Foe san ede libi na a fasi fa Gado wani e tjari kolokoe kon
Kapitel 13
Foe san ede libi na a fasi fa Gado wani e tjari kolokoe kon
1. Foe san ede wi kan taki dati a pasi foe Jehovah e tjari kolokoe kon?
JEHOVAH na „a kolokoe Gado”, èn a wani, taki joe e njan boen foe a libi (1 Timoteus 1:11). Te joe e waka na ini en pasi, dan joe kan kisi wini gi joesrefi èn abi wan dipi korostoe firi di e tan, neleki wan liba di e lon doronomo. Te wan sma e waka na ini a pasi foe Gado, dan dati e boeweigi a sma toe foe doe regtfardiki sani dorodoro, „neleki den skwala foe se”. Disi e tjari troetroe kolokoe kon. — Jesaja 48:17, 18.
2. Fa kresten kan de kolokoe ala di son tron tra sma e handri takroe nanga den?
2 Son sma kan sori dati den no e agri èn taki: ’Son tron sma e pina foe di den e doe san boen.’ Dati troe, èn dati na san ben pasa nanga den apostel foe Jesus. Ma ala di den ben kisi froefolgoe, tokoe den ben prisiri èn ben tan go doro foe „meki a boen njoensoe foe a Krestes bekènti” (Tori foe den Apostel 5:40-42). Wi kan leri prenspari sani foe disi. Wan sani di wi kan leri, na taki te wi e libi na a fasi fa Gado wani, dan dati no de wan djaranti taki ala ten sma sa handri boen nanga wi. „Te joe loekoe en boen,” na apostel Paulus ben skrifi, „dan ala sma di e winsi foe libi ini a gi di den e gi densrefi na ini a dini foe Gado ini wánfasi nanga Krestes Jesus, sa kisi froefolgoe toe” (2 Timoteus 3:12). Disi de foe di Satan nanga a grontapoe foe en e gens den wan di e libi na a fasi fa Gado wani (Johanes 15:18, 19; 1 Petrus 5:8). Ma troetroe kolokoe no e anga foe sani di e kon foe dorosei. Na presi foe dati, a e kon foe di wi abi na overtoigi taki wi e doe san boen, èn foe dati ede Gado e feni wi boen. — Mateus 5:10-12; Jakobus 1:2, 3; 1 Petrus 4:13, 14.
3. Fa na anbegi di wan sma e anbegi Jehovah moesoe abi krakti na tapoe en libi?
3 Son sma e denki taki den kan froedini a boen-ati foe Gado te wanwan leisi den e doe wan sani foe gi densrefi na ini a dini foe Gado, ma taki den kan frigiti en na tra ten. A troe anbegi foe Jehovah Gado no de so. A abi krakti na tapoe a fasi fa wan sma e tjari ensrefi ala den joeroe te a de na ai, ibri dei, ibri jari. Foe dati ede den e kari na anbegi disi so srefi „A Pasi” (Tori foe den Apostel 19:9; Jesaja 30:21). A de wan fasi foe libi fa Gado wani, di e aksi foe wi dati wi e taki èn e handri akroederi a Wortoe foe Gado.
4. Foe san ede a abi winimarki foe tjari kenki kon foe libi akroederi den pasi foe Gado?
4 Te njoen studenti foe bijbel e si taki den moesoe kenki wan toe sani na ini den libi te den wani plisi Jehovah, dan kande den e aksi densrefi: ’A warti troetroe foe libi na a fasi fa Gado wani?’ Ija, joe kan de seiker taki a de so. Foe san ede? Bika „Gado na lobi”, èn foe dati ede den pasi foe en de foe gi wi wini (1 Johanes 4:8). Gado koni toe èn a sabi san moro boen gi wi. Foe di Jehovah Gado de almakti, a man gi wi krakti foe satisferi na angri foe wi foe plisi en, foe di wi e tapoe nanga wan takroe gwenti (Filipisma 4:13). Meki wi go loekoe wan toe gronprakseri di abi foe doe nanga a libi di wi e libi soleki fa Gado wani èn si fa a e tjari kolokoe kon te wi e gebroiki den.
EERLIJKFASI E TJARI KOLOKOE KON
5. San bijbel e taki foe a lei di sma e lei èn a foefoeroe di sma e foefoeroe?
5 Jehovah na „a Gado foe waarheid” (Psalm 31:5). Tweifri no de taki joe wani waka baka na eksempre foe en èn de bekènti leki wan sma di e taki waarheid. Te sma de eerlijk, dan dati e meki den abi lespeki gi densrefi èn a e gi den wan boen firi. Ma someni sma na ini a sondoe grontapoe disi, no de eerlijk èn dati meki a de fanowdoe foe memre kresten na a sani disi: „Taki waarheid, ibriwan foe oenoe nanga a sma na en sei . . . Meki a sma di foefoeroe, no foefoeroe moro, ma meki a wroko tranga . . . so taki a kan abi wan sani foe gi wan sma di de ini nowtoe” (Efeisesma 4:25, 28). Kresten wrokoman e wroko a heri ten di den kisi foe wroko. Den no e teki sani di de foe a wrokobasi, boiti te a e gi den primisi foe dati. Wan anbegiman foe Jehovah moesoe de ’eerlijk na ini ala sani’, awinsi na wrokope, na skoro, noso na oso (Hebrewsma 13:18). Iniwan sma di e meki a de wan gwenti foe lei noso foe foefoeroe, no kan feni a boen-ati foe Gado. — Deuteronomium 5:19; Openbaring 21:8.
6. Fa wan sma di e dini Gado ben sa kan gi glori na Jehovah te a de eerlijk?
6 Te wi de eerlijk, dan dati abi foeroe blesi leki bakapisi. Selina na wan Afrikan weduwe di pôti srefisrefi èn di lobi Jehovah Gado nanga den regtfardiki gronprakseri foe en. Wan dei a ben feni wan tas di ben abi wan bankboekoe na ini èn foeroe moni toe. Foe di a ben gebroiki wan telefonboekoe, a ben man feni a sma di ben abi a tas — wan wenkriman di den ben foefoeroe. A man no ben man bribi san a ben si, di Selina, ala di a ben siki pikinso, ben kon na en foe tjari ala sani kon gi en di ben de na ini a tas. „So wan eerlijkfasi moesoe kisi pai”, a man ben taki èn a ben gi Selina moni. Ma a moro prenspari sani de taki a man disi ben prèise a relisi foe Selina. Ija, te wi e doe sani na wan eerlijk fasi, dan dati e meki a bijbel leri kon tron wan moi sani, a e gi glori na Jehovah Gado, èn e tjari kolokoe kon gi den eerlijk anbegiman foe en. — Titus 2:10; 1 Petrus 2:12.
A E TJARI KOLOKOE KON TE WI LOBI FOE GI SMA SANI
7. Foe san ede a no de wan boen sani te wan sma e dòbel?
7 Te wi lobi foe gi sma sani, dan dati e tjari kolokoe kon, ala di bigi-aisma no sa „kisi a kownoekondre foe Gado” (1 Korentesma 6:10). Wan fasi foe bigi-ai di de foeroe foe si, na a dòbel di sma e dòbel, san na wan fasi fa sma e proeberi foe meki moni nanga a moni di trawan e lasi. Jehovah no lobi den wan di abi „bigi-ai gi oneerlijk wini” (1 Timoteus 3:8). Srefi pe wet e gi pasi foe dòbel èn wan sma e dòbel foe prisiri ede, tokoe a sma ben kan tron wan srafoe foe dati èn ben kan horibaka gi wan sani di sma e doe di pori foeroe libi kaba. Foeroe tron a dòbel di sma e dòbel, e tjari problema kon ini na osofamiri foe a sma di e dòbel, foe di na osofamiri tan kande nanga pikinso moni foe bai den sortoe sani di den abi fanowdoe, soleki njanjan nanga krosi. — 1 Timoteus 6:10.
8. Fa Jesus ben gi wan moi eksempre ini a tori foe a lobi di a lobi foe gi sani, èn fa wi kan lobi foe gi sani?
8 Kresten e feni en wan prisiri sani foe jepi trawan, foe di den lobi en srefisrefi foe gi sani, spesroetoe na pôti kompe bribiman (Jakobus 2:15, 16). Bifo Jesus ben kon na grontapoe, a ben si a fasi fa Gado lobi foe gi a libisma famiri sani (Tori foe den Apostel 14:16, 17). Jesus srefi ben gi en ten, en krakti, èn srefi en eigi libi gi a boen foe a libisma famiri. Foe dati ede a ben man taki heri boen: „Moro kolokoe de na ini a gi foe sani leki na ini a kisi foe sani” (Tori foe den Apostel 20:35). Jesus ben taki boen toe foe a pôti weduwe di nanga en heri ati ben poti toe pikin moni na ini a moni kisi foe a tempel, bika a ben gi „ala san a abi fanowdoe foe tan na libi” (Markus 12:41-44). Den Israèlsma foe owroeten nanga den fosi jarihondro kresten e gi eksempre fa sma nanga prisiri lobi foe gi jepi na a gemeente na materiasei èn na a Kownoekondre wroko na ini a ten disi (1 Kroniki 29:9; 2 Korentesma 9:11-14). Boiti taki disiten kresten e gi bijdrage na materiasei foe doe den sani disi, den e prèise Gado nanga prisiri èn e gebroiki a libi foe den foe doe a diniwroko foe en (Romesma 12:1; Hebrewsma 13:15). Jehovah e blesi den foe di den e gebroiki a ten foe den, a krakti foe den, nanga tra sani di den abi, so srefi a moni foe den, foe horibaka gi a troe anbegi èn meki a wroko foe preiki a boen njoensoe foe a Kownoekondre na heri grontapoe, go na fesi. — Odo 3:9, 10.
TRA SANI DI E MEKI KOLOKOE KON
9. San no boen na a dringi di wan sma e dringi sopi pasa marki?
9 Kresten moesoe ’kibri [so srefi] a man di den man denki’, so taki den kan de kolokoe (Odo 5:1, 2). Disi e aksi foe den taki den e leisi a Wortoe foe Gado nanga boen bijbel poeblikâsi èn prakseri dipi foe den. Ma sani de di den moesoe tan farawe foe den. Foe eksempre, a dringi di wan sma e dringi sopi pasa marki kan meki a sma no man dwengi en froestan. Te a froestan foe den kon de so, dan foeroe sma e kisi foe doe nanga hoeroedoe, den e doe ogridoe nanga tranga, èn den e meki taki ongolokoe e pasa pe sma e dede. A no de foe froewondroe, taki bijbel e taki dati droengoeman no sa kisi a Kownoekondre foe Gado (1 Korentesma 6:10). Troe kresten e tan farawe foe kon droengoe foe di den abi a fasti bosroiti foe tan „gosontoe foe froestan”, èn disi na wan jepi foe meki kolokoe kon na den mindri. — Titus 2:2-6.
10. (a) Foe san ede kresten no e gebroiki tabaka? (b) Sortoe winimarki de te wan sma e tapoe nanga gwenti di a de wan srafoe foe dati?
10 Wan krin skin e jepi toe foe de kolokoe. Tokoe foeroe sma e tron srafoe foe sani di e gi prisiri, ma di e doe den ogri. Foe eksempre, prakseri foe a gebroiki di sma e gebroiki tabaka. A Wereldgezondheidsorganisatie e taki dati a smoko di sma e smoko „e kiri dri miljoen sma ibri jari”. A kan de wan moeilek sani foe tapoe nanga a gwenti foe gebroiki tabaka, foe den sani ede di a skin e firi foe wan pisi ten te a skin moesoe lasi a gwenti foe smoko. Ma miljoenmiljoen sma di ben smoko fosi, e sori go na den sortoe winimarki leki wan moro boen gosontoe èn na abi di den abi moro moni foe bai den sani di na osofamiri abi fanowdoe. Foe troe, foe tapoe nanga a gwenti foe gebroiki tabaka noso foe de srafoe foe tra sani di e gi prisiri ma di e doe wan sma ogri, sa meki wi abi wan krin skin, wan krin konsensi èn troetroe kolokoe. — 2 Korentesma 7:1.
KOLOKOE NA INI A TROWLIBI
11. San wi moesoe doe efoe wi wani wan krin trowlibi di e tan èn di skifi na lanti?
11 Den sma di e libi nanga makandra leki masra nanga wefi moesoe sorgoe taki a trow foe den skrifi na wan joisti fasi na ini lantiboekoe (Markus 12:17). Den moesoe si a trow leki wan serjoesoe frantiwortoe toe. A troe, taki kande a de fanowdoe foe broko a trow ini den kefal pe wan trowpatna no wani sorgoe gi na osofamiri, noso te a wan trowpatna e fon a trawan na wan ogri-ati fasi noso te a jejefasi foe wan sma e kon ini kefar (1 Timoteus 5:8; Galasiasma 5:19-21). Ma den wortoe foe na apostel Paulus na 1 Korentesma 7:10-17 e gi trowpatna deki-ati foe tan na makandra. A no de foe taki, dati efoe den wani troetroe kolokoe, dan den moesoe de getrow na makandra. Paulus ben skrifi: „A trowlibi moesoe de krin na mindri ala sma, èn a trowbedi sondro flaka, bika Gado sa kroetoe hoeroeman nanga soetaman” (Hebrewsma 13:4). A wortoe „trowbedi” e sori go na a sekslibi di wan man nanga wan oema abi di trow nanga makandra na lanti. No wan tra seks libimakandra, soleki a trow di wan man trow nanga moro leki wán wefi, wi kan taki dati a de „krin na mindri ala sma”. Boiti dati, bijbel e kroetoe seks di wan sma abi bifo a trow èn a e kroetoe homo sekslibi toe. — Romesma 1:26, 27; 1 Korentesma 6:18.
12. San na wan toe foe den takroe bakapisi foe hoeroedoe?
12 Hoeroedoe kan gi a skin wan toe momenti foe prisiri, ma a no abi troetroe kolokoe leki bakapisi. A no e plisi Gado èn a kan tan fon a konsensi foe a sma (1 Tesalonikasma 4:3-5). A sari bakapisi foe abi seks dorosei foe a trowlibi kan de AIDS (SIDA), nanga tra siki di sma e kisi nanga jepi foe seks. „Den ben taki dati ala jari moro leki 250 miljoen sma na heri grontapoe e kisi droipi, èn so wan 50 miljoen sma e kisi sifilis”, na so wan medisch raport e taki. A problema de toe taki sma e kisi bere di den no wani. Na International Planned Parenthood Federation (Na Internationaal orga foe tron papa nanga mama na wan frantiwortoe fasi) e taki dati ala jari na heri grontapoe moro leki 15 miljoen oemapikin na mindri 15 jari nanga 19 jari e kisi bere, èn wan di foe dri pisi foe den e poeroe bere. Wan ondrosoekoe na ini wán Afrikan kondre ben sori taki 72 procent foe ala den tini oemapikin di dede, ben de foe di den ben kisi problema di den ben poeroe bere. Son hoeroeman no kisi siki kande èn den no kisi bere, ma den no man lon gi problema di den kisi na emotioneelsei. Foeroe sma lasi lespeki gi densrefi èn den e tegoe srefi gi densrefi.
13. Sortoe tra problema e kon foe soetadoe ede, èn sortoe tamara de gi den sma di e go doro foe de hoeroeman nanga soetaman?
13 Ala di wan sma di doe soetadoe kan kisi pardon, tokoe bijbel e gi a patna di no fowtoe wan fasti gron foe broko a trow. (Mateus 5:32; Teki gersi Hosea 3:1-5.) Efoe so wan hoeroedoe e meki wan trowlibi broko, dan disi kan libi dipi marki na emotioneelsei na baka gi a patna di no fowtoe èn gi den pikin foe den. Foe a libisma famiri kan abi wini meki a Wortoe foe Gado e sori taki a takroe kroetoe foe Gado sa kon na tapoe hoeroeman nanga soetaman di no abi berow. Boiti dati, a e sori krin taki den sma di e tan doe seks hoeroedoe „no sa kisi a kownoekondre foe Gado”. — Galasiasma 5:19, 21.
„NO DE WAN PISI FOE GRONTAPOE”
14. (a) San na wan toe fasi foe na anbegi di sma e anbegi kroektoe gado di wan sma di e dini Gado, e tan farawe foe den? (b) Sortoe tiri wi kisi na Johanes 17:14 nanga Jesaja 2:4?
14 Den sma di wani plisi Jehovah èn njan boen foe Kownoekondre blesi, e tan farawe toe foe ala fasi foe anbegi kroektoe gado. Bijbel e sori taki a no de wan boen sani foe meki popki èn foe anbegi den, so srefi popki foe Krestes, noso foe Jesus mama Maria (Exodus 20:4, 5; 1 Johanes 5:21). So boen, troe kresten no e gi grani na prenki, kroisi, nanga popki. Den e tan farawe toe foe fasi foe anbegi kroektoe gado na wan fasi di joe no man si so krin, soleki a grani di sma e gi na fraga èn den singi di sma e singi foe gi glori na nâsi. Te sma e poti den na ondro druk foe doe den sortoe sani dati, dan den e memre den wortoe foe Jesus di a taigi Satan: „Na Jehovah, joe Gado, joe moesoe anbegi èn gi en wawan joe moesoe doe santa diniwroko” (Mateus 4:8-10). Jesus ben taki dati den bakaman foe en „no de wan pisi foe grontapoe” (Johanes 17:14). Disi wani taki dati den moesoe de neutraal ini politiek afersi èn libi ini vrede akroederi Jesaja 2:4, di e taki: „A [Jehovah Gado] o tjari kroetoe kon na mindri den nâsi èn poti sani reti ini a tori foe foeroe pipel. Èn den sa moesoe naki den feti-owroe foe den tron ploegoe èn den lansri foe den tron kron-nefi. Nâsi no sa opo feti-owroe gi makandra, so srefi den no sa leri feti moro.”
15. San na Babilon a Bigiwan, èn san foeroe njoen bijbel studenti e doe foe komoto na en?
15 Efoe wan sma „no de wan pisi foe grontapoe”, dan dati wani taki toe dati a moesoe broko ala banti di a abi nanga „Babilon a Bigiwan”, a grontapoemakti foe falsi relisi. Anbegi di no krin, ben panja komoto na Babilon foe owroeten te leki a ben abi makti na jejefasi na tapoe sma na heri grontapoe nanga takroe bakapisi. „Babilon a Bigiwan” na ala relisi di den leri nanga den doe foe den no de akroederi a sabi foe Gado (Openbaring 17:1, 5, 15). No wan getrow anbegiman foe Jehovah sa teki prati na sani foe go moksi densrefi nanga sani di tra bribi e doe foe di den e go anbegi makandra nanga difrenti relisi noso foe di den abi demakandra na jejefasi nanga iniwan pisi foe Babilon a Bigiwan (Numeri 25:1-9; 2 Korentesma 6:14). Foe dati ede foeroe njoen bijbel studenti seni wan brifi go na a relisi organisâsi pe den de na ini, foe taigi den taki den e libi na organisâsi dati. Disi tjari den moro krosibei na a troe Gado, soleki fa a ben pramisi: „’Komoto na den mindri èn poti oensrefi aparti’, Jehovah e taki, ’èn no fasi a sani moro di no krin’; ’èn mi sa teki oenoe’” (2 Korentesma 6:17; Openbaring 18:4, 5). Joe srefi no e angri srefisrefi foe wi hemel Tata e feni joe boen?
FESADEI NANGA FRIJARIDEI
16. Foe san ede troe kresten no e hori kresneti?
16 Libi na a fasi fa Gado wani e fri wi foe hori den fesa foe grontapoe di nofo tron de wan hebi. Foe eksempre, bijbel no e sori soifri na sortoe dei Jesus mama ben meki en. ’Mi ben prakseri taki Jesus ben gebore tapoe 25 december!’ son sma e taki kande. Disi no kan, foe di a dede na ini a lente foe 33 G.T. di a ben abi 33 1/2 jari. Boiti dati, na a ten di en mama ben meki en, skapoeman ben „tan na dorosei èn ben e hori wakti gi den ipi foe den na neti ten” (Lukas 2:8). Na a kondre Israèl, a lasti pisi foe december na wan kowroe alen ten, èn na a ten dati den ben sa hori den skapoe na inisei na neti ten foe kibri den gi a winter. Foe taki en leti, den Romesma ben poti 25 december leki a frijaridei foe a gado foe den foe a son. Foeroe jarihondro baka di Jesus de na grontapoe, kresten di ben fadon komoto na bribi, ben teki a dei disi abra foe hori a fesa foe a dei di Krestes ben gebore. Foe dati ede, troe kresten no e hori kresneti noso iniwan tra fesa di gron tapoe falsi relisi bribi. Bika den e gi densrefi na ini a dini foe Jehovah wawan, meki den no e hori fesa toe di e gi grani na sondoe libisma noso na nâsi.
17. Foe san ede sma di e dini Gado no e hori frijari-oso, èn foe san ede kresten pikin tokoe de kolokoe?
17 Bijbel e kari spesroetoe soso toe frijaridei di sma ben hori, èn ala toe ben abi foe doe nanga sma di no ben dini Gado (Genesis 40:20-22; Mateus 14:6-11). Foe san ede wi moesoe poti spesroetoe prakseri na tapoe den frijaridei foe onvolmaakti libisma efoe den Boekoe foe bijbel no e sori a datum di a volmaakti man Jesus Krestes ben gebore? (Preikiman 7:1) A no de foe taki, dati papa nanga mama di e dini Gado, no e wakti wan spesroetoe dei foe sori lobi gi den pikin foe den. Wan kresten oemapikin foe 13 jari ben taki: „Mi famiri nanga mi abi wan lo prisiri. . . . Mi abi wan krosibei banti nanga mi papa nanga mama, èn te tra pikin e aksi foe san ede mi no e hori frijaridei, dan mi e taigi den taki ala dei na wan fesadei.” Wan kresten jongoewan foe 17 jari ben taki: „Na oso wi e gi presenti foeroe leisi na ini wan jari.” Moro kolokoe e kon te den presenti e gi sondro taki mofo ben meki na fesi gi disi.
18. Sortoe fesa di moesoe hori ala jari, Jesus ben gi den bakaman foe en a komando foe hori, èn na san a e memre wi?
18 Gi den sma di e feti foe libi na a fasi fa Gado wani, wan dei de ibri jari di den moesoe hori spesroetoe. Dati na a Avondmaal foe Masra, di foeroe tron den e kari a Memrefesa foe a dede foe Krestes. Ini a tori disi Jesus ben gi den bakaman foe en a komando: „Tan doe disi foe memre mi” (Lukas 22:19, 20; 1 Korentesma 11:23-25). Di Jesus ben seti a njanjan disi na a neti foe 14 Nisan foe a jari 33 G.T., a ben gebroiki brede sondro sroedeki nanga redi win, di ben prenki en libisma skin di no abi sondoe, nanga en volmaakti broedoe (Mateus 26:26-29). Kresten di salfoe nanga a santa jeje foe Gado, e meki gebroiki foe den simbôl disi. Den teki den poti ini a njoen froebontoe èn ini a froebontoe gi a Kownoekondre, èn den abi wan howpoe foe go na hemel (Lukas 12:32; 22:20, 28-30; Romesma 8:16, 17; Openbaring 14:1-5). Tokoe ala den sma di de drape e kisi wini foe a fesa disi di den moesoe hori ala jari tapoe a neti di de a srefi nanga 14 Nisan foe na owroeten djoe kalender. A e memre den na a lobi di Jehovah Gado nanga Jesus Krestes sori foe gi a loesoe-ofrandi foe verzoen sma nanga Gado, di e meki taki den wan di abi a boen-ati foe Gado, kan libi foe têgo. — Mateus 20:28; Johanes 3:16.
WROKO NANGA ONTSPANNING
19. Nanga sortoe problema kresten e kisi foe doe te den e go wroko?
19 Troe kresten abi a froeplekti foe wroko tranga èn sorgoe gi den sani di den abi fanowdoe. Te osofamiri edeman e doe disi, dan dati e gi den wan tevrede firi (1 Tesalonikasma 4:11, 12). A no de foe taki, dati efoe a wroko foe wan kresten ben de kontrari bijbel, dan disi ben sa poeroe a kolokoe foe en. Ma son leisi a moeilek gi wan kresten foe feni wroko di de akroederi den bijbel markitiki. Foe eksempre, a wrokobasi e aksi son wrokoman foe bedrigi den sma di e kon bai sani. Na a tra sei, foeroe wrokobasi sa meki skeki foe fiti ensrefi na a konsensi foe wan eerlijk wrokoman, foe di a no wani lasi wan eerlijk wrokoman. Ma awinsi san e pasa, joe kan de seiker taki Gado sa blesi den moeiti di joe e doe foe feni wan wroko di e gi joe wan krin konsensi. — 2 Korentesma 4:2.
20. Foe san ede wi moesoe loekoe boen sortoe ontspanning wi e teki?
20 Foe di Gado wani taki den foetoeboi foe en moesoe de kolokoe, dan wi moesoe meki tranga wroko de ini balansi nanga ten foe teki ontspanning di e gi kowroe-ati, nanga rostoe (Markus 6:31; Preikiman 3:12, 13). A grontapoe foe Satan e meki ontspanning di no boen, go na fesi. Ma foe meki Gado feni wi boen, dan wi moesoe loekoe boen nanga den boekoe di wi e leisi, den radio programa nanga a pokoe di wi e arki, den show, den film, den komedi prei, den telefisi programa, nanga den video di wi e loekoe. Efoe na ontspanning di wi ben teki fosi de teige den warskow di de ini den tekst leki Deuteronomium 18:10-12, Psalm 11:5, nanga Efeisesma 5:3-5, dan wi sa meki Jehovah feni wi boen èn de moro kolokoe efoe wi e tjari kenki kon.
LESPEKI GI A LIBI NANGA BROEDOE
21. Fa a lespeki di wi abi gi a libi moesoe abi krakti na tapoe a fasi fa wi e si a poeroe di sma e poeroe bere èn so srefi na tapoe den gwenti foe wi èn a fasi fa wi e tjari wisrefi?
21 Foe kan kisi troetroe kolokoe, wi moesoe si a libisma libi leki wan santa sani, neleki fa Jehovah e si en. A Wortoe foe en e tapoe wi foe kiri sma (Mateus 19:16-18). Te joe loekoe en boen, dan a Wet foe Gado di a gi Israèl, e sori taki a e si a foetus leki wan libi di abi foeroe waarde — a no wan sani di moesoe kisi pori (Exodus 21:22, 23). Foe dati ede wi no moesoe handri nanga a libi leki wan sani di abi pikinso waarde foe di wi e gebroiki tabaka, e doe wi skin ogri foe di wi e gebroiki drugs noso sopi, noso foe di wi e doe sani di e poti wi libi ini kefar sondro foe a de fanowdoe. Wi no moesoe teki prati toe na iniwan sani di sma e feti na baka èn di e tjari a libi kon ini kefar noso no gi jesi na warskow di gi foe kibri wi libi di ben sa kan abi leki bakapisi taki wi abi broedoe paiman. — Deuteronomium 22:8.
22. (a) Fa Gado e si broedoe èn a fasi fa a moesoe gebroiki? (b) A broedoe foe soema wawan e kibri libi troetroe?
22 Jehovah ben taigi Noa nanga en osofamiri taki broedoe e prenki a sili, noso a libi. Foe dati ede Gado ben tapoe den foe njan iniwan broedoe (Genesis 9:3, 4). Foe di wi na den bakapikin foe den, meki wi alamala de na ondro a wet dati. Jehovah ben taigi den Israèlsma taki den ben moesoe kanti a broedoe trowe na tapoe a gron èn sma no ben moesoe gebroiki en gi den eigi prakseri (Deuteronomium 12:15, 16). Èn ete wan tron den ben gi a wet foe Gado ini a tori foe broedoe, di den fosi jarihondro kresten ben kisi a komando: „Tan farawe . . . foe broedoe” (Tori foe den Apostel 15:28, 29). Foe di sma di e dini Gado e lespeki a santafasi foe libi, meki den no e teki broedoe transfusie, srefi efoe trawan e taki nomonomo dati efoe den e doe disi, dan den ben sa kibri a libi. Foeroe tra fasi foe dresi sma di Jehovah Kotoigi e feni boen, sori foe de heri boen èn den no e meki wan sma kon ini a kefar di de te wan sma e teki broedoe transfusie. Kresten sabi taki soso a broedoe foe Jesus di trowe gi wi, e kibri a libi troetroe. Efoe wi e poti bribi na ini disi, dan wi e kisi pardon èn a e gi wi a howpoe foe libi foe têgo. — Efeisesma 1:7.
23. San na wan toe pai di wan sma e kisi te a e libi na a fasi fa Gado wani?
23 A de krin, taki foe libi na a fasi fa Gado wani e aksi foe wi taki wi e doe moeiti. Kande a abi leki bakapisi taki memre foe na osofamiri noso mati e spotoe wi (Mateus 10:32-39; 1 Petrus 4:4). Ma den pai di wan sma e kisi te a e libi so wan libi, e pasa ala tesi. A abi leki bakapisi taki wan sma e kisi wan krin konsensi èn a e meki wi kisi wan boen matifasi nanga kompe anbegiman foe Jehovah (Mateus 19:27, 29). Èn prakseri toe foe a libi di wi sa libi foe têgo na ini a regtfardiki njoen grontapoe foe Gado (Jesaja 65:17, 18). Èn a de troetroe wan prisiri sani foe gi jesi na bijbel rai èn e prisiri na ati foe Jehovah na so fasi! (Odo 27:11) A no de foe froewondroe, taki te wi e libi na a fasi fa Gado wani, dan dati e tjari kolokoe kon! — Psalm 128:1, 2.
ONDROSOEKOE A SABI FOE JOE
San na wan toe reide foe san ede a e tjari kolokoe kon te wi e libi na a fasi fa Gado wani?
Sortoe kenki wi moesoe tjari kon foe libi na a fasi fa Gado wani?
Foe san ede joe wani libi na a fasi fa Gado wani?
[Aksi foe a tori disi]
[Prenki na tapoe bladzijde 124, 125]
Te wi e meki aktiviteit na jejefasi de ini balansi nanga ten foe teki ontspanning, dan dati kan meki den wan di e libi na a fasi fa Gado wani, de kolokoe
