Kapitel 101

Na Betania, na ini na oso foe Simon

TE JESUS e gowe libi Jerikow, dan a e go na Betania. A waka e teki pikinmoro a heri dei, foe di den moesoe kren so wan 19 kilometer abra moeilek kontren. Jerikow lagi so wan 250 meter moro a se èn Betania hei so wan 760 meter moro a se. Soleki fa joe kan memre ete, dan Betania na a presi pe Lasarus nanga den sisa foe en e libi. A pikin dorpoe de so wan dri kilometer foe Jerusalem èn a de na a sei foe na Olijfbergi di de na a owstoesei.

Foeroe sma doro kaba na Jerusalem gi a Paska. Den kon froekoe foe krin densrefi na ceremonia fasi. Kande den fasi wan dede skin noso doe wan tra sani di e meki taki den no krin. Foe dati ede den e doe soleki fa a wet e taki dati den moesoe krin densrefi, so taki den kan hori a Paska na wan boen fasi. Te den sma disi di e kon froekoe, èn e kon makandra na ini a tempel, dan foeroe foe den e aksi densrefi efoe Jesus sa kon na a Paska efoe no.

Jerusalem na wan presi pe kesekese de foe Jesus ede. Ala sma sabi, taki den relisi fesiman wani foe kisi en foe kiri en. Den gi srefi a komando taki efoe wan sma sabi pe Jesus e tan, dan den moesoe kon froeteri den dati. Na ini den moen di pasa, den tiriman disi proeberi dri leisi foe kiri en — tapoe a Wiwirikampoe-fesa, na a Inwijdingfesa èn baka di Jesus opo Lasarus baka na dede. So boen, den sma e aksi densrefi efoe Jesus sa sori ensrefi na poebliki ete wan tron. „San joe e prakseri?”, den e aksi makandra.

Disiten Jesus e doro na Betania siksi dei bifo a Paska, di e fadon tapoe 14 Nisan soleki fa a skrifi tapoe a djoe kalender. Jesus e doro na Betania wan sani foe freidaneti, so boen na a bigin foe 8 Nisan. A no ben kan teki a waka go na Betania tapoe satra, bika sma no abi primisi foe teki waka na a sabadei — foe freida te sondongo go miti satra te sondongo — soleki fa a djoe wet e taki. Kande Jesus e go na a oso foe Lasarus, soleki fa a ben doe kaba, èn e tan a freidaneti drape.

Ma wan tra sma di e libi na Betania, e kari Jesus nanga den kompe foe en, foe kon njan na en satraneti. A man disi na Simon, wan man di fosi ben de wan gwasiman, di Jesus ben meki kon betre kande na wan tra okasi. Marta, di abi na eigifasi foe lobi foe wroko, e sorgoe gi den fisitiman. Ma soleki fa a de a gwenti foe Maria, a e poti prakseri na tapoe Jesus, a leisi disi na wan fasi di e tjari kesekese kon.

Maria e opo wan albaster batra, noso wan pikin godo, di abi wan sani foe wan pontoe switismeri oli na ini, „troetroe nardus”. Na oli disi diri srefisrefi. Ija, a warti a srefi leki a moni di wan sma e wroko na ini so wan wán jari! Te Maria e kanti na oli na tapoe Jesus ede nanga den foetoe foe en èn e drei Jesus foetoe nanga en wiwiri, dan a switi smeri e foeroe a heri oso.

Den disipel ati e bron èn den e aksi: „Foe san ede a e froemorsoe na a fasi disi?” Dan Judas Iskariòt e taki: „Foe san ede a switismeri oli disi no ben seri gi drihondro denari èn gi na den pôti sma?” Ma Judas no e broko en ede troetroe nanga den pôtiwan, bika nofo tron a ben foefoeroe a moni foe a monikisi foe den disipel.

Jesus e opo taki gi Maria. „Meki a doe en sani”, a e komanderi. „Foe san ede oenoe e proeberi foe trobi en? A ben doe wan toemoesi boen sani gi mi. Bika den pôtiwan, oenoe abi na oenoe alaten èn efoe oenoe wani, dan oenoe kan doe den wan boen ini wan ten, ma mi oenoe no abi alaten. A ben doe san a ben kan doe; a ben kanti switismeri oli na tapoe mi skin na fesi kaba, bifo den beri mi. Foe troe, mi e taigi oenoe: Na ala presi pe a boen njoensoe e preiki na heri grontapoe, den sa froeteri toe san na oema disi ben doe èn den sa memre en.”

Jesus de now moro leki 24 joeroe na Betania, èn a njoensoe taki a de drape, panja na a heri foto. Foe dati ede foeroe sma e kon na a oso foe Simon foe si Jesus, ma den e kon toe foe si Lasarus di de drape toe. Dati meki den granpriester e go taki nanga makandra foe no kiri Jesus wawan, ma Lasarus toe. Disi de, foe di foeroe sma e poti bribi na ini Jesus, foe di den e si a sma di a ben opo baka na dede, libilibi! Ai, den relisi fesiman ogri troetroe! Johanes 11:55–12:11; Mateus 26:6-13; Markus 14:3-9; Tori foe den Apostel 1:12.

▪ Foe sortoe sani sma e taki na ini a tempel na Jerusalem, èn foe san ede?

▪ Foe san ede a moesoe foe de so, taki Jesus doro na Betania freida, na presi foe satra?

▪ Pe Jesus e tan kande na a Sabadei te a e doro na Betania?

▪ Sortoe sani di Maria e doe, e tjari kesekese kon, èn fa Jesus e opo taki gi en?

▪ San e sori a troetroe ogridoe foe den granpriester?