Kapitel 70

A e dresi wan man di ben gebore breni

TE DEN djoe e proeberi foe ston Jesus kiri, a no e gowe libi Jerusalem. Baka ten, na Sabadei, en nanga den disipel foe en e waka na ini a foto te den e si wan man di breni sensi a ben gebore. Den disipel e aksi Jesus: „Rabi, soema ben sondoe, a man disi noso en papa nanga mama, taki a ben gebore breni?”

Kande den disipel e bribi, neleki fa a de nanga son rabi, taki wan sma kan sondoe na ini en mama bere. Ma Jesus e piki: „No a man disi, no en papa nanga mama ben sondoe, ma disi pasa, so taki den wroko foe Gado ben sa kon bekènti na poebliki na ini a kefal foe en.” A breni di a man breni a no a bakapisi foe wan spesroetoe fowtoe noso sondoe di a man srefi noso en papa nanga mama ben doe. A sondoe foe a fosi libisma Adam, ben meki taki ala libisma abi onvolmaakti fasi èn na so fasi sani e mankeri na den, soleki a breni di wan sma breni sensi a gebore. A sani disi di e mankeri na a man, e gi Jesus na okasi now foe meki den wroko foe Gado kon bekènti na poebliki.

Jesus e poti krakti na tapoe o tranga a de fanowdoe foe doe den wroko disi. „Wi moesoe doe den wroko foe en di ben seni mi kon, so langa a de deiten”, a e taki. „ A neti o kon, pe no wan sma kan wroko. So langa mi de na grontapoe, mi na a leti foe grontapoe.” Heri esi a dede foe Jesus sa meki en kon na ini a doengroe foe a grebi, pe a no kan doe no wan sani moro. Ma now a de wan fonten foe leti gi grontapoe.

Baka di Jesus taki den sani disi, a e spiti na gron èn nanga a spiti a e meki wan sortoe tokotoko. A e poti disi na tapoe den ai foe a breni man èn a e taki: „Go wasi joesrefi na ini a watra-olo foe Siloam.” A man e doe san Jesus taki. Èn te a e doe disi, a kan si! Ija, a breiti troetroe te a e drai kon baka, bika fositron ini en libi a kan si!

Birtisma nanga tra sma di sabi en, e froewondroe. „A no disi na a man di ala ten ben sidon e begi sani?”, den e aksi. „Na en”, son sma e piki. Ma trawan no kan bribi: „ A no troe, ma a gersi en nomo.” Ma a man e taki: „Na mi.”

„Fa joe ai kon opo dan?”, den sma wani sabi.

„ A sma di nen Jesus, ben meki tokotoko èn a ben wrifi disi na tapoe mi ai èn a ben taki: ’Go na Siloam èn wasi joesrefi.’ So boen, mi go, mi wasi misrefi èn mi ben kan si.”

„Pe a man dati de?”, den e aksi.

„Mi no sabi”, a e piki.

Now den sma e tjari a man di fosi ben breni, go na den relisi fesiman foe den, den Fariseiman. Den man disi e bigin aksi en toe fa a doe kon taki a kan si. „ A ben poti tokotoko na tapoe mi ai, èn mi ben wasi misrefi èn mi kan si now”, a man e tjari kon na krin.

Foe troe, den Fariseiman ben sa moesoe foe prisiri taki a breni begiman kon betre! Ma na presi foe dati, den e kragi Jesus na poebliki. „ A sma disi a no foe Gado”, den e taki. Foe san ede den e taki disi? „Bika a no e hori Sabadei.” Èn tokoe tra Fariseiman e aksi densrefi: „Fa wan sma di de wan sondari, kan doe den sortoe wondroe disi?” So boen, wan prati e kon na den mindri.

Foe dati ede den e aksi a man: „San joe e taki foe en, foe di a ben opo joe ai?”

„En na wan profeiti”, a e piki.

Den Fariseiman e weigri foe bribi disi. Den abi na overtoigi taki Jesus nanga a man disi ben meki wan sortoe kroederi na bakabaka, foe hori den sma na spotoe. So boen, foe loesoe na afersi, den e kari a papa nanga mama foe a begiman, foe aksi den foe a tori. Johanes 8:59; 9:1-18.

▪ Fa a doe kon taki a man breni, èn fa a no doe kon?

▪ San na a neti pe no wan sma kan wroko?

▪ San den sma di sabi a man, e doe te a kon betre?

▪ Fa wan prati e kon na mindri den Fariseiman ini a tori foe a betre di a man kon betre?