KAPITEL 37

Mi musu dopu?

Poti wan marki na den sani di e kon now fu sori efu den bun noso fowtu:

Wan Kresten musu dopu.

□ Bun

□ Fowtu

A moro prenspari reide fu teki dopu, na fu kibri yusrefi so taki yu no sondu.

□ Bun

□ Fowtu

Dopu e meki taki yu kan kisi frulusu.

□ Bun

□ Fowtu

Efu yu no dopu, dan yu no abi fu gi frantwortu na Gado fu den sani di yu e du.

□ Bun

□ Fowtu

Efu den mati fu yu o dopu, dan dati wani taki dati yu kan dopu tu.

□ Bun

□ Fowtu

EFU yu e gi yesi na Gado, efu yu e du muiti fu tron wan moro bun mati fu Gado, èn efu yu e fruteri trawan san yu e bribi, dan a de wan gewoon sani taki yu o wani dopu. Ma fa yu sabi efu yu kaba fu dopu? Fu yepi yu piki na aksi disi, kon meki wi luku den sani di skrifi dyaso na tapusei pe yu ben musu skrifi efu den bun noso fowtu.

● Wan Kresten musu dopu.

Bun. Yesus ben taigi den disipel fu en taki den ben musu dopu (Mateyus 28:19, 20). Fu taki en leti, Yesus srefi dopu. Fu man waka baka Krestes, yu musu dopu te yu lepi nofo fu man teki so wan bosroiti èn te yu wani dini Yehovah trutru.

● A moro prenspari reide fu teki dopu, na fu kibri yusrefi so taki yu no sondu.

Fowtu. Te yu e teki dopu, dan yu e meki ala sma sabi taki yu gi yu libi abra na Yehovah. A sani disi no de leki wan kontrakti di e tapu yu fu du sani di yu ben o wani du sondro taki sma sabi. Na presi fu dati, yu e gi yu libi abra na Yehovah fu di yu wani libi soleki fa en wani.

● Dopu e meki taki yu kan kisi frulusu.

Bun. Bijbel e taki dati a prenspari fu teki dopu so taki yu kan kisi frulusu (1 Petrus 3:21). Ma disi no wani taki dati dopu de leki wan verzekering di yu e pai so taki a kan kibri yu te rampu kon. Yu e dopu fu di yu lobi Yehovah èn yu wani dini en fu têgo nanga yu heri ati.​—Markus 12:29, 30.

● Efu yu no dopu, dan yu no abi fu gi frantwortu na Gado fu den sani di yu e du.

Fowtu. Yakobus 4:17 e taki: „Efu wan sma sabi fa fu du bun, ma toku a no e du dati, dan na wan sondu a du”, awinsi a no dopu. Sobun, efu yu sabi san bun èn yu lepi nofo fu go luku seryusu fa yu e libi, dan kande a ten doro fu taki a tori disi nanga yu papa, yu mama, noso wan tra lepi Kresten. Na so yu kan kon sabi san yu musu du ete fu kan teki dopu.

● Efu den mati fu yu o dopu, dan dati wani taki dati yu kan dopu tu.

Fowtu. A bosroiti di yu o teki fu dopu, musu de wan bosroiti di yusrefi teki fu di yu wani du dati (Psalm 110:3). Yu musu dopu soso te yu e frustan bunbun san a wani taki fu de wan Kotoigi fu Yehovah èn te yu de seiker taki yu o man tyari a frantwortu disi.​—Preikiman 5:4, 5.

Dopu e kenki yu libi

Te yu dopu, dan a sani dati e kenki yu libi èn a kan meki yu kisi furu blesi. Ma na wan seryusu frantwortu tu, fu di yu musu du san yu pramisi Yehovah. Dati na taki yu gi yu libi na en.

Yu de klariklari fu teki a bosroiti dati? Efu dati de so, dan yu abi bun reide fu de koloku. Yu o kisi a moro bigi grani di de. Yu o kisi a grani fu dini Yehovah nanga yu heri ati èn fu sori nanga a fasi fa yu e libi taki yu e tai hori na en.​—Mateyus 22:36, 37.

NA INI A TRA KAPITEL

Leri fa fu poti marki so taki yu kan teki koni bosroiti na ini yu libi.

PRENSPARI TEKST

„Gi un skin na Gado leki wan srakti-ofrandi di e libi, di de santa èn di Gado feni bun. Na so fasi unu o gebroiki un frustan te unu e du santa wroko.”​—Romesma 12:1.

TIP

Meki yu papa nanga mama yepi yu fu feni wan sma na ini a gemeente di kan yepi yu fu go na fesi so taki yu kan dopu.​—Tori fu den apostel 16:1-3.

YU BEN SABI A SANI DISI?

Dopu na wan tumusi prenspari pisi fu a „marki” di e sori taki yu kan kisi frulusu.​—Esekièl 9:4-6.

SANI DI MI O DU

Fu di mi wani go na fesi fu kan dopu, meki mi wani sabi moro fu den Bijbel leri disi: ․․․․․

San mi wani aksi mi papa nanga mama fu a tori disi ․․․․․

SAN YU E DENKI?

● Fu san ede a de wan seryusu sani te wan sma o dopu?

● San kan meki taki wan yongusma dopu aladi a no klari gi dati?

● Sortu fowtu denki kan meki taki wan yongusma e draidrai fu gi ensrefi abra èn dopu?

[Prenspari pisi]

„Fu di mi ben sabi taki mi dopu, meki dati yepi mi fu teki koni bosroiti èn fu no du sani di kan tyari takru bakapisi kon gi mi.”​—Holly

[Faki/Prenki]

Sani di sma gwenti aksi fu dopu

San dopu wani taki? Te den e dukrun yu heri skin na ondro watra, dan dati wani taki dati yu e dede, fu di yu no e libi moro soleki fa yu ben gwenti libi fosi. Te yu e opo komoto fu a watra, dan dati e sori taki yu kon na libi fu du a wani fu Yehovah.

San a wani taki fu gi yu libi abra na Yehovah? A wani taki dati yu no e libi gi yusrefi moro èn yu e pramisi taki yu o poti a wani fu Gado fosi ala tra sani (Mateyus 16:24). A fiti taki wan pisi ten fosi yu dopu, yu taigi Yehovah krin na ini begi dati yu gi yusrefi abra na en.

San yu musu du fosi yu dopu? Yu musu libi soleki fa Gado Wortu e taki èn yu musu fruteri trawan san yu e bribi. Yu musu meki muiti fu tron wan mati fu Gado. Yu kan du dati te yu e begi èn e studeri Bijbel. Yu musu dini Yehovah fu di yusrefi wani, a no fu di tra sma dwengi yu.

O owru yu musu de fu dopu? A no prenspari o owru yu de. Ma yu musu owru nofo fu man frustan krin san a wani taki fu dopu.

San yu musu du efu yu wani dopu ma yu papa nanga mama taki dati yu musu wakti? Kande den feni taki yu musu kisi moro ondrofeni fa fu libi leki wan Kresten. Arki a rai fu den èn gebroiki a ten te yu e wakti fu tron wan moro bun mati fu Yehovah.​—1 Samuel 2:26.

[Faki]

Werkblad

Yu wani dopu?

Gebroiki den aksi nanga den sani di skrifi na ondrosei fu si efu yu e go na fesi èn efu yu doro den marki fu dopu. No frigiti fu leisi den Bijbeltekst fosi yu skrifi san yu ben o piki.

Na sortu fasi yu e sori nownow taki yu e poti yu frutrow na tapu Yehovah?​—Psalm 71:5. ․․․․․

Fa yu sori taki yu leri fu gebroiki yu frustan fu sabi san bun èn san no bun?​—Hebrewsma 5:14. ․․․․․

O furu yu e begi?

San yu e taki te yu e begi èn san dati e sori fu a lobi di yu abi gi Yehovah?​—Psalm 17:6. ․․․․․

Skrifi na ondrosei sortu marki yu wani doro te a abi fu du nanga den begi fu yu.

Yu e studeri Bijbel ibri wiki?​—Yosua 1:8. ․․․․․

San yu e studeri?

Skrifi na ondrosei sortu marki yu wani doro te a abi fu du nanga a fasi fa yu e studeri. ․․․․․

Yu e du a preikiwroko bun? (Fu eksempre: Yu man fruklari prenspari Bijbel leri gi tra sma? Yu e go baka na sma di wani sabi moro? Yu e meki muiti fu feni wan Bijbelstudie?)

□ Iya □ No

Yu e go na ini a preikiwroko awinsi yu papa nanga mama no e go?​—Tori fu den apostel 5:42.

□ Iya □ No

Skrifi na ondrosei sortu marki yu wani doro te a abi fu du nanga a preikiwroko.​—2 Timoteyus 2:15. ․․․․․

Yu e go doronomo na den gemeente konmakandra noso yu e go wanwan leisi?​—Hebrewsma 10:25. ․․․․․

Na sortu fasi yu e teki prati na den konmakandra? ․․․․․

Yu e go na den konmakandra te yu papa nanga mama no man go (efu den taigi yu taki yu mag go)?

□ Iya □ No

Yu kan taki dati yu e prisiri trutru fu du Gado wani?​—Psalm 40:8.

□ Iya □ No

Yu kan kari wan tu situwâsi pe yu ben kakafutu gi mati di ben dwengi yu fu du wan sani di no bun?​—Romesma 12:2. ․․․․․

San yu o du fu sorgu taki a lobi di yu abi gi Yehovah tranga ala ten?​—Yudas 20, 21. ․․․․․

Yu ben o tan dini Yehovah awinsi yu papa, yu mama nanga den mati fu yu no ben o du dati moro?​—Mateyus 10:36, 37.

□ Iya □ No

[Prenki]

Neleki te wan sma bosroiti fu trow, na so dopu na wan seryusu bosroiti di e kenki wan sma en heri libi