YU PRAMISI wan sma wan sani wan dei èn ben feni bakaten taki a tranga fu hori a pramisi? Dati ben pasa nanga a man na tapu a prenki disi èn dati meki a e sari so. A man nen Yefta, wan deki-ati krutuman fu Israel.

Yefta e libi na ini wan ten pe den Israelsma no e anbegi Yehovah moro. Agen den e du san ogri. Fu dati ede Yehovah e meki den Amonsma kwinsi den. Disi e meki den Israelsma bari taigi Yehovah: ’Wi sondu na yu. Grantangi, yepi wi!’

A pipel e sari fu den ogri sani di den du. Den e sori taki den e sari fu di den e go anbegi Yehovah baka. Èn fu dati ede Yehovah e yepi den baka.

A pipel teki Yefta fu feti nanga den ogri Amonsma. Yefta wani so te taki Yehovah yepi en na ini a feti. Fu dati ede a e pramisi Yehovah: ’Efu yu meki mi wini den Amonsma, dan mi sa gi yu a fosi sma di e waka komoto na mi oso kon miti mi.’

Yehovah e yere a pramisi fu Yefta èn a e yepi en fu wini a feti. Yu sabi suma na a fosi sma di e waka miti Yefta te a drai kon na oso? Na en umapikin, di de en wan-enkri pikin. ’O, mi umapikin!’ Yefta e bari. ’Fa yu e tyari sari kon na mi tapu. Bika mi pramisi Yehovah wan sani èn mi no kan puru a mofo di meki.’

Te Yefta umapikin e yere fu a pramisi fu en papa, dan biginbigin a e sari tu, bika disi wani taki dati a sa musu gowe libi en papa nanga en mati. Ma a sa dini Yehovah na ini a tabernakel na Silo solanga leki a e libi. Fu dati ede a e taigi en papa: ’Efu yu pramisi Yehovah wan sani, dan yu musu hori a pramisi.’

Sobun, Yefta umapikin e go na Silo èn a e dini Yehovah na ini a tabernakel solanga leki a e libi. Fo dei fu ibri yari den umasma fu Israel e go luku en drape èn den abi wan switi ten nanga makandra. A pipel lobi Yefta umapikin fu di a e dini Yehovah so getrow.