kapitel 50

A e sreka den gi froefolgoe

BAKA DI Jesus leri den apostel foe en foe den fasi fa den moesoe doe a preikiwroko, a e warskow den gi gensman. A e taki: „Loekoe! Mi e seni oenoe go leki skapoe na mindri wolfoe . . . Loekoe boen nanga sma; bika den sa gi oenoe abra na den kroetoebangi foe a kontren èn den sa krawasi oenoe na ini den snoga foe den. Den sa srepi oenoe go na fesi tiriman nanga kownoe, srefi foe mi ede.”

Ma ala di den bakaman foe en sa kisi hebi froefolgoe, tokoe Jesus e pramisi den nanga wortoe foe meki den kon korostoe: „Te den gi oenoe abra, no broko oen ede nanga fa noso san oenoe moesoe taki; bika san oenoe moesoe taki, oenoe sa kisi na a joeroeten dati; bika a no soso oenoe e taki, ma a jeje foe oen Tata, e taki nanga a jepi foe oenoe.”

„Moro fara”, na so Jesus e go doro, „a wán brada sa gi a trawan abra foe den kiri en, èn wan papa a pikin foe en, èn pikin sa opo tanapoe teige a papa nanga mama foe en èn a sa meki den kiri den.” A e taki moro fara: „Foe mi nen ede, ala sma no sa wani si oenoe na ai, ma a sma di horidoro te na a kaba, na en sa kisi froeloesoe.”

A preikiwroko na a moro prenspari sani. Foe dati ede Jesus e poti krakti na tapoe taki den moesoe de na ai èn waka nanga koni, so taki den no lasi a fri foe den foe doe a wroko. „Te den e froefolgoe oenoe na ini a wan foto, lon go na wan trawan”, na so a e taki, „bika foe troe, mi e taigi oenoe: Oenoe no sa kaba waka lontoe a kontren foe den foto foe Israèl kwetikweti, bifo a Manpikin foe libisma doro.”

A troe, taki Jesus ben leri den twarfoe apostel foe en den sani disi, taki a ben e warskow èn ben e gi den deki-ati, ma a ben de so srefi gi sma di, baka Jesus en dede nanga en opobaka, ben sa abi wan prati na a preikiwroko di e doe na heri grontapoe. Disi de foe si na san a ben taigi den disipel foe en, taki ’ala sma no sa wani si den na ai’. Disi no ben sa de den Israèlsma wawan di den apostel ben seni go na den foe go preiki gi den. Èn soleki fa a sori, dan den no ben srepi den apostel go na fesi tiriman nanga kownoe, di Jesus ben seni den foe go preiki a sjatoe preikiwaka foe den. Boiti dati, na a ten dati a no ben de so, taki famiriman ben gi sma abra di ben de na bribi, foe den kiri den.

So boen, di Jesus ben taki dati den disipel foe en no ben sa klari a preikiwaka foe den „bifo a Manpikin foe libisma doro”, dan na wan profeitifasi a ben froeteri wi taki den disipel foe en no ben sa kaba preiki Gado Kownoekondre di opo, na heri grontapoe pe sma e libi, bifo a glori Kownoe Jesus Krestes ben sa doro leki a sma di e tjari a strafoe foe Jehovah kon na ini Armagedon.

Jesus e go moro fara foe gi leri ini a tori foe a preikiwroko. A e taki: „Wan disipel no bigi moro leki a leriman foe en, èn wan srafoe no bigi moro leki a leriman foe en.” So boen, den bakaman foe Jesus moesoe froewakti taki sma sa handri nanga den na a srefi takroe fasi fa den ben handri nanga Jesus èn taki sma sa froefolgoe den toe neleki fa den ben froefolgoe en, foe di a ben preiki a Kownoekondre foe Gado. Tokoe a e froemane: „No frede gi den sma di e kiri a skin, ma di no kan kiri a sili; ma frede moro foeroe a sma di kan pori a sili nanga a skin na ini Gehèna.”

Jesus srefi ben o gi na eksempre na ini disi. Sondro frede a ben o horidoro te na dede, na presi foe skeki ensrefi ini a tori foe en loyaliteit na Jehovah Gado, a Sma di abi ala makti. Ija, Jehovah na a sma di kan pori a „sili” foe wan sma (san wani taki ini a tori disi, den sani di wan sma kan froewakti na ini a ten di e kon, leki wan libi sili), noso na presi foe dati, a kan opo wan sma baka na dede, foe njan boen foe têgo libi. Ija, Jehovah na troetroe wan lobi-ati èn sari-ati hemel Tata!

Baka dati, Jesus e gi den disipel foe en deki-ati nanga jepi foe wan agersitori di e poti a prakseri na tapoe a broko di Jehovah e broko en ede nanga den na wan lobi fasi: „A no de so, taki den e seri toe pikin fowroe foe wan moni di no warti someni?”, a e aksi. „Tokoe no wan foe den sa fadon na gron sondro oen Tata sabi dati. Ma srefi ala den wiwiri foe oen ede den teri. No frede foe dati ede: oen warti moro leki foeroe pikin fowroe.”

A Kownoekondre boskopoe di Jesus e gi den disipel foe en leki wan komando foe en foe meki dati bekènti, sa prati osofamiri, foe di son memre foe na osofamiri e teki a boskopoe disi èn trawan no e teki en. „No denki taki mi kon foe tjari vrede kon na grontapoe”, a e tjari kon na krin. „Mi no kon foe tjari vrede kon, ma wan feti-owroe.” So boen, a e aksi taki wan memre foe na osofamiri moesoe abi deki-ati foe teki bijbel waarheid. „A sma di abi moro bigi lobi gi papa noso mama leki gi mi, no warti gi mi”, Jesus e taki, „èn a sma di abi moro bigi lobi gi manpikin noso gi oemapikin leki gi mi, no warti gi mi.”

Te Jesus e tapoe foe gi den disipel foe en leri, a e tjari kon na krin taki den sma di e teki den disipel foe en, e teki en toe. „Èn ibriwan sma di e gi wán foe den pikinwan disi soso wan beker kowroe watra foe dringi foe di a de wan disipel, foe troe mi e taigi oenoe, a no sa lasi en pai kwetikweti.” Mateus 10:16-42.

▪ Sortoe warskow Jesus e gi den disipel foe en?

▪ Sortoe deki-ati nanga trowstoe a e gi den?

▪ Foe san ede den leri foe Jesus na gi kresten toe na ini a ten disi?

▪ Na sortoe fasi wan disipel foe Jesus no bigi moro leki en leriman?