Kapitel 55

Foeroe disipel no e waka moro na Jesus baka

JESUS e gi leri na ini wan snoga na Kaperna-um foe a prati di a abi leki a troe brede foe hemel. A taki di a e hori, de, soleki fa a sori, wan tra pisi foe a takimakandra di a ben bigin nanga den sma, di den ben feni en, baka di den ben drai kon baka foe na owstoesei foe a Se foe Galilea, pe den ben njan brede nanga fisi di den ben kisi na wan wondroe fasi.

Jesus e go doro nanga den sani di a e taki, nanga den wortoe: „A brede di mi sa gi, na mi skin foe a boen foe a libi foe grontapoe.” Soso toe jari pasa, na ini a lente foe 30 G.T., Jesus ben taigi Nikodeimus taki Gado ben lobi grontapoe sote, dati a ben gi en Manpikin leki wan Froeloesoeman. So boen, Jesus e sori now taki ibriwan sma na ini a grontapoe foe libisma, di e njan foe en skin na wan agersi fasi, foe di a e sori bribi na ini a srakti-ofrandi di a sa tjari heri esi, kan kisi têgo libi.

Ma den sma e naki foetoe na den wortoe foe Jesus. „Fa a man disi kan gi wi en skin foe njan?”, den e aksi. Jesus wani, taki den sma di e arki en, moesoe froestan taki foe njan a skin foe en, ben sa de na wan agersi fasi. Foe dati ede, foe poti krakti na tapoe disi, a e taki wan sani di e meki den sma tegoe moro, efoe joe ben sa teki en na wan troetroe fasi.

„Efoe oenoe no e njan a skin foe a Manpikin foe libisma èn no e dringi en broedoe,” na so Jesus e froeklari, „dan oenoe no abi libi na ini oensrefi. A sma di e njan mi skin èn e dringi mi broedoe, abi têgo libi, èn mi sa gi en wan opobaka na a lasti dei; bika mi skin na troe njanjan èn mi broedoe na troe dringi. A sma di e njan mi skin èn e dringi mi broedoe, e tan ini wánfasi nanga mi, èn mi ini wánfasi nanga en.”

A troe taki, san Jesus e leri dja, ben sa gersi wan sani di e afrontoe sma srefisrefi, efoe a ben sa gi sma a rai foe go njan a skin foe libisma. Ma a no de foe taki, dati Jesus no e gi sma deki-ati foe go njan libisma skin noso go dringi broedoe troetroe. A e poti krakti na tapoe nomo, taki ala sma di e kisi têgo libi, moesoe sori bribi na ini a srakti-ofrandi di a sa tjari te a e òfer en volmaakti libisma skin èn gi en libi-broedoe. Ma tokoe, srefi foeroe foe den disipel foe en no e doe moeiti foe froestan san a e leri, èn foe di den no e agri nanga dati, meki den e taki: „A taki disi na wan sani di e afrontoe sma; soema kan arki disi?”

Foe di Jesus sabi taki foeroe foe den disipel foe en e kroetoekroetoe, meki a e taki: „Oenoe e naki foetoe na disi? San dan, efoe oenoe ben sa si a Manpikin foe libisma e opo go na pe a ben de bifo? . . . Den wortoe di mi taigi oenoe, na jeje èn na libi. Ma sonwan foe oenoe no e bribi.”

Jesus e go moro fara: „Foe dati ede mi taigi oenoe: No wan sma kan kon na mi, boiti efoe a Tata ben gi en a grani disi.” Foeroe foe den disipel foe en e gowe, te den e jere a sani disi, èn den no e waka moro na en baka. Foe dati ede Jesus e drai loekoe den twarfoe apostel foe en èn a e aksi den: „Oenoe srefi no wani gowe toe?”

Petrus e piki: „Masra, na soema wi sa go? Joe abi wortoe foe têgo libi; èn wi bribi èn kon sabi taki joe na a Santawan foe Gado.” Fa disi e sori loyaalfasi na wan heri moi fasi, awinsi Petrus nanga den tra apostel kande no froestan den leri foe Jesus krin, di abi foe doe nanga na afersi disi!

Ala di Jesus e prisiri foe a piki foe Petrus, tokoe a e taki: „Mi ben froekisi oenoe twarfoe, a no so? Tokoe wán foe oenoe na wan sma di e pori trawan nen.” A e taki foe Judas Iskariòt. Kande na a momenti disi Jesus e si na ini Judas a „bigin” noso wan fosi stap foe go tjari ensrefi na wan fowtoe fasi.

A no ben de so langa ete, di Jesus no ben meki a froewakti foe den sma kon troe, foe di a ben kakafoetoe gi den, di den ben proeberi foe meki en tron kownoe, èn kande den e denki: ’Fa disi kan de a Mesias, efoe a no wani teki a reti presi foe a Mesias?’ So srefi, na afersi disi ben sa de wan afersi di ben o de krin ete na ini a prakseri foe den sma. Johanes 6:51-71; 3:16.

▪ Gi soema Jesus e gi en skin, èn fa den disi ’e njan en skin’?

▪ Sortoe tra wortoe foe Jesus e seki den sma, ma na tapoe sortoe sani a e poti krakti?

▪ San Petrus e taki te foeroe sma no e waka moro na Jesus baka?