Kapitel 23

Moro wondroe na Kaperna-um

A SABADEI baka di Jesus kari den fosi fo disipel foe en — Petrus, Andreas, Jakobus nanga Johanes — den alamala e go na wan snoga drape na Kaperna-um. Drape Jesus e bigin gi leri na sma, èn den sma e froewondroe foe di a e gi den leri leki wan sma di abi makti èn no leki den leriman foe Wet.

Na a Sabadei disi wan man di ogri jeje de na en tapoe, de drape. Baka wan pisi ten, a e bari nanga wan tranga sten: „San wi abi foe doe nanga joe, Jesus, sma foe Nasaret? Joe ben kon foe kiri wi? Mi sabi soifri soema na joe: A Santawan foe Gado.”

Te joe loekoe en boen, dan na ogri jeje di abi a man ini en makti, na wan foe den engel foe Satan. Jesus e strafoe na ogri jeje, foe di a e taki: „Tan tiri, èn komoto na ini en!”

We, na ogri jeje e meki a man kisi stoipi èn a e bari boen tranga. Ma a e komoto na ini a man sondro foe gi en mankeri. Ala sma e froewondroe! „San na disi?”, den e aksi. „Srefi den jeje di no krin, a e komanderi na wan makti fasi èn den e gi jesi na en.” A njoensoe foe disi e panja na a heri kontren.

Te Jesus nanga den disipel foe en e gowe libi a snoga, dan den e go na a oso foe Simon, noso Petrus. Drape a mama foe a wefi foe Petrus, siki boen tranga èn wan hebi korsoe naki en. ’Grantangi, jepi en’, den e begi. Foe dati ede Jesus e go na en, e hori en na en anoe, èn e meki taki a e opo. Wantewante a e kon betre èn a e bigin sreka wan njanjan gi den!

Baka ten, te son dongo, sma foe ala sei e bigin kon na a oso foe Petrus, nanga den siki sma foe den. Te foe joe denki, heri foto de na a mofodoro! Èn Jesus e dresi ala den siki sma foe den, awansi sortoe siki den abi toe. A e fri srefi den sma di ogri jeje de na den tapoe. Te den ogri jeje, di a e poeroe na den sma tapoe, e komoto na ini den sma, dan den e bari taki: „Joe na a Manpikin foe Gado.” Ma Jesus e strafoe den èn a no e gi den pasi foe taki, foe di den sabi taki en na a Krestes. Markus 1:21-34; Lukas 4:31-41; Mateus 8:14-17.

▪ San e pasa na ini a snoga na a Sabadei, baka di Jesus kari den fo disipel foe en?

▪ Pe Jesus e go te a gowe libi a snoga, èn sortoe wondroe a e doe drape?

▪ San e pasa baka ten, a srefi neti dati?