Foe san ede Gado gi pasi meki ogridoe de?
Kapitel 11
Foe san ede Gado gi pasi meki ogridoe de?
1. (a) Fa sani de now na grontapoe? (b) San son sma e taki leki wan kragi?
AWINSI PE joe e loekoe na grontapoe, takroedoe, a si di sma no wani si makandra na ai, nanga problema de. Foeroetron na den sma di no doe noti e pina. Son sma e gi Gado a fowtoe. Kande den e taki: ’Efoe wan Gado de, foe san ede a e gi pasi meki ala den kefalek ogri sani disi e pasa?’
2. (a) Soema e doe ogri sani? (b) Fa foeroe foe a pina na grontapoe no ben abi foe de?
2 Ma soema e doe ala den ogri sani disi na trawan? Na libisma, no Gado. Gado e kroetoe ogridoe. Te joe loekoe en boen, dan foeroe foe a pina na grontapoe no ben abi foe de, efoe libisma ben gi jesi na den wet foe Gado. A e komanderi wi foe sori lobi. A no wani foe sma kiri trawan, foefoeroe, doe hoeroedoe, abi bigi-ai, droengoe èn doe tra ogri di e meki sma pina (Romesma 13:9; Efeisesma 5:3, 18). Gado ben meki Adam nanga Eva nanga wan toemoesi moi edetonton nanga skin èn nanga a krakti foe man njan boen foe a libi dorodoro. A no ben wani noiti taki den, noso den pikin foe den, ben moesoe pina noso kisi problema.
3. (a) Soema de frantiwortoe foe ogridoe? (b) San e sori taki Adam nanga Eva ben kan kakafoetoe gi den tesi foe Satan?
3 Na Satan Didibri ben bigin nanga ogridoe na grontapoe. Ma Adam nanga Eva ben abi fowtoe toe. Den no ben de so swaki, taki den no ben kan kakafoetoe, di Didibri ben tesi den. Den ben kan taigi Satan foe „komoto gowe”, neleki fa a volmaakti libisma Jesus ben doe dati baka ten (Mateus 4:10). Ma den no ben doe dati. Leki wan bakapisi foe dati, den ben kon de onvolmaakti. Ala den pikin foe den, wi toe, kisi na onvolmaaktifasi dati, di ben tjari siki, sari nanga dede kon (Romesma 5:12). Ma foe san ede Gado gi pasi meki pina e go doro?
4. San e jepi wi foe froestan taki wan lobi-ati Gado ben sa gi pasi meki ogridoe de foe wan pisi ten?
4 A fosi sani di wan sma kan denki, na taki Gado no ben kan abi no wan sani, di prenspari nofo, foe san ede a gi pasi meki ala pina kon di libisma ben ondrofeni ini den jarihondro di pasa. Ma, a joisti foe kon na a bosroiti dati? A no de so, taki papa nanga mama di lobi den pikin foe den troetroe, ben gi pasi meki datra doe wan operâsi gi den, di e gi foeroe skin-ati, soso foe poeroe wan problema na pasi? Ija, a primisi di gi foe njan pina foe wan pisi ten, nofotron ben meki taki den pikin ben kan abi wan moro boen gosontoe na ini a libi baka ten. Sortoe boen ben kon foe di Gado ben gi pasi meki ogridoe de?
WAN PRENSPARI STREI DI MOESOE LOESOE
5. (a) Fa Satan ben taki teige Gado? (b) San Satan ben pramisi Eva?
5 Na opo di sma ben opo densrefi teige Gado na ini a djari foe Eden, ben tjari wan prenspari strei noso aksi kon na fesi. Wi moesoe ondrosoekoe en foe froestan foe san ede Gado gi pasi meki ogridoe de. Jehovah ben taigi Adam foe no njan foe wan seiker bon na ini a djari. Efoe Adam ben sa doe dati, san ben sa pasa dan? Gado ben taki: „Joe sa dede nomonomo” (Genesis 2:17). Ma Satan ben taki joisti heri tra fasi.A ben taigi a wefi foe Adam, Eva, foe njan foe a bon di den no ben mag njan. „Oenoe no sa dede kwetikweti”, Satan ben taki. Boiti foe dati a ben froeteri Eva: „Bikasi Gado sabi taki na a dei ete di oenoe sa njan foe en, seiker oen ai sa kon opo èn seiker oenoe sa de leki Gado, sabi boen nanga ogri.” — Genesis 3:1-5.
6. (a) Foe san ede Eva ben trangajesi Gado? (b) San a ben wani taki foe njan foe a bon di den no ben mag njan foe en?
6 Eva ben trangajesi Gado èn ben njan. Foe san ede? Eva ben bribi Satan. A ben prakseri ensrefi nomo, taki a ben sa abi wini efoe a ben trangajesi Gado. A ben prakseri-go-prakseri-kon, taki en, noso Adam, no ben sa abi foe gi Gado frantiwortoe moro. Den no ben sa abi foe saka densrefi moro langa na ondro den wet foe en. Densrefi ben kan bosroiti san na „boen” èn san na „ogri”. Adam ben teki a sei foe Eva èn ben njan toe. Wan foetoewortoe na ini The Jerusalem Bible e taki foe a fosi sondoe foe libisma na Gado: „A abi foe doe nanga a makti di wan sma abi, foe bosroiti gi ensrefi san na boen èn san na ogri èn foe handri tapoe a fondamenti foe dati, wan reti di a taki a abi tapoe moreel srefidensi dorodoro . . . A fosi sondoe ben de wan doe foe feti a soevereiniteit foe Gado.” Nanga tra wortoe, a ben de wan doe foe feti a reti di Gado abi foe de a wan-enkri tiriman noso edeman foe libisma.
7. (a) Sortoe strei ben kon na fesi nanga a trangajesi di libisma ben trangajesi? (b) Tapoe sortoe aksi wan piki moesoe gi ini a tori foe a strei disi?
7 So boen, foe di Adam nanga Eva ben njan a froktoe di den no ben mag njan, dan den ben hari densrefi poeroe na ondro a tiri foe Gado. Den ben go den eigi pasi, doe san ben „boen” noso „ogri” na ini den eigi ai. So boen, a prenspari strei di ben kon na fesi, ben de: Gado abi a reti foe de a wan-enkri tiriman foe a libisma famiri? Nanga tra wortoe, na Jehovah abi a reti foe taki san boen noso san ogri gi libisma? Na En moesoe taki san na wan joisti fasi foe libi èn san a no wan joisti fasi foe libi? Noso libisma kan doe en moro boen te den e tiri densrefi? Soema fasi foe tiri na a moro boen-wan? Libisma kan tiri meki sani waka boen na ondro a tiri foe Satan, di wi no kan si, sondro foe den saka densrefi na ondro a tiri foe Jehovah? Noso a tiri foe Gado de fanowdoe foe opo wan regtfardiki tiri di sa tjari vrede di e tan, kon na grontapoe? Ala den aksi disi ben kon na fesi ini a doe disi foe feti a soevereiniteit foe Gado, a reti foe en foe de a wan-enkri tiriman nomo foe a libisma famiri.
8. Foe san ede Jehovah no ben pori den oproeroeman wantewante?
8 A no de foe taki, dati Jehovah ben kan kiri den dri oproeroeman so esi leki den ben bigin nanga na opo di den ben opo densrefi teige en. A no wan sani foe degedege, taki Jehovah ben moro tranga leki Satan noso Adam nanga Eva. Ma efoe a ben kiri den poeroe, dan dati no ben sa loesoe a tori na a moro boen fasi. Foe eksempre, disi no ben sa gi piki tapoe na aksi efoe libisma ben kan tiri densrefi meki sani waka boen, sondro a jepi foe Gado. Dati meki Jehovah ben gi ten foe loesoe a prenspari strei di ben kon na fesi.
LOESOE A STREI
9, 10. San ben de den bakapisi, foe di libisma ben proeberi foe tiri densrefi sondro foe saka densrefi na ondro a tiri foe Gado?
9 San na a bakapisi, now di someni ten pasa kaba? We, san joe ben sa taki? Den 6000 jari historia di pasa, sori taki libisma kan tiri densrefi meki sani waka boen, sondro a tiri foe Gado? Libisma sorgoe gi wan boen tiri, di tjari blesi nanga kolokoe kon gi ala sma? Noso a de so, taki den historia tori sori taki den wortoe foe a profeiti Jeremia troe: „A no de na wan man di e waka, srefi foe poti en foetoe na pasi”? — Jeremia 10:23.
10 Ini a heri historia libisma ben proeberi ala sortoe fasi foe tiri wan kondre, ma no wan foe den tjari seikerfasi nanga troetroe kolokoe kon gi ala den sma di e libi na ondro a tiri foe den. Kande son sma sa sori tapoe den sani di e sori taki libisma go na fesi. Ma wan sma kan taki dati libisma go troetroe na fesi, te atonbom ben kon na ini a presi foe peiri nanga bo, èn te grontapoe e frede now srefisrefi gi wan tra grontapoefeti? Wi kan taki foe go na fesi, te sma kan waka na tapoe moenkenki, ma no kan libi ini vrede nanga makandra na grontapoe? Sortoe wini a abi efoe sma e bow oso di abi ala sortoe makriki njoen-ten sani, ala di problema e prati den osofamiri di e libi na ini den oso dati? Djoegoedjoegoe na ini den strati, goedoe nanga a libi foe sma di lasi, nanga a kroektoedoe di panja na ala sei, na sani foe meki bigi? Kwetikweti! Ma den sani disi na den bakapisi foe a proeberi di sma e proeberi foe tiri densrefi aparti foe Gado. — Odo 19:3.
11. So boen, soleki fa a de krin foe si, san libisma abi fanowdoe dan?
11 Den boeweisi moesoe de krin gi ala sma. Den moeiti foe libisma foe tiri ensrefi sondro foe anga foe Gado, no ben waka boen srefisrefi. Den abi leki bakapisi taki libisma e njan pina srefisrefi. „A wan libisma tiri a tra libisma nanga ogri bakapisi gi en”, bijbel e taki (Preikiman 8:9). A de krin taki libisma abi a tiri foe Gado fanowdoe foe tiri den afersi foe den. Neleki fa Gado ben meki libisma nanga a fanowdoe foe njan njanjan èn foe dringi watra, na so Gado ben meki libisma nanga a fanowdoe foe gi jesi na den wet foe en. Efoe libisma poti den wet foe Gado na wan sei, dan a sa kon ini problema, netso seiker leki fa a sa tjari takroe bakapisi gi en efoe a poti njanjan nanga watra di en skin abi fanowdoe, na wan sei. — Odo 3:5, 6.
FOE SAN EDE SO LANGA?
12. Foe san ede Gado gi so wan langa ten foe loesoe a strei?
12 Ma wan sma ben sa kan aksi: ’Foe san ede Gado gi someni ten, so wan 6000 jari now kaba, foe loesoe a strei disi? A strei no ben kan loesoe langa ten kaba na wan boen fasi?’ Nôno. Efoe Gado ben go na ini a tori langa ten kaba, dan sma ben kan taki dati libisma no ben kisi nofo ten foe proeberi den eigi fasi foe tiri. Ma soleki fa a tori de now, dan libisma kisi boen foeroe ten foe meki wan tiri kon, di ben sa sorgoe gi den fanowdoe foe ala den sma di de na en ondro, èn so srefi foe feni njoen sani nanga jepi foe sabidensi, di ben sa kan jepi taki sani waka boen gi ala sma. Libisma proeberi pikinmoro ala sortoe foe tiri na ini den jarihondro di pasa. Èn a go di den go na fesi na tapoe a kontren foe sabidensi, de foe si na ala sei. Den basi na aton èn ben frei go na moenkenki. Ma san ben de a bakapisi? A tjari wan toemoesi moi njoen seti kon leki blesi gi a libisma famiri?
13. (a) Fa sani de na ini a ten disi, ala di libisma go na fesi na tapoe a kontren foe sabidensi? (b) San disi e boeweisi krinkrin?
13 Fara foe dati! Na presi foe dati, moro sari nanga problema de na grontapoe leki oiti na fesi. Te joe loekoe en boen, dan takroedoe, a doti di sma e doti grontapoe, feti, osofamiri di panja, nanga tra problema doro so wan kefalek marki, taki sabidensiman e bribi taki a libi foe libisma de ini kefar. Ija, baka so wan 6000 jari ondrofeni di den abi ini a tiri di densrefi e tiri, èn baka di den doro wan heimarki ini a „go di den e go na fesi” ini sabidensi, dan a libisma famiri doro so fara taki a kan pori ensrefi! Fa a de krin taki, aparti foe Gado, libisma no kan tiri densrefi meki sani waka boen! Èn no wan sma kan kragi now toe, taki Gado no ben gi nofo ten foe loesoe a strei disi.
14. Foe san ede wi e kisi a tranga foe ondrosoekoe a tra prenspari strei di Satan ben tjari kon na fesi?
14 A no de foe taki, dati na foe boen ede Gado gi libisma pasi na ondro a tiri foe Satan, foe meki ogridoe kon, di de so langa kaba. Nanga na opo di Satan ben opo ensrefi teige Gado, dan a ben tjari ete wan strei kon na fesi, èn foe loesoe dati, ten ben de fanowdoe toe. Wan ondrosoekoe foe a strei dati sa jepi wi moro fara foe froestan foe san ede Gado gi pasi meki ogridoe de. Joe moesoe abi spesroetoe belangstelling gi a strei disi, foe di joesrefi de na ini.
[Aksi foe a tori disi]
[Prenki na tapoe bladzijde 100]
Na foe boen ede wan papa noso mama sa gi pasi taki wan lobi pikin kisi wan operâsi, di e gi foeroe skin-ati. Na foe boen ede toe Gado gi pasi meki libisma e pina foe wan pisi ten
[Prenki na tapoe bladzijde 101]
Foe di Adam nanga Eva ben njan a froktoe di den no ben mag njan, dan den ben hari densrefi poeroe na ondro a tiri foe Gado. Den ben bigin foe teki den eigi bosroiti ini a tori foe san ben boen noso ogri
[Prenki na tapoe bladzijde 103]
Neleki fa Gado ben meki libisma nanga a fanowdoe foe njan njanjan èn foe dringi watra, na so Gado ben meki libisma nanga a fanowdoe foe kisi tiri foe Gado
