Lès 2

Soema na Gado?

Soema na a troe Gado, èn san na en nen? (1, 2)

Sortoe skin a abi? (3)

San na den aparti eigifasi foe en? (4)

Wi moesoe gebroiki popki nanga simbôl te wi e anbegi en? (5)

San na toe fasi di wi kan leri sabi Gado? (6)

1. Sma e anbegi foeroe sani. Ma bijbel e froeteri wi taki soso wán TROE Gado nomo de. A ben meki ala sani na hemel èn na grontapoe. En na a wan-enkri Sma di wi moesoe anbegi, foe di na en ben gi wi libi. — 1 Korentesma 8:5, 6; Openbaring 4:11.

2. Gado abi foeroe titel, ma a abi soso wán nen. A nen dati na JEHOVAH. Na ini moro foeroe bijbel, den poeroe a nen foe Gado èn poti na ini a presi foe dati den titel MASRA noso GADO. Ma di den ben skrifi bijbel, a nen Jehovah ben de foe feni so wan 7000 tron na ini! — Exodus 3:15; Psalm 83:18.

3. Jehovah abi wan skin, ma a no de leki di foe wi. „Gado na wan Jeje”, bijbel e taki (Johanes 4:24). Wan jeje na wan  sortoe libi di hei moro leki di foe wi. No wan sma oiti si Gado. Jehovah e libi na hemel, ma a kan si ala sani (Psalm 11:4, 5; Johanes 1:18). Ma san na a santa jeje dan? A no de wan sma leki Gado. Na presi foe dati, a de a wroko krakti foe Gado. — Psalm 104:30.

4. Bijbel e tjari a sortoe sma di Jehovah de kon na krin gi wi. A e sori taki den aparti eigifasi foe en na lobi, geregtighèit, koni nanga makti (Deuteronomium 32:4; Job 12:13; Jesaja 40:26; 1 Johanes 4:8). Bijbel e froeteri wi taki a abi so srefi sari-ati, switifasi, a e gi pardon, a lobi gi sani, èn a abi pasensi. Wi, leki pikin di e gi jesi, moesoe proeberi foe waka na en baka. — Efeisesma 5:1, 2.

5. Wi moesoe boigi na gron gi popki, prenki noso simbôl noso begi na den na ini wi anbegi? Nôno! (Exodus 20:4, 5) Jehovah e taki dati wi moesoe anbegi en wawan. A no sa gi na no wan sma noso na no wan tra sani wan pisi foe en glori. Popki no abi krakti foe jepi wi. — Psalm 115:4-8; Jesaja 42:8.

6. Fa wi kan kon sabi Gado moro boen? Wán fasi na foe loekoe den sani di a meki èn prakseri dipi foe san den e froeteri wi. Den sani di Gado meki e sori wi taki a abi bigi makti nanga koni. Wi e si a lobi foe en na ini ala san a meki (Psalm 19:1-6; Romesma 1:20). Wan tra fasi fa wi kan leri sabi Gado na foe studeri bijbel. Na ini bijbel a e froeteri wi moro foeroe foe a sortoe Gado di a de. A e froeteri wi toe san a abi na prakseri èn san a wani wi foe doe. — Amos 3:7; 2 Timoteus 3:16, 17.

[Prenki na tapoe bladzijde 5]

Wi e leri sabi Gado nanga jepi foe den sani di a meki èn nanga jepi foe bijbel