Na opobaka — Gi soema, èn pe?
Kapitel 20
Na opobaka — Gi soema, èn pe?
1, 2. Fa wi sabi taki den foetoeboi foe Gado foe owroeten ben bribi ini na opobaka?
DEN FOETOEBOI FOE GADO bribi ala ten ini na opobaka. Foe Abraham, di ben libi 2000 jari bifo Jesus ben gebore leki wan libisma, bijbel e taki: „A ben prakseri taki Gado ben man opo en [en manpikin Isak] baka na dede srefi” (Hebrewsma 11:17-19). Baka ten, a foetoeboi foe Gado, Job, ben aksi: „Efoe wan gosontoe tranga man dede, a kan libi baka?” Leki piki na tapoe en eigi aksi, Job ben taigi Gado: „Joe sa kari, èn misrefi sa piki joe.” Na so a ben sori taki a ben bribi ini na opobaka. — Job 14:14, 15.
2 Di Jesus Krestes ben de na grontapoe, a ben tjari kon na krin: „Dati den dedewan e kisi wan opobaka, srefi Moses ben tjari kon na krin ini a tori foe a maka-boesiboesi, te a e kari Jehovah ’a Gado foe Abraham èn a Gado foe Isak èn a Gado foe Jakob’. En a no wan Gado foe den dedewan, ma foe den libiwan, bika gi en den alamala e libi” (Lukas 20:37, 38). Na ini den kresten Griki Boekoe foe bijbel den gebroiki a wortoe „opobaka” moro leki 40 tron. Foe troe, na opobaka foe den dedewan na wan foe den moro prenspari leri foe bijbel. — Hebrewsma 6:1, 2.
3. San Marta ben taki foe sori taki a ben bribi ini na opobaka?
3 Di Lasarus dede, dan en sisa Marta, di ben de wan mati foe Jesus, ben sori taki a ben bribi ini na opobaka. Di Marta ben jere taki Jesus ben de na pasi e kon, a ben lon go miti en èn ben taki: „Masra, efoe joe ben de djaso, dan mi brada no ben o dede.” Di Jesus ben si taki a ben sari srefisrefi, a ben trowstoe en nanga den wortoe: „Joe brada sa opo baka.” Marta ben piki tapoe dati: „Mi sabi taki a sa opo baka na a opobaka na a lasti dei.” — Johanes 11:17-24.
4-6. Sortoe boeweisi Marta ben abi foe bribi ini na opobaka?
4 Marta ben abi krakti boeweisi foe bribi ini na opobaka. A ben sabi foe eksempre, taki foeroe jari na fesi, den profeiti foe Jehovah, Elia nanga Elisa, ibriwan foe den ben opo wan pikin baka nanga a krakti foe Gado (1 Kownoe 17:17-24; 2 Kownoe 4:32-37). Èn a ben sabi toe taki wan man di dede, ben kon na libi baka di den ben iti en go na ini wan olo èn ben toeka nanga den bonjo foe Elisa di dede (2 Kownoe 13:20, 21). Ma a sani di ben meki en bribi ini na opobaka kon moro tranga, ben de san Jesus srefi ben leri èn ben doe.
5 Mendri leki toe jari na fesi, kande Marta ben de na Jerusalem di Jesus ben taki foe a prati di a ben o abi na ini a wiki di Gado ben o wiki den dedewan baka. A ben taki: „Bikasi neleki fa a Tata e opo den dedewan èn e meki den kon na libi, na so a Manpikin toe e meki den wan di en wani, kon na libi. No froewondroe foe disi, bika a joeroe e kon pe ala sma di de na ini den memre-grebi, sa jere en sten èn sa kon na doro.” — Johanes 5:21, 28, 29.
6 Te nanga a ten dati, di Jesus ben taki den wortoe dati, no wan presi na ini bijbel e sori taki a ben opo wan sma na dede kaba. Ma sjatoe baka dati, a ben opo wan jonkoeman kon na libi baka, a manpikin foe wan weduwe foe a foto Na-in. A njoensoe foe disi ben panja go na zuidsei, na Judea, èn so boen, seiker Marta ben moesoe jere foe a tori disi (Lukas 7:11-17). Baka ten, Marta ben moesoe jere toe san ben pasa na a Se foe Galilea na a oso foe Ja-irus. En oemapikin foe 12 jari ben siki tranga èn a dede. Ma di Jesus ben doro na a oso foe Ja-irus, a ben go na a dede pikin èn ben taki: „Pikin wenke, opo tanapoe!” Èn a ben opo tanapoe! — Lukas 8:40-56.
7. Sortoe boeweisi Jesus ben gi Marta, taki a man opo den dedewan baka?
7 Tokoe Marta no ben froewakti taki Jesus ben sa wiki en brada baka wantewante. Dati meki a ben taki: „Mi sabi taki a sa opo baka na a opobaka na a lasti dei.” Ma foe meki Marta kon froestan boen taki en, Jesus, abi wan prati na a opo di den o opo den dedewan baka, a ben taki: „Mi na a opobaka nanga a libi. A sma di e sori bribi ini mi, sa kon na libi, awinsi a dede; èn ibri sma di e libi èn e sori bribi ini mi, kwetikweti no sa dede noiti.” Sjatoe baka dati, den ben tjari Jesus go na a grebikamra pe den ben poti Lasarus didon. „Lasarus, kon na doro!” a ben bari. Èn Lasarus, di dede fo dei kaba, ben kon na doro! — Johanes 11:24-26, 38-44.
8. Sortoe boeweisi de, taki Jesus ben kisi wan opobaka?
8 Wan toe wiki baka dati, den ben kiri Jesus èn den ben poti en na ini wan grebikamra. Ma a ben de drape soso pisi foe dri dei. Na apostel Petrus e tjari kon na krin foe san ede, te a e taki: „A Jesus disi, Gado ben opo en baka, èn wi alamala de kotoigi foe dati.” Den relisi fesiman no ben man tapoe a Manpikin foe Gado foe komoto na a grebikamra (Tori foe den Apostel 2:32; Mateus 27:62-66; 28:1-7). A no de wan sani foe degedege, taki Gado ben opo Jesus baka na dede, bika baka dati a ben sori ensrefi libilibi na foeroe foe den disipel foe en, wan leisi na so wan 500 foe den (1 Korentesma 15:3-8). Den disipel foe Jesus ben bribi so tranga ini na opobaka, taki den ben de klariklari foe dede srefi soso foe kan dini Gado.
9. Sortoe neigi sma bijbel e taki ben kisi wan opobaka?
9 Baka ten, den apostel Petrus nanga Paulus ben gi ete wan boeweisi taki den dedewan kan kisi wan opobaka. Fosi, Petrus ben opo Tabita baka, di ben nen Dorkas toe, foe a foto Jope (Tori foe den Apostel 9:36-42). Èn baka dati, Paulus ben tjari a jongoe Eutikus kon na libi baka, di dede foe di a ben fadon komoto na wan fensre na a di foe dri sodro, ala di Paulus ben e hori wan taki (Tori foe den Apostel 20:7-12). Den neigi opobaka disi di skrifi na ini bijbel, seiker e gi a troetroe boeweisi taki den dedewan kan tjari kon na libi baka!
SOEMA SA KISI WAN OPOBAKA?
10, 11. (a) Foe san ede Gado ben seti sani gi na opobaka? (b) Sortoe toe groepoe foe sma sa kisi wan opobaka, soleki fa Tori foe den Apostel 24:15 e taki?
10 Biginbigin a no ben de a prakseri foe Gado foe opo wan sma na dede baka, bika efoe Adam nanga Eva ben tan getrow, dan no wan sma ben sa abi foe dede. Ma ne a sondoe foe Adam ben tjari onvolmaaktifasi nanga dede kon na tapoe ala sma (Romesma 5:12). So boen, Jehovah Gado ben seti sani gi na opobaka foe meki iniwan foe den pikin foe Adam kan kisi têgo libi. Ma san e bepaal efoe wan sma e kisi wan opobaka noso no e kisi dati?
11 Bijbel e tjari kon na krin: „Wan opobaka sa de foe den regtfardikiwan nanga den onregtfardikiwan” (Tori foe den Apostel 24:15). Disi sa froewondroe son sma kande. ’Foe san ede den e tjari den „onregtfardikiwan” kon na libi baka?’ kande den e aksi. A sani san ben pasa di Jesus ben anga na a pina-postoe, sa jepi wi foe piki na aksi disi.
12, 13. (a) San Jesus ben pramisi wan ogriman? (b) Pe a „Paradijs” de di Jesus ben taki foe en?
12 Den man disi na ala toe sei foe Jesus na ogriman. Wan foe den djonsro kaba afrontoe en nanga den wortoe: „Joe na a Krestes, a no so? Froeloesoe joesrefi nanga wi.” Ma a tra ogriman e bribi na ini Jesus. A e drai loekoe Jesus èn e taki: „Memre mi te joe kon na ini joe kownoekondre.” Tapoe dati Jesus e pramisi: „Foe troe, mi e taigi joe tide, taki: Joe sa de nanga mi na ini a Paradijs.” — Lukas 23:39-43.
13 Ma san Jesus wani taki, te a e taki: „Joe sa de nanga mi na ini a Paradijs”? Pe a Paradijs de? We, pe a paradijs di Gado ben meki na a bigin, ben de? A ben de na grontapoe, a no so? Gado ben poti a fosi libisma paar na ini a moi paradijs, di den ben kari a djari foe Eden. So boen, te wi e leisi taki a man disi di ben de wan ogriman fosi, sa de na ini a Paradijs, dan wi moesoe tjari a prenki kon na wi prakseri foe a grontapoe disi di kenki kon tron wan moi presi foe libi na ini, bika a wortoe „paradijs” wani taki „moi djari” noso „park”. — Genesis 2:8, 9.
14. Na sortoe fasi Jesus sa de na ini a Paradijs nanga a man di ben de wan ogriman fosi?
14 A no de foe taki, dati Jesus Krestes no sa de leti dja na grontapoe nanga a man di ben de wan ogriman fosi. Nôno, Jesus sa de na hemel e tiri a grontapoe Paradijs leki kownoe. So boen, a sa de nanga a man dati na a fasi disi, taki A sa opo en baka na dede èn sorgoe foe den fanowdoe foe en na skinfasi èn na jejefasi. Ma foe san ede Jesus sa gi pasi na wan man, di ben de wan ogriman, foe libi na ini a Paradijs?
15. Foe san ede den „onregtfardikiwan” e kisi wan opobaka?
15 A troe, taki a man disi ben doe takroe sani. A ben de „onregtfardiki”. A no ben sabi a wani foe Gado toe. Ma a ben sa de wan ogriman, efoe a ben sabi den prakseri foe Gado? Foe kon sabi efoe disi de so, dan Jesus sa opo na onregtfardiki man disi baka, makandra nanga miljardmiljard tra sma di ben de ini don di den dede. Na ini den jarihondro di pasa, foe eksempre, foeroe sma dede di no ben kan leisi èn di noiti ben si wan bijbel. Ma den sa kisi wan opobaka na Sjeol noso Hades. Dan, na a paradijs grontapoe, den o leri den a wani foe Gado èn den sa abi na okasi foe sori taki den lobi Gado troetroe, foe di den e doe en wani.
16. (a) Soema foe den dedewan no sa kisi wan opobaka? (b) Foe san ede wi no moesoe proeberi foe kroetoe sani ini na afersi disi? (c) San moesoe de a moro prenspari broko-ede foe wi?
16 Disi no wani taki, dati ala sma sa kisi wan opobaka. Bijbel e sori taki Judas Iskariòt, di ben tori Jesus, no sa kisi wan opobaka. Leki wan bakapisi foe na espresi ogridoe foe Judas, dan bijbel e kari en „a manpikin foe pori” (Johanes 17:12). A ben go na a agersi Gehèna, pe sma no kan kisi wan opobaka foe drape (Mateus 23:33). Sma di e doe foe espresi san ogri, baka di den ben kon sabi a wani foe Gado, kande e sondoe na a santa jeje. Èn Gado no sa opo den sma baka di e sondoe na en santa jeje (Mateus 12:32; Hebrewsma 6:4-6; 10:26, 27). Ma foe di Gado na a Kroetoeman, dan a no abi no wan enkri winimarki te wi e proeberi foe kon sabi efoe son ogri sma foe a ten di pasa noso foe a ten disi, sa kisi wan opobaka noso no sa kisi dati. Gado sabi soema de na ini Hades èn soema de na ini Gehèna. Wi foe wi sei moesoe doe ala san wi man foe de a sortoe sma di Gado wani na ini en njoen seti. — Lukas 13:24, 29.
17. Soema no sa abi foe kisi wan opobaka foe njan boen foe têgo libi?
17 Ma a tori de, taki a no ala sma di e kisi têgo libi, sa abi foe kisi wan opobaka. Foeroe foetoeboi foe Gado di e libi now na ini den „lasti dei” foe a seti foe sani disi, sa pasa Armagedon libilibi. Èn dan, leki wan pisi foe a regtfardiki „njoen grontapoe”, den no sa abi foe dede noiti. San Jesus ben taigi Marta, kan de troe gi den na wan troetroe fasi: „Èn ibri sma di e libi èn e sori bribi ini mi, kwetikweti no sa dede noiti.” — Johanes 11:26; 2 Timoteus 3:1.
18. Soema na den „regtfardikiwan” di sa kisi wan opobaka?
18 Soema na den „regtfardikiwan” di moesoe kisi wan opobaka? Na den mindri joe sa abi getrow foetoeboi foe Gado, di ben libi bifo Jesus Krestes ben kon na grontapoe. Hebrewsma kapitel 11 e kari foeroe foe den sma disi na den nen. Den no ben abi a howpoe foe go na hemel, ma den ben howpoe foe libi baka na grontapoe. Na mindri den „regtfardikiwan” di sa kisi wan opobaka, joe abi so srefi getrow foetoeboi foe Gado di dede ini den jari no so langa pasa ete. Gado sa sorgoe taki a howpoe foe den foe libi foe têgo na grontapoe sa kon troe, foe di a sa opo den baka na dede.
O TEN ÈN PE DEN E KISI WAN OPOBAKA?
19. (a) Na sortoe fasi Jesus ben de a fosiwan di ben sa kisi wan opobaka? (b) Soema e kisi wan opobaka baka dati?
19 Bijbel e taki foe Jesus Krestes leki „a fosiwan di ben sa kisi wan opobaka na dede” (Tori foe den Apostel 26:23). Disi wani taki, dati Jesus ben de a fosiwan di ben sa kisi wan opobaka foe den wan di no ben sa abi foe dede moro. A ben de a fosiwan toe di ben sa kisi wan opobaka leki wan jejesma (1 Petrus 3:18). Ma bijbel e froeteri wi taki tra sma ben sa de ete, te a e taki: „Ibri sma na ini en eigi groepoe: Krestes, a fosiwan, baka dati den wan di de foe Krestes na ini a ten foe en denoja” (1 Korentesma 15:20-23). So boen, ini na opobaka son sma ben sa kisi wan opobaka bifo bepaalde tra sma.
20. (a) Soema na „den wan di de foe Krestes”? (b) Sortoe opobaka den e kisi?
20 „Den wan di de foe Krestes”, na den 144.000 getrow disipel di den teki foe tiri nanga Jesus na ini a Kownoekondre. Foe na opobaka foe den foe kisi libi na hemel, bijbel e taki: „Kolokoe èn santa ibri sma de di abi prati na a fosi opobaka; na den disi tapoe a di foe toe dede no abi makti, ma den sa . . . tiri leki kownoe nanga en, doesoen jari langa.” — Openbaring 20:6; 14:1, 3.
21. (a) O ten „a fosi opobaka” e bigin? (b) Soema sondro degedege ben kisi wan opobaka kaba go libi na hemel?
21 So boen, baka na opobaka foe Krestes, den 144.000 na den wan di e kisi wan opobaka. Den abi prati na „a fosi opobaka” noso „a moro froekoe opobaka” (Filipisma 3:11). O ten disi e feni presi? „Na ini a ten foe en denoja”, bijbel e taki. Soleki fa wi leri na ini den kapitel na fesi, dan a denoja foe Krestes ben bigin na ini a jari 1914. So boen, a „dei” foe „a fosi opobaka” foe getrow kresten foe kisi libi na hemel, doro kaba. Sondro degedege, den apostel nanga tra fositen kresten, ben kisi wan opobaka kaba go libi na hemel. — 2 Timoteus 4:8.
22. (a) Soema moro sa abi prati na „a fosi opobaka”? (b) O ten den e kisi wan opobaka?
22 Ma joe abi kresten di e libi now na ini a ten foe Krestes denoja di wi no kan si, èn den abi a srefi howpoe disi foe tiri nanga Krestes na hemel. Den na den wan di tan abra, wan fikapisi foe den 144.000. O ten den e kisi wan opobaka? Den no abi foe sribi ini dede, ma wantewante den e kisi wan opobaka te den dede. Bijbel e tjari kon na krin: „Wi alamala no sa go sribi ini dede, ma wi alamala sa kenki, na ini wan momenti, na ini wan pingi foe wan ai, na ini a ten foe a lasti trompeti. Bika a trompeti sa bari èn den dedewan sa kisi wan opobaka.”— 1 Korentesma 15:51, 52; 1 Tesalonikasma 4:15-17.
23. Fa bijbel e froeteri foe a kenki go na jeje libi?
23 A no de foe taki, dati a „fosi opobaka” disi foe kisi libi na hemel, no de foe si nanga libisma ai. A de wan opobaka foe kisi libi leki jeje mekisani. Bijbel e froeteri foe a kenki go na jeje libi na a fasi disi: „Den e sai en ini porifasi, den e opo en baka foe no kan pori moro. Den e sai en ini sjen, den e opo en baka ini glori. . . . Den e sai en leki wan natoeroe skin, den e opo en baka leki wan jeje skin.” — 1 Korentesma 15:42-44.
24. (a) Sortoe opobaka e kon baka „a fosi opobaka”? (b) Foe san ede den e kari en wan „moro betre opobaka”?
24 Ma den wortoe „fosi opobaka” e sori taki ete wan opobaka sa kon. Disi na a opobaka foe den regtfardikiwan nanga onregtfardikiwan foe kisi libi na wan paradijs grontapoe. Na opobaka disi sa feni presi baka Armagedon. A sa de wan „moro betre opobaka” leki di foe den boi di Elia nanga Elisa ben opo baka èn foe trawan di wan dei ben kisi wan opobaka na grontapoe. Foe san ede? Bika efoe den wan di kisi wan opobaka baka Armagedon e teki a bosroiti foe dini Gado, dan den no abi foe dede noiti moro. — Hebrewsma 11:35.
WAN WONDROE FOE GADO
25. (a) Foe san ede a no de a skin di dede, di e kisi wan opobaka? (b) San e kisi wan opobaka, èn san den sma di kisi wan opobaka e kisi?
25 San e opo baka, baka te wan sma dede? A no a srefi skin di dede. Bijbel e sori disi te a e taki foe na opobaka foe kisi libi na hemel (1 Korentesma 15:35-44). Srefi den wan di e kisi wan opobaka foe libi na grontapoe, no e kisi a srefi skin di den ben abi na a ten di den ben de na libi fosi. A skin dati ben pori kande èn ben drai go baka na a gron. Baka wan pisi ten kande den elementi foe a dede skin ben tron wan pisi foe tra sani di libi. So boen, Gado no e opo a srefi skin baka, ma a srefi sma di dede. Na den sma di e go na hemel, a e gi wan njoen jeje skin. Na den sma di e kisi wan opobaka foe libi na grontapoe, a e gi wan njoen natoeroe skin. A njoen natoeroe skin disi, sondro degedege sa kroederi nanga a skin di a sma ben abi bifo a dede, so taki den sma di ben sabi en, sa sabi taki na en.
26. (a) Foe san ede na opobaka na so wan kefalek moi wondroe? (b) Sortoe koni di libisma ben feni, kan jepi wi foe froestan taki Gado seiker abi a makti foe memre sma di dede?
26 Na opobaka na troetroe wan kefalek moi wondroe. A sma di dede, kande ben kisi boen foeroe ondrofeni nanga sabi èn wan lo sani de di a kan memre, ini a ten di a ben de na libi. A ben kweki eigifasi tron a sma di a ben de, so taki a ben de tra fasi leki iniwan tra sma di oiti ben libi. Tokoe Jehovah Gado e memre ibri fini pisi foe a sma di a de èn a sa tjari a heri sma disi kon na libi baka te A e opo en baka. Bijbel e taki foe dati ede foe den dedewan di sa kisi wan opobaka: „Gi en den alamala e libi” (Lukas 20:38). Libisma kan teki sten nanga prenki foe tra sma tapoe banti èn drai den, langa baka di den sma disi dede. Ma Jehovah kan tjari èn troetroe sa tjari ala sma, di de na ini en prakseri, kon na libi baka!
27. Sortoe aksi di abi foe doe nanga na opobaka, sa kisi wan piki baka ten?
27 Bijbel e froeteri wi foeroe sani moro foe a libi na ini a Paradijs, baka te den dedewan kisi wan opobaka. Na so Jesus ben taki foe eksempre, dati son sma ben sa kon na doro foe kisi „wan opobaka foe kisi libi” èn trawan foe kisi „wan opobaka foe kisi kroetoe” (Johanes 5:29). San a ben wani taki nanga dati? Èn a situwâsi foe den „regtfardikiwan” di e kisi wan opobaka sa de tra fasi leki di foe den „onregtfardikiwan”? Te wi o loekoe fa a Kroetoedei sa de, dan wi sa kisi wan piki na tapoe den sortoe aksi disi.
[Aksi foe a tori disi]
[Prenki na tapoe bladzijde 167]
„Mi sabi taki a sa opo baka na a opobaka”
Elia ben opo a manpikin foe wan weduwe baka
Elisa ben opo wan pikin baka
Wan man di ben toeka nanga den bonjo foe Elisa, ben kon na libi
[Prenki na tapoe bladzijde 168]
Sma di Jesus ben opo baka:
A manpikin foe wan weduwe foe Na-in
Lasarus
Na oemapikin foe Ja-irus
[Prenki na tapoe bladzijde 169]
Trawan di ben kisi wan opobaka:
Dorkas
Jesus ensrefi
Eutikus
[Prenki na tapoe bladzijde 170]
Pe a Paradijs de, di Jesus ben pramisi na ogriman?
