Kapitel 18

’A kaba foe grontapoe’ de krosibei!

1. Fa den bakaman foe Krestes na grontapoe ben sa sabi o ten a ben bigin foe tiri na hemel?

DI JESUS KRESTES ben trowe Satan nanga den engel foe en komoto na hemel èn ben bigin nanga en Kownoekondre tiri, dan disi ben wani taki, dati a kaba foe Satan nanga en ogri seti ben de krosibei (Openbaring 12:7-12). Ma fa den bakaman foe Krestes na grontapoe ben kan sabi taki a sani disi di ben pasa na hemel èn di den no ben kan si nanga den ai, ben feni presi? Fa den ben kan sabi taki Krestes ben de noja ini Kownoekondre makti, sondro foe den ben kan si dati nanga den ai, èn taki „a kaba foe grontapoe” ben de krosibei? Den ben kan sabi disi te den ben o ondrosoekoe foe si efoe a „marki” di Jesus ben gi, ben kon troe.

2. Sortoe aksi den disipel foe Krestes ben aksi en?

² Sjatoe bifo Jesus dede, ala di a ben sidon na tapoe na Olijfbergi, dan fo foe den apostel foe en ben kon na en foe aksi en wan „marki”. Foeroe sma ben leisi na aksi dati ini a Njoe Testament Nanga dem Psalm na a fasi disi: „Taki gi wi, hoetem dati sa kom? En hoe marki sa meki soema kom sabi da joeroe, disi joe sa kom baka, en disi heeli grontapo sa kaba?” (Mateus 24:3) Ma san den wortoe disi, „joe sa kom baka” nanga „disi heeli grontapo sa kaba”, wani taki troetroe?

3. (a) San den wortoe „joe sa kom baka” nanga „disi heeli grontapo sa kaba” wani taki troetroe? (b) Fa na aksi di Krestes disipel ben aksi, ben poti abra na a joisti fasi?

³ A Griki wortoe di poti abra djaso nanga „kon”, na parousia èn a wani taki „denoja”. So boen, te sma e si a „marki”, dan disi wani taki, dati wi ben sa sabi taki Krestes, ala di wi no kan si en, de noja, dati a kon kaba ini Kownoekondre makti. Den wortoe „kaba foe grontapoe” kan kori wan sma toe. Den wortoe no wani taki a kaba foe a gron, ma, na presi foe dati, a kaba foe a seti foe sani foe Satan (2 Korentesma 4:4). Foe taki en na wan soifri fasi foe dati ede, dan den apostel ben  aksi: „Taigi wi: O ten den sani disi sa de, èn san sa de a marki foe joe denoja èn foe a bosroiti foe a seti foe sani?” — Mateus 24:3, New World Translation.

4. (a) San na „a marki” di Jesus ben gi? (b) Na sortoe fasi wi kan teki „a marki” gersi nanga wan finga-marki?

⁴ Jesus no ben froeteri taki soso wán sani di ben sa pasa ben sa de leki „a marki”. A ben taki foe foeroe sani di ben o pasa èn fasi fa sani ben o de. Boiti Mateus, dan tra bijbel skrifiman ben froeteri foe tra sani di ben o pasa èn di ben o marki den „lasti dei”. Ala den sani disi di ben taki na fesi, ben o pasa na ini a ten di den bijbel skrifiman ben kari den „lasti dei” (2 Timoteus 3:1-5; 2 Petrus 3:3, 4). Den sani disi di ben o pasa, ben o de leki den difrenti lin di e meki a finga-marki foe wan sma, wan marki di no kan de foe no wan tra sma. Den „lasti dei” abi den eigi model foe marki, noso sani di ben o pasa. Den sani disi de wan positief „finga-marki” di no kan de foe no wan tra pisi ten.

5, 6. San joe e froestan foe „a bosroiti foe a seti foe sani” te joe loekoe den 11 boeweisi foe den „lasti dei” na den tra bladzijde?

⁵ Na ini kapitel 16 foe a boekoe disi, wi ben loekoe bijbel boeweisi di e sori taki Krestes ben kon baka èn ben bigin tiri na mindri den feanti foe en na ini a jari 1914. Loekoe now finifini den difrenti pisi foe „a marki” foe a denoja foe Krestes èn tra boeweisi foe den „lasti dei” foe na ogri seti foe sani foe Satan. Te joe e loekoe den sani disi di ben taki na fesi, èn di de foe feni na den fo bladzijde di e kon now, dan loekoe fa den kon troe sensi 1914.

 „NÂSI SA OPO GO FETI NANGA NÂSI ÈN KOWNOEKONDRE NANGA KOWNOEKONDRE.” — Mateus 24:7.

Seiker joe ben si fa a pisi disi foe a „marki” e kon troe sensi 1914! Na ini a jari dati a Fosi Grontapoefeti ben bigin. Noiti ete na ini a historia so wan kefalek ogri feti ben de. A ben de wan feti pe ala sma ben de na ini. A Fosi Grontapoefeti ben bigi moro leki ala den bigi feti di ben feti ini den 2400 jari bifo 1914. Tokoe, soso 21 jari baka a kaba foe a feti dati, a di foe Toe Grontapoefeti ben bigin. A ben pori sani fo tron moro foeroe leki a Fosi Grontapoefeti.

Te now ete kefalek ogri feti e feti. Foe sensi a di foe Toe Grontapoefeti ben kon na wan kaba na ini 1945, den ben kiri moro leki 25 miljoen sma ini so wan 150 feti di ben feti na heri grontapoe. Ibri dei joe ben abi gemiddeld 12 feti di ben e feti na wan presi na grontapoe. Èn dan joe abi ete taki ala ten a kefar de foe wan tra grontapoefeti. Den Verenigde Staten foe Amerkankondre wawan abi nofo kern-fetisani foe kiri ibri man, oema nanga pikin na grontapoe 12 tron!

’MANKERI FOE NJANJAN SA DE.’ — Mateus 24:7.

Baka a Fosi Grontapoefeti joe ben abi a moro bigi angriten na ini a heri historia. Na a noordsei foe Sneisikondre wawan, 15.000 sma dede foe angri ibri dei. Ma a mankeri foe njanjan ben moro bigi srefi baka a di foe Toe Grontapoefeti. Na a ten dati wan di foe fo pisi foe grontapoe ben e pina foe angri! Èn sensi a ten dati, foeroe sma na grontapoe no abi nofo foe njan.

„Ibri 8,6 sekonde wan sma dede na wan pôti kondre, leki wan bakapisi foe siki di e kon foe di den no e njan boen noso no abi nofo njanjan”, na so a koranti New York Times ben skrifi na ini 1967. Te now ete miljoenmiljoen sma dede foe angri — so wan 50 miljoen na ini wan jari! Ini 1980, so wan sani foe wan di foe fo pisi foe den sma na grontapoe (1.000.000.000 sma) ben pina foe angri, foe di den no ben kan kisi nofo foe njan. Srefi ini presi pe njanjan de pasa marki, joe abi foeroe sma di pôti toemoesi foe bai njanjan.

 „NA A WAN PRESI BAKA A TRAWAN PESTSIKI.” — Lukas 21:11.

Leti baka a Fosi Grontapoefeti a Spanjoro Griep ben kiri moro sma leki iniwan tra pestsiki na ini a historia foe a libisma famiri. Ala nanga ala so wan 21 miljoen sma dede! Ma pestsiki nanga siki e tan go doro. Atisiki nanga kanker e kiri miljoenmiljoen sma ibri jari. Siki na a sjenpresi e panja esi-esi. Tra kefalek ogri siki soleki malaria, bilharzia nanga brenisiki foe liba e opo ede kon na a wan kondre baka a trawan, spesroetoe na Asia, Afrika nanga Latino-Amerika.

„NA A WAN PRESI BAKA A TRAWAN . . . GRONSEKI SA DE.” — Mateus 24:7.

Foe sensi 1914 te go miti now, moro foeroe bigi gronseki ben de leki na iniwan tra srefi sortoe pisi ten na ini a historia di den ben skrifi poti na boekoe. Na ini moro leki 1000 jari, sensi a jari 856 G.T. te go miti 1914, soso 24 bigi gronseki ben de, di ben meki so wan 1.973.000 sma dede. Ma na ini den 63 jari foe 1915 te go miti 1978, so wan 1.600.000 sma dede ini 43 bigi gronseki.

„KROEKTOEDOE SA KON MORO FOEROE.” — Mateus 24:12.

Foe ala pisi foe grontapoe, njoensoe e kon taki kroektoedoe nanga takroedoe e kon moro foeroe. Takroedoe di doe nanga tranga, soleki kiri sma, go didon na wan oema nanga tranga, nanga foefoeroe e kon dei foe dei moro foeroe. Na ini den Verenigde Staten foe Amerkankondre wawan, so wan ibri sekonde wan bigi takroedoe e feni presi. Na foeroe presi, no wan sma e firi taki den de fri foe ogri na strati, srefi no na deiten. Te neti, sma e tan na den oso baka sroto doro, di den poti sani na baka, bika den frede foe go na dorosei.

 „KEFALEK OGRI SANI SA DE FOE SI.” — Lukas 21:11.

Kande frede na a moro bigi, aparti firi na ini a libi foe sma na ini a ten disi. No langa baka di den fosi atonbom soetoe, na aton-sabidensiman Harold C. Urey ben taki: „Wi sa njan ini frede, sribi ini frede, libi ini frede èn dede ini frede.” Na disi e pasa nanga wan bigi pisi foe a libisma famiri. Èn disi no de so nomo foe di ala ten a kefar de taki wan feti nanga kern-fetisani kan kon. Sma e frede toe foe takroedoe, a doti di sma e doti grontapoe, siki, a lasi di moni e lasi en waarde èn foeroe tra sani di e meki a seikerfasi foe den nanga srefi a libi foe den kon ini kefar.

„TRANGAJESI NA PAPA NANGA MAMA.” — 2 Timoteus 3:2.

Nofotron papa nanga mama na ini a ten disi abi moeiti foe basi den pikin foe den. Jongoe sma e opo densrefi teige ibri sortoe foe makti. Dati meki ibri kondre na grontapoe abi foe doe nanga a plaag foe takroedoe foe jongoe sma. Na son kondre, pikin foe 10 te go miti 17 jari e doe moro leki afoe foe ala bigi takroedoe. Kiri sma, go didon na wan oema nanga tranga, ròs sma, foefoeroe, broko sma oso, foefoeroe oto — ala den sani disi pikin-nengre e doe. Noiti ete na ini a historia a trangajesi di pikin e trangajesi papa nanga mama ben de so wan aladei sani.

„SMA SA . . . LOBI MONI.” — 2 Timoteus 3:2.

Awinsi pe joe e loekoe na ini a ten disi, joe kan si fa sma e doe sani di e sori taki den abi bigi-ai. Foeroe sma sa doe pikinmoro ala sani foe moni ede. Den sa foefoeroe noso sa kiri sma srefi. A de wan aladei sani taki sma di abi bigi-ai e meki èn e seri sani di, soleki fa sma sabi, e siki tra sma noso e kiri den na a wan noso tra fasi. A kan de na fesi foe ala sma, noso nanga a fasi fa den e libi, taki sma e taki foe moni: ’Disi na mi gado.’

 „DEN LOBI PRISIRI MORO LEKI DEN LOBI GADO.” — 2 Timoteus 3:4.

Moro foeroe sma na ini a ten disi e prakseri soso foe doe san e plisi densrefi noso den osofamiri foe den, no san e plisi Gado. Foeroe sma lobi spesroetoe san Gado no e feni boen, soleki hoeroedoe, soetadoe, droengoe, fowtoe gebroiki foe drug, nanga tra sani di no nanga reti den e kari prisiri. Srefi prisiri di kan de boen gi a gosontoe, den e si moro prenspari leki ibri moeiti foe leri sabi Gado èn dini en.

„DI ABI WAN FASI FOE A GI DI DEN E GI DENSREFI INI A DINI FOE GADO, MA E SORI TAKI DEN NO ABI A KRAKTI FOE DATI.” — 2 Timoteus 3:5.

Fesiman foe grontapoe nanga tra gewoon sma e sori nofotron na dorosei taki den lobi dini Gado. Kande den e go na kerki èn e gi moni na relisi afersi. Den sma di e tiri kondre e poti den anoe na tapoe wan bijbel te den e teki a tiriman-wroko foe den. Ma nofotron a de soso „wan fasi foe a gi di den e gi densrefi ini a dini foe Gado”. Neleki fa bijbel ben taki na fesi, dan na ini a ten disi a troe anbegi foe Gado no de troetroe wan krakti ini a libi foe moro foeroe sma. Wan troetroe krakti foe doe boen no e boeweigi den.

„E PORI GRONTAPOE.” — Openbaring 11:18.

A loktoe di wi e hari blo teki, a watra di wi e dringi, nanga a gron pe wi e prani wi njanjan, e kon doti. A sani de so serjoesoe, taki a sabidensiman Barry Commoner ben warskow: „Mi e bribi taki efoe skotoe no poti na a tan di sma e tan doti grontapoe, dan a planeiti disi te foe kaba no sa boen moro leki wan presi pe libisma kan libi.”

 ⁶ Baka di joe loekoe den sani di taki djaso na fesi, a no de krin taki „a marki” di Krestes ben gi èn den sani di den disipel foe en ben taki na fesi, e kon troe nownow kaba? Ala di foeroe tra boeweisi de, tokoe den wan di kari djaso moesoe de nofo foe sori taki wi e libi troetroe na ini a ten di bijbel ben taki foe en na fesi leki den „lasti dei”.

7. (a) San e meki den bijbel profeititori di abi foe doe nanga a denoja foe Krestes nanga den „lasti dei”, so aparti? (b) Tra fasi leki san bijbel ben taki na fesi, san fesiman foe grontapoe ben taki na fesi leti bifo 1914?

⁷ Tokoe kande son sma sa taki: ’Na ini a heri historia joe ben abi foeroetron sani leki feti, angriten, pestsiki nanga gronseki. So boen, a no ben sa de moeilek foe taki na fesi taki den ben sa pasa agen.’ Ma prakseri pikinso: Bijbel no ben taki na fesi foe den sani disi nomo, ma ben sori taki den ben sa pasa na heri grontapoe. Boiti dati, bijbel ben taki toe taki ala den sani disi ben sa kon na tapoe a geslakti di ben libi na ini 1914. Ma san prenspari fesiman foe grontapoe ben taki na fesi leti bifo 1914? Den ben taki dati den fasi fa sani ben de, èn di ben gi howpoe tapoe grontapoe vrede, noiti ete ben de so moi. Tokoe, den kefalek ogri problema di bijbel ben taki na fesi foe den, ben bigin na a joisti ten, na ini 1914! Now den fesiman foe grontapoe e taki srefi, dati 1914 ben de wan ten pe wan kenki ben kon na ini historia.

8. (a) Sortoe geslakti, soleki fa Jesus ben sori, ben sa si a kaba foe a seti foe sani disi? (b) So boen, foe san wi kan de seiker?

⁸ Baka di Jesus ben poti prakseri tapoe foeroe sani di marki a pisi ten di ben bigin na ini 1914, a ben taki: „A geslakti disi no sa pasa kwetikweti te leki ala den sani disi [a kaba foe a seti disi de na ini toe] pasa” (Mateus 24:34, 14). Foe sortoe geslakti Jesus ben taki dja? A ben taki foe a geslakti foe libisma di ben e libi na ini 1914. Den sma foe a geslakti dati, di de na libi ete, kon owroe srefisrefi now. Ma sonwan foe den sa de na libi ete foe si a kaba foe na ogri seti disi. So boen, wi kan de seiker foe a sani disi: Now, heri esi wan kaba sa kon wantronso na ala ogridoe èn na ala ogri sma ini Armagedon.

[Aksi foe a tori disi]

[Prenki na tapoe bladzijde 149]

Jesus ben froeteri den disipel foe en san ben sa de a boeweisi di wi kan si foe en denoja ini Kownoekondre makti di wi no kan si

[Prenki na tapoe bladzijde 154]

1914 — ARMAGEDON

Sonwan foe a geslakti di ben e libi na ini 1914, sa si a kaba foe a seti foe sani èn sa pasa en libilibi