Kapitel 133

Jesus e klari ala san Gado aksi en foe doe

A SA de troetroe wan sani di e gi prisiri te a Fetiman-Kownoe Jesus Krestes poeroe Satan nanga en onregtfardiki grontapoe! Jesus Doesoen Jari Tiri foe vrede e bigin te foe kaba!

Na ondro a tiri foe Jesus nanga den kompe kownoe foe en, den sma, di pasa Armagedon libilibi, sa krin den broko presi di tan abra foe a regtfardiki feti dati. Kande den sma foe grontapoe di sa tan na libi, sa kisi pikin toe foe wan pisi ten, èn den disi sa abi wan prati na a prisiri wroko foe meki grontapoe tron wan toemoesi moi djari di gersi wan park.

Baka wan pisi ten Jesus sa meki miljoenmiljoen sma di joe no kan teri, komoto na a grebi foe den foe njan boen foe a kefalek moi Paradijs disi. A sa doe disi leki wan kontroe foe en eigi pramisi: „A joeroe e kon pe ala sma di de na ini den memre-grebi, . . . sa kon na doro.”

Wan foe den sma di Jesus sa gi wan opobaka, na a man di fosi ben de wan ogriman di ben dede sei Jesus na a pina-postoe. Joe kan memre taki Jesus ben pramisi en: „Foe troe, mi e taigi joe tide: Joe sa de nanga mi na ini a Paradijs.” Nôno, a man dati no o go na hemel foe tiri leki kownoe nanga Jesus, èn Jesus no o tron wan libisma baka èn libi nanga en na ini a Paradijs na grontapoe. Na presi foe dati, Jesus sa de nanga a man di fosi ben de wan ogriman, na a fasi disi taki A sa gi en wan opobaka foe libi na ini a Paradijs èn a sa sorgoe taki a sa kisi den sani di a abi fanowdoe na skinfasi èn na jejefasi, soleki fa den e prenki disi na tapoe a tra bladzijde.

Prakseri foe disi nomo! Na ondro a lobi sorgoe foe Jesus, a heri libisma famiri — den sma di pasa Armagedon libilibi, den pikin foe den, nanga den miljardmiljard dede sma di kisi wan opobaka èn di gi jesi na en — sa gro kon doro libisma volmaaktifasi. Nanga jepi foe en kownoe Manpikin, Jesus Krestes, Jehovah sa tan nanga a libisma famiri, na wan jejefasi. „Èn”, soleki fa Johanes ben jere a sten foe hemel e taki, „a sa figi poeroe ala watra-ai na den ai, èn dede no sa de moro, no wan sari, no wan babari, no wan pen no sa de moro.” No wan sma na grontapoe sa pina noso sa siki.

Na a kaba foe Jesus Doesoen Jari Tiri, a situwâsi sa de neleki fa Gado ben abi na prakseri biginbigin di a ben taigi a fosi libisma paar, Adam nanga Eva, foe meki pikin èn foeroe grontapoe. Ija, grontapoe sa kon foeroe nanga wan regtfardiki geslakti foe volmaakti libisma. Disi sa de so, foe di ala sma sa kisi den winimarki foe Jesus loesoe-ofrandi. Dede di ben kon foe di Adam ben sondoe, no sa de moro!

Na so fasi Jesus sa klari ala san Jehovah ben aksi en foe doe. Foe dati ede, na a kaba foe den doesoen jari, a sa gi a Kownoekondre nanga a libisma famiri, di kon volmaakti, abra na en Tata. Baka dati, Gado sa loesoe Satan nanga den ogri jeje foe en foe a peti di no abi gron, pe sma no man doe notinoti èn di joe kan teki gersi dede. Nanga sortoe prakseri?

We, na a kaba foe den doesoen jari, moro foeroe foe den sma di sa libi na ini a Paradijs, sa de sma di kisi wan opobaka èn sma di noiti no kisi tesi tapoe a bribi foe den. Bifo den dede, noiti den no ben sabi den pramisi foe Gado èn foe dati ede den no ben kan sori bribi na ini en. Baka dati, baka di den kisi wan opobaka èn den leri den bijbel waarheid, a ben de makriki gi den foe dini Gado na ini a Paradijs, sondro foe wan sani gens den. Ma efoe Satan ben sa kisi na okasi foe proeberi foe tapoe den foe dini Gado, den ben sa tan loyaal dan na ondro tesi? Foe kisi piki tapoe na aksi disi, meki den sa loesoe Satan.

Ini na openbaring di ben gi na Johanes, den e tjari kon na krin, taki baka a Doesoen Jari Tiri foe Jesus, Satan sa abi boen bakapisi, foe di a sa meki taki wan nomroe sma di wi no sabi omeni den de, drai den baka gi Gado so taki den no e dini en moro. Ma dan, te a lasti tesi kon na wan kaba, Satan nanga den ogri jeje foe en, nanga ala den sma di a ben man kori, sa kisi pori foe têgo. Na a tra sei, den sma di pasa libilibi, di ben kisi tesi dorodoro èn di tan loyaal, sa tan na libi foe njan boen foe têgo foe den blesi foe a hemel Tata foe den.

A de krin, taki Jesus ben abi wan prenspari prati na a doe di a glori prakseri foe Gado e doe, èn a sa tan abi wan prenspari prati. Wi kan njan boen troetroe foe wan moi tamara, di de a bakapisi foe ala san a e doe leki Gado bigi hemel Kownoe. Tokoe wi no kan frigiti ala den sani di a ben doe di a ben de wan libisma.

Jesus ben de klariklari foe kon na grontapoe foe leri wi foe en Tata. Boiti dati, a ben sori den warti eigifasi foe Gado. A e boeweigi wi ati, te wi e prakseri foe a boen bigi deki-ati foe en nanga en manfasi, a koni foe en di no abi speri, a kefalek koni fasi di a ben abi leki leriman, a wroko foe en leki edeman di de sondro frede, nanga a safoe sari-atifasi foe en èn a firi di a ben kan firi heri boen san tra sma ben firi. Te wi e prakseri fa a ben pina pasa marki di a ben gi a loesoe-paiman, a wan-enkri sani di wi kan kisi libi foe dati, dan foe troe wi ati e foeroe nanga warderi gi en!

Foe troe, wi ben kon leri sabi wan aparti libisma ini a studie disi foe Jesus libi! A bigi foe en de krin foe si èn a e moro wi. A e boeweigi wi foe taki den wortoe foe a tiriman Pontius Pilatus, wan Romesma, ete wan tron: „Loekoe! A man!” Ija, foe troe, „A man”, a moro bigi man di oiti ben libi!

Te wi e teki a seti foe en loesoe-ofrandi, dan a hebi foe sondoe nanga dede di wi kisi foe Adam, kan teki poeroe foe wi, èn Jesus kan tron wi „Têgo Tata”. Ala sma di wani kisi têgo libi no moesoe teki sabi foe Gado wawan, ma so srefi foe en Manpikin, Jesus Krestes. Wi howpoe taki a leisi di joe e leisi a boekoe disi èn a studeri di joe e studeri en, jepi joe foe kisi so wan sabi di e gi libi! 1 Johanes 2:17; 1:7; Johanes 5:28, 29; 3:16; 17:3; 19:5; Lukas 23:43; Genesis 1:28; 1 Korentesma 15:24-28; Openbaring 20:1-3, 6-10; 21:3, 4; Jesaja 9:6.

▪ Sortoe kolokoe grani den sma di pasa Armagedon libilibi, nanga den pikin foe den sa kisi?

▪ Soema, boiti den sma di pasa Armagedon libilibi nanga den pikin foe den, sa njan boen foe a Paradijs, èn na sortoe fasi Jesus sa de nanga den?

▪ San sa de a situwâsi na a kaba foe den doesoen jari, èn san Jesus sa doe dan?

▪ Foe san ede den sa loesoe Satan foe a peti di no abi gron, èn san o pasa te foe kaba nanga en èn nanga ala den sma di e waka na en baka?

▪ Fa Jesus kan tron wi „Têgo Tata”?