Kapitel 30

A e piki den sma di e gi en a fowtoe

TE DEN fesiman foe a djoe relisi e gi Jesus a fowtoe, taki a no e hori Sabadei, dan a e piki den: „Mi Tata tan wroko te now, èn mi e tan wroko.”

Ala di den Fariseiman e taki den sani disi, tokoe den wroko di Jesus e doe, no de a sortoe wroko di a Sabawet no e gi pasi foe doe dati. Na Gado ben gi en a wroko foe preiki èn foe dresi sma, èn foe di a e waka soifri na baka na eksempre foe Gado, meki a e tan doe den sani disi ala dei. Ma a piki foe en e meki den djoe ati e kon bron moro èn den e proeberi foe kiri en. Foe san ede?

Bika now den no e prakseri wawan taki Jesus no e hori Sabadei, ma den e si a froeklari foe en, dati en na Gado en eigi Manpikin, leki wan sani di e afrontoe Gado. Ma Jesus no frede èn a e piki den moro fara foe a boen matifasi di a abi nanga Gado. „A Tata abi firi foe lobi gi a Manpikin”, a e taki, „èn a e sori en ala sani di ensrefi e doe.”

„Neleki fa a Tata e opo den dedewan”, Jesus e taki moro fara, „na so a Manpikin e meki den wan di a wani, kon na libi.” Ija, a Manpikin e opo dedesma kaba na jejefasi! „A sma di e jere den wortoe foe mi èn e bribi a sma di ben seni mi kon,” Jesus e taki, „komoto na dede, foe go abra na libi.” Ija, a e taki moro fara: „A joeroe e kon, èn de now, pe den dedewan sa jere a sten foe a Manpikin foe Gado èn den wan di poti prakseri na tapoe, sa libi.”

Ala di no wan tori skrifi taki Jesus troetroe opo wan sma kaba na dede, tokoe a e taigi den sma di e gi en a fowtoe, taki so wan troetroe opobaka foe den dedewan, sa feni presi. „No froewondroe foe disi,” a e taki, „bika a joeroe e kon pe ala sma di de na ini den memre-grebi, sa jere en sten èn sa kon na doro.”

Soleki fa a sori, dan te leki now, noiti ete Jesus taki so krin èn na so wan aparti fasi na poebliki, taki a abi wan toemoesi prenspari prati na den sani di Gado abi na prakseri. Ma den sma di e gi Jesus a fowtoe, abi moro sani leki soso a kotoigi di ensrefi e gi foe den sani disi. „Oenoe seni sma go na Johanes,” Jesus e memre den, „èn a gi kotoigi foe a waarheid.”

Soso toe jari na fesi, Johanes a Dopoeman ben froeteri den djoe relisi fesiman disi, foe a Sma di ben sa kon baka en. Jesus e memre den na a bigi lespeki di den ben abi wan ten gi Johanes, di de na doengroe-oso now. A e taki: „Foe wan sjatoe pisi ten oenoe ben wani foe prisiri srefisrefi na ini a leti foe en.” Jesus e tjari disi kon na ini a prakseri foe den, foe di a e howpoe taki a kan jepi den, ija, foe froeloesoe den. Tokoe Jesus no e bow tapoe a kotoigi di Johanes ben gi.

„Den wroko di misrefi e doe [makandra nanga a wondroe di a ben doe didjonsro] e kotoigi foe mi, taki a Tata ben seni mi kon.” Ma boiti dati, Jesus e taki moro fara: „A Tata di ben seni mi kon, na ensrefi ben kotoigi foe mi.” Gado ben kotoigi foe Jesus, foe eksempre, na a dopoe foe en di a ben taki: „Disi na mi Manpikin, a lobiwan.”

Foe troe, den sma di e gi Jesus a fowtoe, no abi no wan enkri reide foe weigri foe erken en. Den srefi Boekoe foe bijbel di den e taki dati den e ondrosoekoe, na den srefi Boekoe dati e kotoigi foe en! „Efoe oenoe ben bribi Moses, dan oenoe ben o bribi mi,” Jesus e tapoe, „bika a sma dati ben skrifi foe mi. Ma efoe oenoe no e bribi san a sma dati ben skrifi foe mi, dan fa oenoe sa bribi den wortoe foe mi?” Johanes 5:17-47; 1:19-27; Mateus 3:17.

▪ Foe san ede a wroko foe Jesus no de wan sani di e pasa a Sabawet?

▪ Fa Jesus e taki foe a toemoesi prenspari prati di a abi na ini den sani di Gado abi na prakseri?

▪ Na tapoe a kotoigi foe soema Jesus e sori, foe boeweisi taki en na a Manpikin foe Gado?