Foe san ede wi de djaso na grontapoe
Kapitel 7
Foe san ede wi de djaso na grontapoe
1. Na sortoe bosroiti sma di e sidon denki sani, kon?
GRANWE libisma ben aksi densrefi san a libi na grontapoe wani taki. Den loekoe a kefalek bigi hemel di lai nanga stari. Den froewondroe foe den moi kloroe te son e dongo èn foe a moi di den boitipresi moi. Sma di e sidon denki sani, kon feni taki na foe wan prenspari sani ede meki ala den sani disi de. Ma foeroetron den aksi densrefi pe den e fiti ini a tori disi. — Psalm 8:3, 4.
2. Sortoe sani sma aksi densrefi?
2 Na wan seiker momenti ini a libi, dan moro foeroe sma e aksi densrefi: Wi moesoe libi soso wan sjatoe pisi ten, kisi someni leki wi man foe a libi, èn dan dede? Pe wi e go troetroe? Wi kan froewakti moro leki soso a sjatoe go-kon ala ten baka foe kon gebore, libi nanga dede? (Job 14:1, 2) A sani san sa jepi wi foe froestan a tori disi, na a piki tapoe na aksi: Fa wi doe kon djaso na grontapoe?
EVOLUTIE NOSO NA GADO MEKI SANI?
3. San na a evolutie leri?
3 Na ini son presi nofotron den e leri sma taki ibri sani di wi e si, ben kon gewoon foe ensrefi, taki a ben kon so maar. Na ini den foeroe miljoenmiljoen jari di pasa, na so sma e taki, dan a libi ben evolueer noso ben kenki safrisafri komoto foe lagi sortoe libisani, te leki a ben kon tron libisma te foe kaba. Na ini foeroe pisi foe grontapoe den e leri sma na evolutie theorie disi leki wan troe tori. Ma a troe, taki wi kon foe wan meti di ben gersi wan kesikesi, èn di ben libi miljoenmiljoen jari pasa kaba? A bigi universum disi ben kon so maar?
4. Foe san ede wi kan bribi taki ’Gado ben meki hemel nanga grontapoe’?
4 Bijbel e taki: „Na ini a bigin Gado ben meki hemel nanga grontapoe” (Genesis 1:1). Èn den troe tori foe sabidensi e agri, taki hemel nanga en miljardmiljard stari, nanga wi grontapoe ben abi wan bigin. Wan sma ben meki den. Den stari nanga den planeiti e boeweigi na so wan soifri fasi ini a pasi foe den, taki srefi jari na fesi sma kan sabi soifri èn sondro fowtoe, a presi pe den o de. Den stari nanga den planeiti e boeweigi na ini na universum akroederi den wet nanga gronprakseri foe wiskunde. Wan hei leriman foe wiskunde na a Heiskoro foe Cambridge, P. Dirac, ben taki ini a tijdschrift Scientific American: „Wan sma ben sa kan taki foe a fasi fa sani de, dati Gado na wan basi wiskundeman èn taki A ben gebroiki a moro hei wiskunde, di a ben meki na universum.”
5. Fa wi natoeroe skin e sori taki na Gado ben meki wi, na presi foe wi kon foe evolutie?
5 Bijbel e taki: „Sabi taki Jehovah na Gado. Na En na a sma di meki wi, èn no wi wisrefi” (Psalm 100:3). A libisma skin foe wi e sori taki a seti na so wan froewondroe fasi, taki wán bijbel skrifiman ben kisi a firi foe taigi Gado: „Mi sa prèise joe, foe di joe ben meki mi na wan froewondroe fasi di e gi frede. . . . Mi bonjo no ben kibri gi joe di joe ben meki mi na kibrifasi . . . Joe ai ben si srefi na embrio foe mi, èn na ini joe boekoe ala den pisi foe en ben skrifi poti” (Psalm 139:14-16). Wan beibi e gro na wan froewondroe fasi na ini a bere foe en mama. A tijdschrift Newsweek ben taki foe disi: „A de troetroe wan wondroe.” Dan a ben taki moro fara: „Nanga no wan enkri tèknik den kan sori soifri a prenspari momenti te wan oema e kisi bere. No wan sabidensiman kan taki sortoe wondroe krakti e bigin wroko na a momenti dati, foe meki den difrenti pisi foe a skin nanga den doesoendoesoen senwetitei foe wan libisma embrio gro.”
6. Foe san ede a de nanga reti foe bribi taki Gado ben meki sani, na presi foe bribi ini evolutie?
6 Prakseri pikinso foe a kefalek bigi universum foe wi, nanga wi eigi skin toe, di meki èn seti na so wan froewondroe fasi. Wan gosontoe fasi foe denki e froeteri wi taki den sani disi no evolueer noso kon foe densrefi. Den ben moesoe abi wan Sma di prakseri fa foe meki den, wan Mekiman. Loekoe tra sani pikinso di wi e si lontoe wi. Te joe de na joe oso, aksi joesrefi dan: Mi lampoe, bedi, stoeroe, tafra, den skotoe, noso srefi na oso srefi, ben evolueer? Noso a de so, taki den ben abi wan mekiman fanowdoe? A no de foe taki, dati sma di abi koni ben moesoe meki den! Fa wi ben sa kan taki dan, taki na universum foe wi di de moro dangra, èn wisrefi toe no ben abi wan mekiman fanowdoe? Èn efoe Gado ben poti wi djaso na grontapoe, dan seiker na foe wan sani ede meki a ben doe dati.
7. (a) Fa Jesus ben sori taki a ben bribi taki Gado ben meki sani? (b) Sortoe tra boeweisi de, taki Adam ben de wan troetroe sma?
7 Jesus Krestes srefi ben taki foe a fosi man nanga oema: „A Sma di ben meki den foe sensi a bigin, ben meki den leki man nanga oema èn ben taki: ’Dati meki wan man sa gowe libi en papa nanga en mama èn sa tai hori na en wefi, èn den toe sa de wán skin’” (Mateus 19:4, 5). Djaso Jesus ben teki wan pisi foe den wortoe foe Genesis 1:27 nanga 2:24, di e taki foe a meki di Gado ben meki Adam nanga Eva. Nanga disi a ben sori taki a bijbel tori disi de troe (Johanes 17:17). So srefi bijbel e kari Heinok „a di foe seibi man na ini a famirilin foe Adam” (Judas 14). Efoe Adam no ben de wan troetroe sma, dan bijbel no ben sa taki foe en na a spesroetoe fasi disi. — Lukas 3:37, 38.
8. Sortoe fasi foe si sani bijbel no e leri ini a tori foe a bigin foe libisma?
8 Son sma e taki dati Gado ben gebroiki a fasi fa evolutie e wroko foe meki libisma. Den e taki dati Gado ben gi pasi foe libisma evolueer èn di libisma ben doro wan spesroetoe penti, dan Gado ben poti wan sili na en ini. Ma wi no e feni a prakseri disi na no wan presi na ini bijbel. Na presi foe dati, bijbel e taki dati Gado ben meki prani nanga meti „akroederi a sortoe foe den” (Genesis 1:11, 21, 24). Èn den troe tori e sori taki baka wan pisi ten, a wan sortoe prani noso meti, no gro kon tron wan tra sortoe. Moro tori di e boeweisi taki wi no kon foe evolutie, de foe feni ini a boekoe Leven — Hoe is het ontstaan? Door evolutie of door schepping? (Libi — Fa a doe kon? Nanga jepi foe evolutie noso foe di Gado meki sani?)
FA GADO BEN MEKI LIBISMA
9. (a) Fa bijbel e froeteri taki Gado ben meki libisma? (b) San ben pasa di Gado ben bro a „libibro” go na ini den noso-olo foe libisma?
9 Gado ben meki libisma foe a gron, foe a libi na grontapoe, soleki fa bijbel e taki: „Jehovah Gado ben go moro fara foe teki doti foe a gron meki libisma èn foe bro a libibro na ini en noso-olo, èn libisma ben tron wan libi sili” (Genesis 2:7). Disi e sori taki Gado srefi ben meki libisma. Ini wan spesroetoe doe foe meki sani, Gado ben meki libisma leki wan sma di boen dorodoro. Di Gado ben bro a „libibro” go na ini den noso-olo foe libisma, dan den fokofoko foe en ben kon foeroe nanga loktoe. Ma dati no ben de a wan-enkri sani di Gado ben doe. Gado ben gi libi na a skin foe libisma. A hari di a sma e hari bro, e gi san a libikrakti disi abi fanowdoe noso e meki a tan go doro.
10. San na a libisma sili, èn fa Gado ben meki en?
10 Ma, loekoe taki bijbel no e taki dati Gado ben gi libisma wan sili. Na presi foe dati, a e taki dati, baka di Gado ben bigin foe meki libisma hari bro, ’libisma ben tron wan libi sili’. So boen, libisma ben de wan sili, neleki fa wan sma di tron datra, na wan datra (1 Korentesma 15:45). A „doti foe a gron”, di a natoeroe skin meki foe en, a no a sili. Bijbel no e taki toe, taki a „libibro” na a sili. Na presi foe dati, bijbel e sori taki a poti kon makandra foe den toe sani disi, na san ben meki taki ’libisma tron wan libi sili’.
11. Sortoe troe tori foe bijbel di abi foe doe nanga a libisma sili e sori taki a no ben kan de wan sani leki wan kra di kan tan e libi aparti foe wan sma?
11 Foe di a libisma sili na a libisma srefi, dan a no kan de wan sani leki wan kra di e libi na ini a skin noso di kan gowe libi a skin. Foe taki en makriki, bijbel e leri taki a sili foe joe na joesrefi. Foe eksempre, bijbel e taki dati a sili wani foe njan njanjan na skinfasi, foe di a e taki: ’Oen sili e lostoe srefisrefi foe njan meti’ (Deuteronomium 12:20). Bijbel e taki toe, taki sili abi broedoe di e lon na ini den broedoetitei, foe di a e taki foe „den broedoemarki foe den sili foe den pôti sma di no doe noti”. — Jeremia 2:34.
FOE SAN EDE GADO POTI LIBISMA DJASO NA GRONTAPOE
12. San na a prakseri di Gado ben abi nanga libisma na grontapoe?
12 A no ben de a prakseri foe Gado taki Adam nanga Eva ben moesoe dede baka wan pisi ten èn ben moesoe libi na wan tra presi. Den ben moesoe tan djaso foe sorgoe gi grontapoe nanga ala libisani na tapoe. Bijbel e taki: „Gado ben blesi den èn Gado ben taigi den: ’Oen meki pikin èn kon foeroe èn foeroe grontapoe èn poti en na oen ondro, èn abi den fisi foe se nanga den mekisani foe hemel di e frei, nanga ibri libi mekisani di e boeweigi ensrefi na grontapoe, na oen ondro’” (Genesis 1:28; 2:15). Adam nanga Eva nanga ala den pikin di den ben sa kisi, ben sa kan libi foe têgo ini kolokoe na grontapoe, ala di den ben sa doe den sani di Gado ben wani foe den doe.
13. (a) Fa wi kan de kolokoe? (b) San sa meki a libi foe wi wani taki troetroe wan sani?
13 Loekoe taki ’Gado ben blesi den’. A ben broko en ede troetroe nanga den grontapoe pikin foe en. So boen, leki wan lobi-ati Tata, a ben gi den leri di ben de foe a boen foe den. Den ben sa de kolokoe efoe den ben gi jesi na a leri disi. Jesus ben sabi disi èn foe dati ede a ben taki baka ten: „Kolokoe foe den sma, di e arki a wortoe foe Gado èn e hori en!” (Lukas 11:28) Jesus ben hori a wortoe foe Gado. „Ala ten mi e doe den sani di e plisi en”, a ben taki (Johanes 8:29). Disi na a sroto foe san ede wi de na grontapoe. Wi de djaso foe abi wan kolokoe libi pe noti no e mankeri na en, foe di wi e libi ini akroederi nanga a wani foe Gado. A libi foe wi sa wani taki troetroe wan sani now, efoe wi e dini Jehovah. Èn te wi e doe disi, dan wi sa de sma di Gado sa feni boen foe libi foe têgo na ini wan Paradijs na grontapoe. — Psalm 37:11, 29.
FOE SAN EDE WI E KON OWROE ÈN DEDE
14. San Adam nanga Eva ben doe di den ben trangajesi a komando foe Gado?
14 Ma now wi alamala e kon owroe èn dede. Foe san ede? Soleki fa wi ben si na ini a kapitel na fesi, dan disi doe kon foe di Adam nanga Eva ben opo densrefi teige Gado. Jehovah ben tesi den na wan fasi di ben sori taki a de fanowdoe foe den gi jesi na Gado. A ben taigi Adam: „Foe ibri bon foe a djari joe mag njan te joe bere foeroe. Ma foe a bon foe sabi boen nanga ogri, foe dati joe no moesoe njan, bika na a dei di joe sa njan foe dati, joe sa dede nomonomo” (Genesis 2:16, 17). Foe di Adam nanga Eva ben njan foe a bon disi, dan den ben drai den baka gi den hemel Tata èn ben trowe a tiri foe en. Den ben trangajesi èn ben teki san no ben de foe den. Den ben sa kan libi foe têgo ini kolokoe na ini wan paradijs, sondro pôtifasi noso pina, ma now den ben tjari a strafoe foe sondoe kon na den tapoe. A strafoe disi na onvolmaaktifasi nanga dede. — Romesma 6:23.
15. Fa wi ben kisi wi sondoe foe Adam?
15 Joe sabi fa wi ben kisi a sondoe foe wi foe Adam? Baka di Adam ben kon de onvolmaakti, dan a ben tjari na onvolmaaktifasi dati nanga dede kon na tapoe ala en pikin (Job 14:4; Romesma 5:12). Foe jepi joe foe froestan a fasi fa a tori de, prakseri san e pasa te wan bakriman e baka brede na ini wan pan pe wan fow de na ini. Wan marki sa de foe si na ala den brede di a e baka na ini a pan dati. Adam ben kon de leki a pan dati, èn wi de leki a brede. Adam ben kon de onvolmaakti di a ben pasa a wet foe Gado. A ben de leki a ben kisi wan fow noso wan takroe marki. So boen, di a ben kisi pikin, dan den alamala ben kisi a srefi marki foe sondoe noso onvolmaaktifasi.
16, 17. Fa wan foe den wondroe foe Jesus e sori taki siki kon na tapoe a libisma famiri leki wan bakapisi foe sondoe?
16 Now wi e siki èn e kon owroe leki wan bakapisi foe a sondoe di wi alamala kisi foe Adam. Disi e kon na krin na ini wan foe den wondroe di Jesus ben doe. Ala di Jesus ben gi leri na ini na oso pe a ben e tan, dan wan bigi ipi sma ben kon makandra, so taki no wan sma ben kan kwinsi pasa go na ini a kamra moro. Di fo man ben tjari wan lanman kon, di ben didon na tapoe wan bedi, dan den ben si taki den no ben man pasa go na inisei. Dati meki den ben go na tapoe a dak, ben meki wan olo na ini a dak èn ben saka a bedi nanga a lanman di ben de na tapoe, leti na sei Jesus.
17 Di Jesus ben si omeni bribi den ben abi, a ben taigi a lanman: „Joe kisi pardon foe joe sondoe.” Ma wan toe foe den sma di ben de drape no ben bribi taki Jesus ben kan gi pardon foe sondoe. Foe dati ede Jesus ben taki: „’Foe oenoe kan sabi taki a Manpikin foe libisma abi makti foe gi sma pardon foe sondoe na grontapoe’ — a ben taigi a lanman: ’Mi e taigi joe: Opo tanapoe, teki joe bedi èn go na joe oso.’ Ne a ben opo tanapoe èn ben teki en bedi wantewante èn na fesi foe ala sma ben waka go na dorosei.” — Markus 2:1-12.
18. Sortoe ten di de na den fesi, foetoeboi foe Gado kan froewakti?
18 Prakseri pikinso san a makti disi foe Jesus kan wani taki gi wi! Na ondro a tiri foe Gado kownoekondre, Krestes sa man foe gi ala sma di lobi Gado èn di e dini en, pardon foe den sondoe. Disi wani taki, dati ala sari nanga pen nanga siki sa komoto na pasi. No wan sma sa abi foe kon owroe noso dede oiti moro! Fa disi na wan kefalek moi howpoe gi a ten di e kon! Ija, troetroe foeroe sani moro de di wi kan froewakti leki kon gebore, libi wan sjatoe pisi ten èn dan dede. Te wi e go doro foe leri sabi Gado èn te wi e dini en, dan troetroe wi kan libi foe têgo na ini wan Paradijs na grontapoe.
[Aksi foe a tori disi]
[Prenki na tapoe bladzijde 69]
Foeroe sma e aksi densrefi san a libi wani taki
[Prenki na tapoe bladzijde 70]
Den sani disi ben evolueer, noso na wan sma ben meki den?
[Prenki na tapoe bladzijde 75]
A bijbel tori foe a dresi di Jesus ben dresi wan lanman, e sori taki sma e siki foe di Adam ben sondoe
