Kapitel 47

Watra-ai ben kon tron bigi prisiri

TE JA-IRUS e si taki na oema, di ben lasi broedoe, kon betre, dan a no abi misi taki a e kisi moro froetrow ini a krakti di Jesus abi foe doe wondroe. A dei disi, Ja-irus ben aksi Jesus kaba foe kon jepi en lobi oemapikin di abi twarfoe jari, èn di de foe dede. Ma san Ja-irus frede srefisrefi, e pasa now. Ala di Jesus e taki ete nanga na oema, dan wan toe man e kon di e taigi Ja-irus safri, taki: „Joe oemapikin dede! Foe san ede joe ben sa tan trobi a leriman moro langa?”

Ai, disi na troetroe wan kefalek sari njoensoe! Prakseri pikinso: A man disi, di sma lespeki foeroe ini a libimakandra, moesoe jere now taki en oemapikin dede, sondro foe a man doe wan sani na a tori. Ma Jesus e jere a takimakandra foe den. Foe dati ede, a e drai loekoe Ja-irus èn a e gi en a deki-ati: „No frede, sori bribi nomo.”

Jesus e go nanga a man, di e sari srefisrefi, na en oso. Te den doro, dan sma de drape di e krei boen tranga èn di e bari na wan sari fasi. Wan heri ipi sma kon makandra, èn den e naki densrefi na tapoe den borsoe foe sari ede. Te Jesus e kon na inisei, a e aksi: „Foe san ede oenoe e meki someni babari èn e krei? A jongoe pikin no dede, ma a e sribi.”

Te den sma e jere disi, den e bigin lafoe Jesus, foe di den sabi taki na oemapikin dede troetroe. Ma Jesus e taki dati a e sribi nomo. Jesus sa sori taki, neleki fa den kan wiki sma te den e sribi dipi, na so a de makriki toe foe opo sma baka na dede, èn a sa doe disi foe di a sa gebroiki a krakti di a kisi foe Gado.

Now Jesus e seni ala sma go na dorosei, boiti Petrus, Jakobus, Johanes, nanga a papa nanga a mama foe na oemapikin di dede. Dan a e go nanga den feifi sma disi pe a jongoe oemapikin didon. Jesus e teki na oemapikin na en anoe èn a e taki: „Talʹi·tha koeʹmi”, san wani taki te joe vertaal en: „Oemapikin, mi e taigi joe: Opo!” Èn wantewante na oemapikin opo tanapoe èn a e bigin waka! Te a papa nanga mama e si disi, dan den no sabi san den moesoe doe foe bigi prisiri ede.

Baka di Jesus taki dati den moesoe gi a pikin wan sani foe njan, a e komanderi Ja-irus nanga en wefi taki den no moesoe froeteri no wan sma san pasa. Ma ala di Jesus taki den wortoe disi, tokoe a tori e panja na ini a heri kontren dati. Disi na a di foe toe leisi taki Jesus opo wan sma baka na dede. Mateus 9:18-26; Markus 5:35-43; Lukas 8:41-56.

▪ Sortoe njoensoe Ja-irus e kisi, èn fa Jesus e gi en deki-ati?

▪ Sortoe situwâsi den e miti, te den doro na a oso foe Ja-irus?

▪ Foe san ede Jesus e taki dati a dede pikin e sribi nomo?

▪ Soema na den feifi sma di ben si taki Jesus ben opo a pikin baka na dede?