NA INI Bijbel yu e feni wan buku di nen Rut. A de wan tori fu wan famiri di ben libi na ini a ten di Israel ben abi krutuman. Rut na wan yongu uma fu a kondre Moab; a no de fu Gado nâsi Israel. Ma te Rut e leri sabi a tru Gado Yehovah, dan a e kon lobi Yehovah srefisrefi. Naomi na wan uma di moro owru. A ben yepi Rut fu leri sabi Yehovah.

Naomi na wan Israel-uma. En nanga en masra nanga en tu manpikin ben froisi go na a kondre Moab na ini wan ten di pikinso nyanyan ben de na Israel. Dan wan dei a masra fu Naomi e dede. Bakaten den manpikin fu Naomi ben trow nanga tu umapikin fu Moab, Rut nanga Orpa. Ma baka sowan tin yari den tu manpikin fu Naomi e dede. Naomi nanga den tu yongu uma ben sari srefisrefi! San Naomi ben o du now?

Wan dei Naomi e bosroiti fu waka a langa pasi go baka na en eigi pipel. Rut nanga Orpa wani fu tan nanga en èn fu dati ede den e go nanga en. Ma baka di den waka wan pisi, dan Naomi e taigi den tu yongu uma: ’Drai go baka na oso èn tan nanga un mama.’

Nanga wan bosi Naomi e gi den adyosi. Tapu disi den e bigin krei, bika den lobi Naomi srefisrefi. Den e taki: ’Nôno! Wi wani go nanga yu na yu pipel.’ Ma Naomi e piki: ’Un musu drai gowe, mi umapikin. Unu sa abi en moro bun na oso.’ Dan Orpa e teki pasi go na oso. Ma Rut no e go.

Naomi e taigi en now: ’Orpa gowe. Go tu nanga en na oso.’ Ma Rut e piki: ’No pruberi fu meki mi gowe libi yu! Meki mi go nanga yu. Pe yu e go, mi wani go èn pe yu e libi, mi wani libi. Yu pipel sa de mi pipel èn yu Gado sa de mi Gado. Pe yu e dede, mi wani dede èn na drape mi wani den beri mi.’ Te Rut e taki disi, dan Naomi no e pruberi moro fara fu meki a drai go na oso.

Te fu kaba den tu uma e doro na Israel. Dyaso den e feni wan presi fu libi. Wantewante Rut e bigin fu wroko na den gron, bika a ben de a ten fu koti groto. Wan man di nen Boas e meki a piki groto na en gron. Yu sabi suma ben de a mama fu Boas? Dati ben de Rakab fu a foto Yerikow.

Wan dei Boas e taigi Rut: ’Mi yere ala sani fu yu èn fa yu ben de bun gi Naomi. Mi sabi fa yu ben gowe libi yu papa nanga mama nanga yu eigi kondre èn fa yu ben kon dyaso fu libi na mindri wan pipel di yu no ben sabi noiti na fesi. Yehovah musu de bun gi yu!’

Rut e piki: ’Masra yu de bun gi mi trutru. Den switi wortu fu yu ben meki mi firi moro bun.’ Boas lobi Rut tranga èn a no langa baka dati, den e trow. Disi e meki Naomi de koloku srefisrefi! Ma Naomi de moro koloku srefi te Rut nanga Boas e kisi den fosi manpikin, di nen Obed. Obed e tron a granpapa fu David, di wi sa leri moro furu fu en bakaten.