Kapitel 58

Den brede nanga a sroedeki

BIGI ipi sma hari kon na Jesus na a Dekapolis. Foeroe sma ben teki wan langa pasi kon na a kontren disi, pe moro foeroe heiden e libi, foe kon arki en èn foe kon betre foe den siki foe den. Den tjari bigi baskita noso manki kon nanga den, di den gwenti foe tjari njanjan na ini, te den e teki waka na ini den kontren pe heiden e libi.

Ma te foe kaba, Jesus e kari den disipel foe en èn a e taki: „Mi e sari na ipi sma, bika na dri dei kaba taki den tan nanga mi èn den no abi noti foe njan; èn efoe mi moesoe seni den go na den oso sondro den njan wan sani fosi, dan den sa fadon na pasi. Foe troe, sonwan foe den kon foe fara.”

„Pe wan sma kan feni brede na ini so wan fara presi leki djaso foe gi den sma disi brede foe njan den bere foeroe?”, den disipel e aksi.

Jesus e aksi: „Omeni brede oenoe abi?”

„Seibi,” den e piki, „nanga wan toe pikin fisi.”

Baka di Jesus taigi den sma foe go didon na gron, a e teki den brede nanga den fisi, a e begi Gado, e broko den, èn a e langa den gi den disipel foe en. Den, foe den sei, e tjari dati gi den sma, èn den alamala e njan te den bere foeroe. Baka dati, te den e tjari san tan abra kon na wan, den e foeroe seibi njanjan baskita, ala di so wan 4000 man, so srefi oema nanga pikin, njan!

Jesus e seni den ipi sma gowe, èn en nanga den disipel foe en e teki boto go na abra sei, na a westsei sjoro foe a Se foe Galilea. Djaso den Fariseiman e proeberi foe tesi Jesus, foe di den e aksi en foe sori den wan marki foe hemel. A leisi disi den Fariseiman de makandra nanga den memre foe a relisi sekte foe den Sadoeseiman.

Foe di Jesus sabi taki den e proeberi foe tesi en, meki a e piki: „Te neti e doro, dan oenoe gwenti foe taki: ’A weri o moi, bika loktoe redi nja’; èn na mamanten: ’Tide a weri o kowroe èn alen o kon, bika loktoe redi nja, ma a doengroedoengroe.’ A fasi fa loktoe de, oenoe sabi foe tjari kon na krin, ma den marki foe den ten oenoe no man tjari kon na krin.”

Wantewante baka disi Jesus e kari den wan ogri geslakti di e doe soetadoe, èn a e warskow den, taki neleki fa a ben taigi den Fariseisma kaba, dati den no sa kisi no wan marki boiti a marki foe Jona. Baka dati, en nanga den disipel foe en e teki boto foe hari go na Betsa-ida, na a noord-owstoesei sjoro foe a Se foe Galilea. Na pasi den disipel e si, taki den frigiti foe teki brede nanga den èn taki makandra den abi soso wán brede na den.

Jesus, di e prakseri ete a toeka di a ben toeka nanga den Fariseiman nanga den Sadoesei bakaman foe Herodes sjatoe na fesi, e froemane den: „Opo oen ai, loekoe boen nanga a sroedeki foe den Fariseiman nanga a sroedeki foe Herodes.” A de krin, taki foe di Jesus e taki foe sroedeki, meki den disipel e denki taki Jesus e taki foe a frigiti di den frigiti foe tjari brede kon, èn den e bigin foe hari taki nanga makandra foe na afersi. Te Jesus e si taki den no froestan en boen, a e taki: „Foe san ede oenoe e hari taki nanga makandra taki oenoe no abi brede?”

No so langa pasa kaba, Jesus ben gi brede na doesoendoesoen sma na wan wondroe fasi, èn a ben doe a wondroe disi kande soso wán noso toe dei pasa. Den ben moesoe sabi taki a no e broko en ede nanga a de di troetroe brede no de. „Oenoe no e memre”, a e tjari kon na ini den prakseri baka, „di mi ben broko den feifi brede gi den feifi doesoen sma, omeni baskita foeroe nanga pisipisi brede oenoe ben go piki?”

„Twarfoe”, den e piki.

„Èn omeni njanjan baskita foeroe nanga pisipisi brede oenoe ben go piki di mi ben broko den seibi gi den fo doesoen sma?”

„Seibi”, den e piki.

„Oenoe no e froestan ete san a wani taki?”, Jesus e aksi. „Fa a doe kon, taki oenoe no e si krin taki mi no ben taki nanga oenoe foe brede? Ma loekoe boen nanga a sroedeki foe den Fariseiman nanga Sadoeseiman.”

Now fosi den disipel e froestan a tori. Sroedeki, wan sani di e meki brede sweri, ben de wan wortoe di den ben e gebroiki foe sori tapoe a pori di sani e pori. So boen, now den disipel e froestan taki Jesus e gebroiki wan agersitori, taki a e warskow den foe loekoe boen nanga „a leri foe den Fariseiman nanga Sadoeseiman”, wan leri di abi wan pori krakti. Markus 8:1-21; Mateus 15:32–16:12.

▪ Foe san ede den sma abi bigi njanjan baskita na den?

▪ Sortoe waka nanga boto Jesus e teki, baka di a gowe foe a Dekapolis?

▪ San den disipel no e froestan boen ini a tori foe san Jesus ben taki foe sroedeki?

▪ San Jesus wani taki nanga den wortoe „a sroedeki foe den Fariseiman nanga Sadoeseiman”?