Kapitel seibi

San wi kan leri fu a gi di Gado e gi pasi taki ogri de

1, 2. (a) San ben o pasa nanga wi efu Yehovah ben pori Adam nanga Efa wantewante na ini Eden? (b) Sortu sani Yehovah seti gi wi na wan lobi-ati fasi?

„DEN yari fu mi, den no furu, ma someni nowtu miti mi”, na so a famiri-edeman Yakob ben taki (Genesis 47:9). Yob srefi ben taki dati libisma „e libi syatu èn a abi furu problema” (Yob 14:1). Neleki den man disi, furu fu wi kisi fu du nanga problema, nanga kruktudu, èn srefi nanga rampu. Toku a no de wan onregtfardiki sani taki Gado meki wi kon gebore. A tru taki wi no abi wan volmaakti frustan nanga wan volmaakti skin èn wi no e libi na ini wan Paradijs soleki Adam nanga Efa. Ma fa a ben o de efu Yehovah ben pori Adam nanga Efa wantewante di den ben opo densrefi teige En? We, nowan siki, sari, noso dede no ben o de, ma libisma no ben o de tu. Wi no ben o gebore srefi. Fu di Gado abi sari-ati nanga sma, meki a gi Adam nanga Efa na okasi fu kisi pikin, aladi den pikin disi kisi sondu. Boiti dati, Yehovah ben seti sani gi wi nanga yepi fu Krestes, so taki wi ben kan kisi baka san Adam ben lasi, namku têgo libi na ini wan paradijs grontapu.​—Yohanes 10:10; Romesma 5:12.

² A e gi wi trowstu trutru fu sabi taki wi abi a howpu fu libi fu têgo na ini wan nyun Paradijs grontapu, pe wi no sa kisi fu du moro nanga siki, sari, pen, nanga dede, èn pe ogri sma srefi no sa de moro! (Odo 2:21, 22;  Openbaring 21:4, 5) Ma Bijbel e leri wi taki aladi a de tumusi prenspari gi wi èn gi Yehovah taki wi e kisi frulusu, toku wan sani de di prenspari moro leki dati.

Fu meki a bigi nen fu en bekènti

3. San e sori taki den sani di Yehovah abi na prakseri nanga grontapu èn nanga libisma sa kon tru?

³ A nen fu Gado e sori kaba taki den sani di a abi na prakseri nanga grontapu èn nanga libisma sa kon tru. A nen dati, Yehovah, wani taki „A e meki sani du kon”. Sobun, a nen di a e tyari e sori taki a de a Moro Hei Tiriman fu hemel nanga grontapu, A e du ala ten san a abi na prakseri, èn a de a Gado fu waarheid. Fu di Yehovah na a Moro Hei Tiriman, dati meki wi alamala musu sori lespeki gi en nen èn gi san a nen dati wani taki, èn wi musu gi yesi na En. Disi de prenspari fu meki vrede de na ini hemel nanga grontapu èn fu meki sani waka bun.

4. San Yehovah ben abi na prakseri nanga grontapu?

⁴ Baka di Yehovah ben meki Adam nanga Efa, dan A ben gi den wan wroko fu du. A ben sori krin taki a no ben abi na prakseri nomo fu tiri heri grontapu èn fu meki a tron wan Paradijs, ma a ben wani tu taki grontapu kon furu nanga den pikin fu den (Genesis 1:28). A de so taki den sani disi no ben o pasa moro fu di den sondu? A ben o de wan syen srefisrefi gi a nen fu na almakti Yehovah efu a no ben man du den sani di a ben abi na prakseri nanga grontapu èn nanga libisma!

5. (a) O ten den fosi tu libisma ben o dede efu den ben nyan fu a bon fu sabi bun nanga ogri? (b) Fa Yehovah meki den wortu fu en na Genesis 2:17 kon tru, èn san a ben du so taki a sani di a ben abi prakseri nanga grontapu ben kan go doro?

⁵ Yehovah ben warskow Adam nanga Efa taki efu den no ben gi yesi na en, èn efu den ben nyan fu a bon fu  sabi bun nanga ogri, dan den ben o dede „na a dei” di den ben nyan fu a bon (Genesis 2:17). Soleki fa Yehovah ben taki, dan tapu a srefi dei di den sondu a ben meki den gi frantwortu fu na ogri di den ben du, èn a ben leisi krutu gi den taki den ben o kisi dedestrafu. Te wi e luku a fasi fa Gado e si sani, dan Adam nanga Efa dede a dei dati. Ma Yehovah gi pasi taki den kisi pikin bifo den dede, so taki a sani di a ben abi na prakseri nanga grontapu ben kan go doro. Ma toku, fu di Gado kan si 1000 yari leki wán dei, èn Adam dede di a ben abi 930 yari, dati meki wi kan taki dati Adam dede na a srefi „dei” dati (2 Petrus 3:8; Genesis 5:3-5). Yehovah du soleki fa a ben taki èn na so fasi a hori a nen fu en hei, fu di a krutu Adam nanga Efa trutru tapu a dei di den ben sondu. Èn aladi den dede, toku a ben abi a srefi prakseri ete nanga grontapu. Ma Gado gi pasi taki sondu sma, sosrefi ogri sma, tan libi fu wan pisi ten.

6, 7. (a) Fu san ede Yehovah e meki ogri sma tan fu wan pisi ten, soleki fa Exodus 9:15, 16 e sori? (b) Fa Yehovah ben sori Farao a makti fu en, èn fa sma na ala sei ben kon sabi En nen? (c) San o de a bakapisi te wan kaba sa kon na a ogri seti fu now?

⁶ Wan tra sani di e sori fu san ede Gado meki ogri sma tan na libi, na a sani di Yehovah ben taigi a tiriman fu Egepte na ini a ten fu Moses. Di Farao no ben wani seni den manpikin fu Israel gowe fu Egepte, dan Yehovah no ben kiri en wantewante. Yehovah ben seni tin plaag kon tapu a kondre, èn na so wan fasi a ben sori a krakti fu en na wan tumusi wondru fasi. Di Yehovah ben warskow Farao gi a di fu seibi plaag, dan A taigi Farao taki a ben kan figi Farao nanga en pipel puru fu grontapu wantewante. „Ma fu taki en leti”, na so Yehovah ben taki, „na fu a sani disi ede meki mi meki yu tan na libi, fu sori yu  mi krakti èn fu meki mi nen bekènti na heri grontapu.”​—Exodus 9:15, 16.

⁷ Di Yehovah frulusu den Israelsma, dan sma na ala sei ben kon sabi a nen fu en trutru soleki fa a ben taki (Yosua 2:1, 9-11). Now, sowan 3500 yari baka dati, sma no frigiti a sani di Yehovah ben du na a ten dati. A no de so nomo taki sma ben kon sabi a nen Yehovah, ma den ben kon sabi a waarheid tu fu a Sma di e tyari a nen dati. Disi ben sori krin taki Yehovah na a Gado di e du ala ten san a e pramisi èn taki a e yepi den futuboi fu en (Yosua 23:14). A sani dati ben sori tu taki fu di a abi ala makti, meki nowan sani kan tapu en fu du san a abi na prakseri (Yesaya 14:24, 27). Fu dati ede wi kan abi na overtoigi taki dyonsro Yehovah sa yepi den getrow futuboi fu en, fu di a sa pori a heri ogri seti fu Satan. Sma noiti no sa frigiti a fasi fa Yehovah gebroiki a makti fu en, èn a sani dati sa meki a nen fu en kon bigi. Disi sa tyari wini kon fu têgo.​—Esekièl 38:23; Openbaring 19:1, 2.

’O fa Gado abi bun furu koni!’

8. Na sortu sani Paulus wani taki wi musu poti prakseri?

⁸ Na ini a brifi di na apostel Paulus ben seni gi den Romesma, a e poti wan aksi: „Kruktudu de na Gado?” A e piki na wan krakti fasi: „Dati no musu pasa noiti!” Baka dati a e poti krakti tapu a sari-ati fu Gado, èn a e taki den wortu fu Yehovah di e sori fu san ede a meki Farao libi pikinso moro langa. Paulus ben sori tu taki libisma de neleki kleidoti na ini na anu fu wan patu-bakriman. Dan a e taki: „Gado wani sori taki a e atibron trutru èn a wani meki sma kon sabi a krakti fu en èn fu di a abi langa pasensi meki a ben frudrage den patu fu a bigi atibron di poti na wan sei fu broko den; na so fasi a ben  kan meki sma kon sabi a bigi glori di a o gi den patu fu sari-ati; den patu disi a sreka na fesi fu gi den glori; we, wi na den patu di a teki puru na mindri den Dyu, ma sosrefi tu na mindri den trakondre sma; we, a du a sani disi, dan san dan?”​—Romesma 9:14-24.

9. (a) Suma na den „patu fu a bigi atibron di poti na wan sei fu broko den”? (b) Na sortu fasi Yehovah sori langa pasensi gi den gensman fu en, èn fa disi sa abi bun bakapisi gi den wan di lobi en?

⁹ Sensi a ten di Adam nanga Efa opo densrefi teige Yehovah na ini Eden, dan ala sma di de teige Yehovah èn teige den wet fu en, na „patu fu a bigi atibron di poti na wan sei fu broko den”. A heri pisi ten dati teleki now, Yehovah sori langa pasensi. Den ogri sma spotu den sani di Gado du, den frufolgu den futuboi fu En, èn den kiri en Manpikin srefi. Fu di Yehovah abi furu pasensi, meki a gi ala sma na okasi fu si krinkrin san na a bakapisi te sma e opo densrefi teige Gado èn te libisma wani du sani sondro a tiri fu en. Na a srefi ten, a dede fu Yesus meki taki wan fasi kon de fu frulusu den libisma di e gi yesi na en, èn fu „broko den wroko fu Didibri”.​—1 Yohanes 3:8; Hebrewsma 2:14, 15.

10. Fu san ede Yehovah frudrage den ogri sma 1900 yari kaba?

¹⁰ Moro leki 1900 yari sensi a ten di Yesus ben kisi wan opobaka, Yehovah frudrage den „patu fu a bigi atibron”. A no pori den ete. Fu san ede? Fu di Yehovah e sreka den sma di sa de nanga Yesus Krestes na ini en hemel Kownukondre. A grupu disi abi 144.000 sma, èn den sma disi na den „patu fu sari-ati” fu san na apostel Paulus ben e taki. Fosi, wan tu sma na mindri den Dyu ben e kisi a kari fu tron memre fu a grupu disi di sa libi na hemel. Bakaten, Gado gi sma fu tra kondre  a kari dati. Yehovah no dwengi nowan fu den sma disi fu dini en. Yehovah gi sonwan fu den sma di sori warderi gi den sani di A seti na wan lobi-ati fasi, a grani fu tron tiriman makandra nanga en Manpikin na ini a hemel Kownukondre. Pikinmoro ala sma fu a hemel grupu disi de kaba.​—Lukas 22:29; Openbaring 14:1-4.

11. (a) Sortu grupu e kisi wini now fu a langa pasensi fu Yehovah? (b) Fa den dedewan sa kisi wini fu dati?

¹¹ Ma fa a de nanga grontapu? Libisma sa libi na en tapu? A langa pasensi fu Yehovah meki tu taki „wan bigi ipi” sma fu ala kondre kon makandra. Den de nanga milyunmilyun sma now. Yehovah pramisi taki a grupu disi di sa libi na grontapu, o pasa a kaba fu na ogri grontapu disi. Den sa abi a howpu tu fu libi fu têgo na ini wan paradijs grontapu (Openbaring 7:9, 10; Psalm 37:29; Yohanes 10:16). Ipi-ipi fu den sma di dede sa kisi wan opobaka te a ten fu Gado doro, èn den sa kisi na okasi fu libi na grontapu na ondro a tiri fu a hemel Kownukondre. Gado Wortu e taki na fesi na ini Tori fu den Apostel 24:15: „Wan opobaka o de fu den regtfardikiwan nanga den onregtfardikiwan.”​—Yohanes 5:28, 29.

12. (a) San wi kon leri fu Yehovah fu di a gi pasi taki ogri de? (b) Fa yu e feni den sani di Yehovah du fu lusu den afersi disi?

¹² A de so taki Gado du sani na wan onregtfardiki fasi? Nôno. Fu di Gado no pori den ogri sma, noso den „patu fu a bigi atibron” ete, meki A e sori na so wan fasi taki a e firi sari trutru gi sma, èn dati e kruderi nanga a prakseri fu en. Disi e sori taki Gado abi furu sari-ati nanga sma èn taki a lobi den trutru. Boiti dati, wi kisi ten fu luku fa den prakseri fu Yehovah e kon tru, èn dati e leri wi furu fu Yehovah. Wi e fruwondru te wi e si den  difrenti fasi fu En, soleki retidu, sari-ati, langa pasensi, èn den furu difrenti fasi fa a e sori koni. Yehovah sori na wan trutru koni fasi taki na en abi a reti fu tiri ala sani. Disi sa buweisi fu ala ten taki a fasi fa a e tiri, na a moro bun fasi. Makandra nanga na apostel Paulus, wi e taki: „O, fa Gado abi bun furu gudu, nanga koni, nanga sabi! Wi no man frustan a krutu fu en èn wi no man kon sabi finifini pe den pasi fu en de!”​—Romesma 11:33.

Wi e kisi na okasi fu sori taki wi de getrow

13. Sortu okasi wi e kisi te pina e miti wi, èn san o yepi wi fu handri nanga koni?

¹³ Furu fu den futuboi fu Gado de na ini situwâsi di e meki den nyan pina. Pina e tan miti den fu di Gado no pori den ogri sma ete, èn a no tyari libisma kon baka na ini wan Paradijs ete soleki fa a ben taki na fesi. A sani disi musu meki wi lasi-ati? Nôno, wi musu si den sortu situwâsi disi leki okasi fu sori taki Didibri na wan leiman. Wi kan kisi deki-ati fu du dati te wi e hori a seryusu begi disi na prakseri: „Sori taki yu koni, mi manpikin, èn prisiri mi ati, so taki mi kan gi wan piki na a sma di e spotu mi” (Odo 27:11). Satan, a sma di e spotu Yehovah, ben taki dati efu sma e lasi den gudu fu den, noso efu den e siki, dan den sa taki dati Gado meki den ogri dati pasa, èn den sa fluku En srefi (Yob 1:9-11; 2:4, 5). Te wi e tan getrow na Yehovah awinsi sortu problema e miti wi, dan wi e sori taki Satan na wan leiman, èn na so wan fasi wi e prisiri na ati fu Yehovah.

14. Sortu wini wi kan kisi efu wi e frutrow tapu Yehovah te tesi e miti wi?

¹⁴ Efu wi e frutrow tapu Yehovah te tesi e miti wi, dan wi kan leri fu kisi furu moi fasi. Fu gi wan eksempre, den pina di ben e miti Yesus meki taki a „ben leri fu gi  yesi” na wan fasi di a no ben sabi noiti ete. Wi tu kan leri wan sani fu den tesi fu wi, fu di wi kan leri fu abi langa pasensi èn fu horidoro. Boiti dati, wi kan leri fu frustan a regtfardikifasi fu Yehovah moro bun èn fu abi moro warderi gi a fasi fa a e du sani.​—Hebrewsma 5:8, 9; 12:11; Yakobus 1:2-4.

15. Fa tra sma kan kisi wini te wi e tan horidoro ondro tesi?

¹⁵ Tra sma sa luku san wi e du. Te den sma disi e si san e miti wi fu di wi lobi regtfardikifasi, dan baka wan pisi ten dati kan meki den kon si krin suma na den tru Kresten na ini a ten disi. Èn te den sma disi e kon makandra  nanga wi fu anbegi Gado, dan densrefi kan kisi na okasi tu fu kisi den blesi fu têgo libi (Mateyus 25:34-36, 40, 46). Yehovah nanga en Manpikin wani taki sma e kisi na okasi disi.

16. Fa wi musu si den problema fu wi, èn san disi abi fu du nanga wánfasi?

¹⁶ A de wan bun sani srefisrefi te wi e si muilek situwâsi leki wan okasi fu sori taki wi de getrow na Yehovah èn taki wi wani du a wani fu En! Te wi e du disi, dan dati kan sori taki wi wani de wán nanga Gado èn nanga Krestes trutru. Yesus ben e begi Yehovah gi ala tru Kresten, di a ben taki: „Mi no e begi yu gi den [den disipel fu en di ben de furu nanga en] wawan, ma mi e begi yu sosrefi gi den wan di e sori bribi ini mi fu den sani ede di den e taki; dan den alamala kan de wán, neleki fa yu, mi Tata, de wán nanga mi èn mi de wán nanga yu, so taki den kan de wán nanga wi tu.”​—Yohanes 17:20, 21.

17. Sortu dyaranti wi kan abi te wi de getrow na Yehovah?

¹⁷ Te wi de getrow na Yehovah, dan a sa pai wi bogobogo. A Wortu fu en e taki: „Un musu tanapu kánkan. No degedege. Ala ten un musu abi furu fu du na ini a wroko fu Masra, fu di unu sabi taki a wroko di unu e du gi Masra no de fu soso” (1 Korentesma 15:58). A e taki sosrefi: „Gado no de onregtfardiki, so taki a sa frigiti a wroko fu unu èn a lobi di unu ben sori gi a nen fu en” (Hebrewsma 6:10). Yakobus 5:11 e taki: „Luku! Wi e taki dati den sma di horidoro de koloku. Unu yere taki Yob ben horidoro èn unu si fa Yehovah ben meki sani waka, taki Yehovah lobi sma trutru èn taki a abi sari-ati.” San ben de a bakapisi fu di Yob horidoro? „Fu a sei fu Yehovah, a ben blesi a kaba fu Yob bakaten moro leki a bigin fu en” (Yob 42:10-16). Iya, Yehovah na „a sma di e pai  den wan di e suku en fayafaya” (Hebrewsma 11:6). Èn wi kan fruwakti fu kisi wan moi sani trutru. Dati na têgo libi na ini wan paradijs grontapu!

18. San o pasa te fu kaba nanga den prakseri di e meki wi sari?

¹⁸ A Kownukondre tiri fu Gado sa tyari wan kaba kon na ala den ogri di libisma ondrofeni na ini den dusundusun yari di pasa, èn a sa meki ala sani kon bun baka. Den blesi di wi sa kisi na a ten dati sa de so furu, taki den o pasa ala den pina di e miti wi now. Wi no sa memre den takru sani moro di ben miti wi fosi. Na ini a nyun grontapu, wi sa prakseri fu sani di e gi wi trowstu èn wi sa du sani di e gi wi prisiri. Safrisafri den sani disi sa puru den prakseri di e gi wi sari. Yehovah e taki: „Mi e meki nyun hemel [wan nyun Kownukondre na hemel di sa tiri libisma] nanga wan nyun grontapu [wan libimakandra fu regtfardiki sma]; èn sma no sa memre den sani fu fositen moro, èn den no sa kon na ini na ati tu. Ma unu breiti pasa marki èn de nanga prisiri fu têgo fu den sani di mi e meki.” Iya, na ini a nyun grontapu fu Yehovah, den regtfardiki sma sa man taki: „Heri grontapu kon de na ini rostu, a kon fri fu bruya. Sma e prisiri nanga prisiri babari.”​—Yesaya 14:7; 65:17, 18.

Takimakandra fu luku baka san wi leri

• Fa Yehovah sori na wan moi fasi taki a e hori en eigi nen hei, aladi a gi pasi taki ogri de?

• Fa Gado sori sari-ati gi wi, fu di a meki den „patu fu a bigi atibron” de te now ete?

• Fa wi musu pruberi fu si den situwâsi di e meki wi nyan pina?

[Aksi fu a tori disi]

[Prenki na tapu bladzijde 67]

Yehovah „ben blesi a kaba fu Yob bakaten moro leki a bigin fu en”