Kapitel 1

Boskopoe foe hemel

TE JOE loekoe en boen, dan a heri bijbel na wan boskopoe foe hemel, di wi hemel Tata ben gi wi foe leri wi. Ma pikinmoro 2000 jari pasa, wan engel di „e tanapoe krosibei na fesi foe Gado”, ben tjari toe spesroetoe boskopoe kon. Na engel nen Gabrièl. Meki wi go ondrosoekoe foe san ede a ben go na grontapoe foe tjari den toe prenspari fisiti disi.

A de a jari 3 b.G.T. Ini den pikin bergi foe Judea, kande no so fara foe Jerusalem, wan priester foe Jehovah e libi, di nen Sakarias. En nanga en wefi Elisabet owroe moi kaba. Den no abi no wan pikin. Now na Sakarias di moesoe wroko leki priester na ini a tempel foe Gado na Jerusalem. Wantronso Gabrièl e sori ensrefi na a leti-anoesei foe na altari pe den e bron wierook na tapoe.

Sakarias frede srefisrefi. Ma Gabrièl e taigi en foe no frede, foe di a e taki: „No frede, Sakarias, bika Gado jere den tranga begi foe joe, èn a wefi foe joe, Elisabet, o kisi wan manpikin gi joe, di joe moesoe kari Johanes.” Gabrièl e go doro foe meki bekènti taki Johanes „sa bigi na fesi foe Jehovah” èn taki a sa „sreka gi Jehovah wan pipel di de srekasreka”.

Ma Sakarias no man bribi disi. A gersi wan sani di no kan kwetikweti, taki en nanga Elisabet ben kan kisi wan pikin, ala di den de so owroe kaba. Dati meki Gabrièl e taigi en: „Joe mofo sa tapoe èn joe no sa man taki te leki a dei di den sani disi o pasa so, bika joe no ben bribi den wortoe foe mi.”

We, ma now den sma na dorosei e aksi densrefi foe san ede Sakarias e tan so langa na ini a tempel. Te a e kon na dorosei te foe kaba, a no man taki ma a kan meki gebaar nomo nanga en anoe, èn den e kon froestan taki a ben si wan froewondroe sani.

Baka di Sakarias kaba doe en wroko na ini a tempel, a e go na oso baka. Sjatoe baka dati a e pasa troetroe — Elisabet e kisi bere! Ala di Elisabet e wakti foe en pikin kon gebore, dan feifi moen a e tan na oso, èn a no e miti nanga sma.

Baka ten Gabrièl e sori ensrefi baka. Èn nanga soema a e taki now? Nanga wan jongoe oema di nen Maria èn di no trow ete. A de foe a foto Nasaret. Sortoe boskopoe Gabrièl e tjari disi leisi? Arki! „Gado feni joe boen”, Gabrièl e taigi Maria. „Loekoe! joe sa kisi bere èn meki wan manpikin, èn joe moesoe kari en Jesus.” Gabrièl e taki moro fara: „A wan disi sa bigi èn den sa kari en a Manpikin foe a Moro Heiwan; . . .  èn leki kownoe a sa tiri na oso foe Jakob foe têgo, èn wan kaba no sa kon na a kownoekondre foe en.”

Wi kan de seiker taki Gabrièl e feni en wan grani foe tjari den boskopoe disi. Èn te wi e leisi moro foe Johanes nanga Jesus, dan a sa kon moro krin gi wi foe san ede den boskopoe disi foe hemel de so prenspari. 2 Timoteus 3:16; Lukas 1:5-33.

▪ Sortoe toe prenspari boskopoe e tjari kon foe hemel?

▪ Soema e tjari den boskopoe, èn gi soema a e tjari den?

▪ Foe san ede a de so moeilek foe bribi den boskopoe?