Kapitel 102

Krestes e rèi go na ini Jerusalem leki wan winiman

A TRA mamanten, sonde 9 Nisan, Jesus nanga den disipel foe en e gowe libi Betania, foe waka abra na Olijfbergi go na Jerusalem. A no e teki langa, te den e doro Betfage, di de na tapoe na Olijfbergi. Jesus e gi toe foe en disipel a komando:

„Go na ini a dorpoe di oenoe e si na oen fesi, èn wantewante oenoe sa feni wan oemaboeriki di tai, nanga en pikin na en sei; loesoe den èn tjari den kon na mi. Èn efoe wan sma e taigi oenoe wan sani, dan oenoe moesoe taki: ’Masra abi den fanowdoe.’ Dan a sa seni den kon wantewante.”

Ala di den disipel biginbigin no e froestan taki a komando disi abi foe doe nanga a kontroe foe bijbel profeititori, tokoe den e froestan disi baka ten. A profeiti Sakaria ben taki na fesi dati a pramisi Kownoe foe Gado ben sa rèi na tapoe wan boeriki kon na ini Jerusalem, ija, „na tapoe wan meti di bigi kaba, a pikin foe wan oemaboeriki”. Kownoe Salomo ben rèi go toe na tapoe wan pikin foe wan boeriki foe den salfoe en.

Te den disipel e go na ini Betfage èn e teki a pikin boeriki nanga en mama, dan wan toe sma di tanapoe drape e taki: „San oenoe e doe?” Ma te den e froeteri den sma taki den meti na gi Masra, dan den sma e gi den disipel pasi foe tjari den go na Jesus. Den disipel e poti den tapoesei krosi foe den na tapoe na oemaboeriki èn na tapoe a pikin foe en, ma Jesus e go sidon na tapoe a pikin foe a boeriki.

Te Jesus e rèi go na Jerusalem, dan na ipi sma e kon moro bigi. A moro bigi pisi foe den sma e bradi den tapoesei krosi foe den na tapoe a pasi, ala di trawan e koti taki foe den bon èn e bradi den na tapoe a pasi. „Blesi foe a Sma di e kon leki a Kownoe na ini a nen foe Jehovah!”, den e bari taki. „Vrede na ini hemel èn glori na ini den moro hei presi!”

Wan toe foe den Fariseiman di de na mindri na ipi sma, e kon broeja foe san den sma e bari èn den e kragi na Jesus taki: „Leriman, piri-ai gi den disipel foe joe.” Ma Jesus e piki: „Mi e taigi oenoe: Efoe den disi ben sa tan hori den mofo, dan den ston ben sa bari taki.”

Te Jesus e kon krosibei foe Jerusalem, dan a e loekoe a foto èn a e bigin krei foe a foto ede, ala di a e taki: „Efoe joe, ija joe, tapoe a dei disi ben abi a koni foe si den sani krin di abi foe doe nanga vrede — ma now den kibri gi joe ai.” Foe di Jerusalem trangajesi foe espresi, meki a moesoe pai a paiman, soleki fa Jesus e taki na fesi:

„Den feanti foe joe [den Romesma na ondro a tiri foe legre-edeman Titus] sa bow wan skotoe foe oedoe postoe na joe lontoe nanga srapoe penti postoe èn den sa lontoe joe èn pina joe foe ala sei, èn den sa masi joe nanga joe pikin na ini joe na gron, èn na ini joe, den no sa libi no wan ston na tapoe wan trawan.” A pori disi di Jerusalem kisi èn di Jesus ben taki na fesi foe en, e pasa troetroe 37 jari na baka, na ini a jari 70 G.T.

Soso wan toe wiki na fesi, foeroe sma na ini na ipi ben si di Jesus ben opo Lasarus baka na dede. Now den disi e tan froeteri trawan foe a wondroe dati. So boen, te Jesus e go na ini Jerusalem, a heri foto de na ini djoegoedjoegoe. „Soema na a sma disi?”, sma wani sabi. Èn den ipi sma e tan taki: „Disi na a profeiti Jesus, foe Nasaret na Galilea!” Te den Fariseiman e si san e pasa, dan den e kragi taki den no man doe notinoti, bika soleki fa den e taki: „Grontapoe waka go na en baka.”

Soleki fa a de a gwenti foe Jesus te a e kon na Jerusalem, dan a e go na a tempel foe gi leri na sma. Drape den breniwan nanga den malengriwan e kon na en, èn a e dresi den! Te den granpriester nanga den leriman foe Wet e si den froewondroe sani di Jesus e doe èn te den e jere den boi na ini a tempel e bari taki: „Froeloesoe grantangi, a Manpikin foe David!”, dan den ati e bron. „Joe e jere san den disi e taki?”, den e taki foe di den no e agri nanga a tori.

„Ija”, Jesus e piki. „Noiti oenoe no leisi a sani disi: ’Foe a mofo foe njofi pikin nanga pikin na bobi, joe e sorgoe taki den e prèise joe’?”

Jesus e go doro foe gi sma leri, èn a e loekoe ala sani di e pasa na ini a tempel. Te foe joe denki, a joeroe kon lati. Foe dati ede a e gowe makandra nanga den twarfoe disipel, èn e teki waka so wan dri kilometer go baka na Betania. Drape a e tan a sondeneti, kande na ini na oso foe en mati Lasarus. Mateus 21:1-11, 14-17; Markus 11:1-11; Lukas 19:29-44; Johanes 12:12-19; Sakaria 9:9.

▪ O ten èn fa Jesus e kon na ini Jerusalem leki Kownoe?

▪ O prenspari a de, taki den ipi sma e prèise Jesus?

▪ Fa Jesus e firi te a e loekoe Jerusalem, èn sortoe profeititori a e taki?

▪ San e pasa te Jesus e go na a tempel?