foe sondoe, ma foe a pristeri di a e pristeri ensrefi foe doe a wani foe en Tata. Jesus ben de wan temreman, ma now a ten doro gi en foe bigin nanga a diniwroko di Jehovah Gado ben seni en kon foe doe na grontapoe. Joe denki taki Johanes e froewakti taki wan freimde sani o pasa te a e dopoe Jesus?

We, baka ten Johanes e froeteri: „A srefi Sma di ben seni mi foe go dopoe sma na ini watra, ben taigi mi: ’A sma di na tapoe en joe e si a jeje e saka go sidon èn tan na en tapoe, na en na a sma di e dopoe na ini santa jeje.’” So boen, Johanes e froewakti taki a jeje foe Gado sa kon na tapoe wan sma di a e dopoe. Kande dati meki Johanes no e froewondroe troetroe, taki te Jesus e opo komoto na a watra, dati a e si „a jeje foe Gado leki wan doifi e saka kon na en tapoe”.

Ma moro leki dati e pasa na a dopoe foe Jesus. ’Hemel e kon opo’ gi en. San disi wani taki? A de krin, taki disi wani taki, dati ala di Jesus e teki dopoe, a e memre a libi baka di a ben abi na hemel bifo a ben de wan libisma. So boen, now Jesus e memre krinkrin a libi di a ben abi leki wan jeje manpikin foe Jehovah Gado, èn ala den sani toe di Gado ben taigi en di a ben de na hemel na ini a ten di a no ben de wan libisma ete.

Boiti dati, na a ten foe en dopoe, dan wan sten foe hemel e meki bekènti: „Disi na mi Manpikin, a lobiwan, di mi feni boen.” Soema abi a sten dati? Na Jesus en eigi sten? Kwetikweti! Na a sten foe Gado. A de krin, taki Jesus na a Manpikin foe Gado, èn no Gado srefi, soleki fa son sma e taki.

Ma Jesus na wan libisma manpikin foe Gado, neleki fa a fosi libisma Adam, ben de dati toe. Baka di a disipel Lukas taki foe Jesus en dopoe, a e skrifi: „Jesus srefi, di a ben bigin nanga en wroko, ben abi so wan dritenti jari, ala di, soleki fa sma ben prakseri, a ben de a manpikin foe Josef, manpikin foe Eli, . . . manpikin foe David, . . . manpikin foe Abraham, . . . manpikin foe Noa, . . . manpikin foe Adam, manpikin foe Gado.”

Neleki fa Adam ben de wan libisma „manpikin foe Gado”, na so a de nanga Jesus toe. Jesus na a moro bigi man di oiti ben libi, san e kon na krin te wi e ondrosoekoe Jesus en libi. Ma na a ten foe en dopoe, Jesus e kon ini wan njoen matifasi nanga Gado, foe di a e tron Gado jeje Manpikin toe. Gado e kari en kon baka na hemel now, joe kan taki, foe di a e meki Jesus bigin nanga wan waka nanga libi di sa abi leki bakapisi taki Jesus sa gi en libisma libi foe têgo leki ofrandi. Disi a sa doe gi a boen foe a libisma famiri di ben kisi kroetoe. Mateus 3:13-17; Lukas 3:21-38; 1:34-36, 44; 2:10-14; Johanes 1:32-34; Hebrewsma 10:5-9.

▪ Foe san ede Jesus no de wan freimdesma gi Johanes?

▪ Foe san ede Jesus e teki dopoe, ala di a no ben doe sondoe?

▪ Foe san ede Johanes no e froewondroe kande te a jeje foe Gado e kon na Jesus tapoe, te wi e hori na prakseri san Johanes sabi foe Jesus?