Kapitel 28

Den ben poti aksi gi Jesus ini a tori foe faste

PIKINMORO wán jari pasa sensi Jesus ben go na a Paska foe 30 G.T. Disiten, den hori Johanes a Dopoeman wan toe moen kaba na doengroe-oso. Ala di Johanes wani, taki den disipel foe en tron bakaman foe Krestes, tokoe a no alamala doe dati.

Now wan toe foe den disipel disi foe Johanes, di den e hori na doengroe-oso, e kon na Jesus èn den e aksi: „Foe san ede wi nanga den Fariseiman e faste, ma den disipel foe joe no e faste?” Den Fariseiman e faste toe tron wan wiki leki wan gwenti foe a relisi foe den. Èn kande den disipel foe Johanes abi a srefi gwenti toe. Kande a de so toe, taki den e faste foe di den e sari taki den hori Johanes na doengroe-oso, èn den e denki na densrefi foe san ede den disipel foe Jesus no e teki prati nanga den na a fasi disi foe sori sari.

Leki wan piki Jesus e tjari kon na krin: „Den mati foe a trowmasra no abi reide foe sari, so langa a trowmasra de nanga den, a no so? Ma den dei sa kon, taki den sa teki a trowmasra poeroe na den mindri, èn dan den sa faste.”

Den disipel foe Johanes moesoe memre taki Johanes ensrefi ben taki foe Jesus leki a Trowmasra. So boen, ala di Jesus de ete na grontapoe, Johanes no ben sa feni en wan joisti sani foe faste, èn na so den disipel foe Jesus e prakseri foe a tori toe. Baka ten, te Jesus dede, den disipel e sari èn e faste. Ma te a kisi wan opobaka èn e opo go na hemel, dan den no abi no wan reide moro foe faste foe sari ede.

Baka dati, Jesus e froeteri den agersitori disi: „No wan sma e nai wan pisi krosi di no krempi, na tapoe wan owroe tapoesei krosi; bikasi foe en bigi krakti ede, a pisi krosi ben sa hari a tapoesei krosi, so taki a priti ben sa kon moro bigi. Na so, sma no e poti njoen win na ini owroe win-saka toe; ma efoe den e doe dati, dan den win-saka e priti èn a win e lon komoto na ini den èn den win-saka no boen moro. Ma sma e poti njoen win na ini njoen win-saka.” San den agersitori disi abi foe doe nanga faste?

Jesus ben e jepi den disipel foe Johanes a Dopoeman foe froestan taki no wan sma moesoe froewakti taki den bakaman foe en ben sa hori densrefi na den owroe gwenti foe a djoe bribi, soleki a gwenti foe faste. A no ben kon foe lapoelapoe den owroe sistema foe anbegi di no ben boen moro, èn foe meki den tan, ala di den ben de klariklari foe poeroe den na pasi. A kresten bribi no ben de foe fiti ensrefi na a djoe bribi nanga en libisma gwenti di ben de na ini a ten dati. Nôno, a no ben sa de leki wan njoen pisi krosi na tapoe wan owroe krosi noso leki njoen win na ini wan owroe win-saka. Mateus 9:14-17; Markus 2:18-22; Lukas 5:33-39; Johanes 3:27-29.

▪ Soema e faste, èn nanga sortoe marki na prakseri?

▪ Foe san ede den disipel foe Jesus no e faste so langa Jesus de nanga den, èn foe san ede heri esi reide foe faste no sa de moro?

▪ Sortoe agersitori Jesus e froeteri, èn san den wani taki?