Kapitel 3

A sma di moesoe sreka a pasi, e gebore

HERI ESI Elisabet sa kisi en beibi. Den dri moen di pasa, Maria ben e tan nanga en. Ma now a ten doro gi Maria foe taki adjosi èn foe waka a langa pasi go baka na oso na Nasaret. Baka so wan siksi moen, en so srefi sa kisi wan beibi.

Sjatoe baka di Maria gowe, Elisabet e kisi en pikin. A de troetroe wan prisiri sani taki ala sani waka boen te a pikin e gebore èn taki Elisabet nanga a beibi de nanga wan boen gosontoe! Te Elisabet e sori a pikin na den birtisma nanga den famiri foe en, dan den alamala e prisiri makandra nanga en.

Na Israèl, soleki fa a wet foe Gado taki, wan manpikin moesoe besnij na tapoe a di foe aiti dei baka te a kon gebore. Na a okasi disi mati nanga famiri e kon loekoe den. Den e taki dati a boi moesoe kisi a nen foe en papa Sakarias. Ma Elisabet e taki fa en e denki foe a tori. „Kwetikweti!” a e taki, „a moesoe nen Johanes.” Prakseri, taki dati na a nen di na engel Gabrièl ben taki dati a pikin ben moesoe kisi.

Ma den mati foe den no e agri èn den e taki: „No wan sma ini joe famiri abi a nen disi.” Dan, foe di den e gebroiki den anoe foe meki gebaar, den e aksi a papa fa a wani taki a boi moesoe nen. Sakarias e aksi wan skrifi planga, èn ala sma e froewondroe te a e skrifi: „Johanes na en nen.”

Na a srefi momenti dati, Sakarias man foe taki baka na wan wondroe fasi. Joe kan memre ete taki a no ben man taki moro, foe di a no ben bribi a boskopoe foe na engel taki Elisabet ben sa kisi wan pikin. We, te Sakarias e taki, dan ala den sma foe a birti e froewondroe èn den e taigi makandra: „Fa a sa waka nanga a jongoe pikin disi?”

Now Sakarias e kon foeroe nanga santa jeje, èn nanga bigi prisiri a e bari taki: „Blesi foe Jehovah, a Gado foe Israèl, bika a poti en prakseri tapoe en pipel èn a tjari froeloesoe kon gi den. Èn gi wi a opo wan toetoe foe froeloesoe ini na oso foe David, en foetoeboi.” A no de foe taki, dati a „toetoe [disi] foe froeloesoe”, na Masra Jesus di moesoe gebore ete. Sakarias e taki dati nanga jepi foe en, Gado sa „gi wi a grani, baka te a froeloesoe wi foe den anoe foe den feanti, foe doe santa diniwroko gi en sondro frede, na wan loyaal fasi èn regtfardiki fasi na en fesi, ala den dei foe wi”.

Ne Sakarias e froeteri na fesi, foe sani di abi foe doe nanga en manpikin Johanes: „Ma foe taki foe joe, jongoe pikin, den sa kari joe wan profeiti foe a Moro Heiwan, bika joe sa go na fesi gi Jehovah foe sreka den pasi foe en, foe meki en pipel kon sabi foe a froeloesoe nanga jepi foe a gi di a e gi den pardon foe den sondoe foe den, foe a safri sari-ati foe wi Gado. Nanga a sari-atifasi disi wan deibroko foe tapoesei sa kon na wi, foe gi leti na den wan di de na ini doengroe èn na ini a skaduw foe dede, foe poti wi foetoe nanga boen bakapisi tapoe a pasi foe vrede.”

Na a ten disi Maria doro en oso na Nasaret, èn soleki fa a sori, dan a no trow ete. San sa pasa nanga en te a de krin foe si taki a de nanga bere? Lukas 1:56-80; Lefitikus 12:2, 3.

▪ Omeni Johanes owroe moro Jesus?

▪ San e pasa te Johanes abi aiti dei?

▪ Fa Gado poti en prakseri tapoe en pipel?

▪ Sortoe wroko Johanes sa doe, soleki fa ben froeteri na fesi?