Lès 15

Jepi tra sma foe doe a wani foe Gado

Foe san ede joe moesoe froeteri tra sma foe den sani di joe e leri? (1)

Nanga soema joe kan prati a boen njoensoe? (2)

Sortoe krakti a fasi fa joe e tjari joesrefi kan abi tapoe tra sma? (2)

O ten joe kan preiki makandra nanga a gemeente? (3)

1. Te nanga now joe leri foeroe boen sani foe bijbel. A sabi disi moesoe meki joe kweki a sortoe sma di wi moesoe de leki kresten (Efeisesma 4:22-24). So wan sabi de prenspari foe joe kisi têgo libi (Johanes 17:3). Ma tra sma moesoe jere a boen njoensoe toe, so taki den toe kan kisi froeloesoe. Ala troe kresten moesoe gi kotoigi na tra sma. Dati na a komando foe Gado. — Romesma 10:10; 1 Korentesma 9:16; 1 Timoteus 4:16.

2. Joe kan bigin foe di joe e prati den boen sani di joe e leri, nanga den sma di de krosibei foe joe. Froeteri den na joe famiri, mati, skoromati nanga kompe wrokoman. De nanga switifasi èn nanga pasensi te joe e doe dati (2 Timoteus 2:24, 25). Memre taki sma e loekoe foeroe tron na a fasi fa wan sma e tjari ensrefi moro leki den e arki na san a sma e taki. So boen, a boen fasi fa joe e tjari joesrefi kan hari tra sma foe arki a boskopoe di joe e froeteri den. — Mateus 5:16; 1 Petrus 3:1, 2, 16.

3. Baka wan pisi ten, a kan de taki joe doro den markitiki foe bigin go preiki nanga a gemeente foe Jehovah Kotoigi di de ini a birti pe joe e libi. Disi na wan prenspari stap ini a go di joe e go na fesi (Mateus 24:14). Fa a ben sa de wan prisiri sani efoe joe ben man jepi wan tra sma foe tron wan foetoeboi foe Jehovah èn kisi têgo libi! — 1 Tesalonikasma 2:19, 20.