PRAKSERI taki yu e lowe gi wan ogri-ati feanti. A tranga omeni tron moro yu èn a e lon moro tranga leki yu. Yu sabi taki a feanti disi no e sari sma, fu di yu si fa a kiri wan tu mati fu yu. Awinsi omeni muiti yu e du fu lowe gi en, toku a e kon krosibei moro nanga moro. A gersi leki howpu no de. Ma wantronso, wan frulusuman de na yu sei. A tranga omeni tron moro a feanti fu yu, èn a e pramisi taki a o yepi yu. Dati e meki yu firi korostu trutru!

² Te yu luku en bun, so wan feanti e lon na yu baka fu kiri yu. A e suku fu kiri wi alamala. Soleki fa wi ben leri na ini kapitel siksi, dan Bijbel e taki dati dede na wan feanti. Nowan fu wi kan lowe gi en, èn nowan fu wi kan wai pasi gi en. Furu fu wi si fa a feanti disi kiri sma di wi lobi. Ma Yehovah tranga omeni tron moro dede. En na a lobi-ati Frulusuman di sori kaba taki a man wini a feanti disi. Èn a e pramisi fu puru dede na pasi krinkrin. Bijbel e leri wi: "Leki lasti feanti, dede musu kon na wan kaba” (1 Korentesma 15:26). Dati na bun nyunsu trutru!

³ Meki wi luku fosi sortu firi wi e kisi te wan sma fu wi dede. Te wi sa du dati, dan dati sa yepi wi fu kon frustan wan sani di sa gi wi prisiri. Prakseri taki Yehovah e pramisi wi taki den dedewan o libi baka (Yesaya 26:19). Sobun, wi abi a howpu taki den dedewan sa kisi wan opobaka.

TE WAN LOBIWAN FU WI DEDE

⁴ Oiti yu lasi wan lobiwan na ini dede? Efu dati de so, dan a kan taki yu e firi sari trutru èn a kan hati yu taki yu no man du noti fu kenki a situwâsi. Kande den firi disi e moro yu srefisrefi. Na den momenti dati, a de fanowdu taki wi e suku trowstu na ini Gado Wortu (2 Korentesma 1:3, 4). Bijbel e yepi wi fu frustan fa Yehovah nanga Yesus e prakseri fu dede. Ala ten Yesus ben e du sani leki fa en Tata ben e du den, èn a ben sabi o furu a kan hati te yu lasi wan sma na ini dede (Yohanes 14:9). Di Yesus ben de na ini Yerusalem, a ben gwenti fu go fisiti Lasarus nanga den sisa fu en, namku Marta nanga Maria, di ben e libi na ini a foto Betania di ben de krosibei fu Yerusalem. Den ben tron bun mati fu makandra. Bijbel e taki: "Yesus ben lobi Marta, nanga en sisa, nanga Lasarus” (Yohanes 11:5). Ma soleki fa wi si na ini kapitel siksi, Lasarus ben kon dede.

⁵ Fa Yesus ben e firi di en mati kon dede? Bijbel e sori wi taki Yesus ben go na den famiriman nanga den mati fu Lasarus; den ben e sari taki Lasarus dede. Di Yesus si den, a firi sari trutru. A "soktu dipi èn a ben kon hebi gi en trutru”. Baka dati, Bijbel e taki dati "Yesus bigin krei” (Yohanes 11:33, 35). A de so taki Yesus ben e krei fu di a no ben abi howpu? Nôno, kwetikweti. Te yu luku en bun, dan Yesus ben sabi taki wan tumusi moi sani ben o pasa (Yohanes 11:3, 4). Toku a ben e firi fa a e hati te yu lasi wan sma na ini dede.

⁶ Te yu luku en bun, a sari di Yesus ben e sari de wan deki-ati gi wi. A e leri wi taki dede na wan sani di Yesus nanga en Tata, Yehovah, no lobi kwetikweti. Ma Yehovah Gado man feti teige a feanti dati, èn a man wini en! Meki wi go luku san Yesus ben man du nanga yepi fu a krakti di Gado ben gi en.

"LASARUS, KON NA DORO!”

⁷ Lasarus ben beri na ini wan ston-olo, èn Yesus ben aksi den sma fu puru a ston di ben e tapu na olo. Marta no ben wani, fu di Lasarus ben dede fo dei kaba, èn a dedeskin fu en ben musu e pori kaba (Yohanes 11:39). Te wi luku a tori na wan libisma fasi, dan howpu no ben de moro.

⁸ Den lolo a ston puru, èn Yesus bari kari nanga wan tranga sten: "Lasarus, kon na doro!” San pasa baka dati? "A man di ben dede, kon na doro” (Yohanes 11:43, 44). Prakseri o breiti den sma ben de di den si san pasa! Ala den famiriman, den mati, nanga den birtisma fu Lasarus ben sabi taki a ben dede. Ma toku a srefi man di den lobi so te, ben e tanapu leti na den mindri. Den no ben man bribi san den si. A no de fu taki dati furu fu den ben brasa Lasarus nanga prisiri. Disi ben de wan trutru buweisi taki dede ben lasi a feti!

⁹ Yesus no ben taki dati a du a wondru disi nanga en eigi krakti. Fosi Yesus kari Lasarus kon na doro, a ben begi èn na ini a begi dati a ben sori krin taki Yehovah na a Sma di ben meki taki Lasarus kisi wan opobaka (Yohanes 11:41, 42). Disi no ben de a wan-enkri leisi pe Yehovah gebroiki en makti na a fasi disi. Na opobaka fu Lasarus na soso wán fu den neigi opobaka fu san Gado Wortu e taki.* A e gi wi prisiri srefisrefi te wi e leisi èn e studeri den tori disi. Den e leri wi taki Gado no e teki sma sei, bika den sma di ben kisi wan opobaka ben de yongusma, owrusma, mansma, umasma, Israelsma, nanga sma fu tra kondre. Èn den tori disi e sori a bigi prisiri di den sma ben abi! Fu eksempre, di Yesus gi wan yongu meisje wan opobaka, dan a papa nanga mama fu a pikin "bigin prisiri srefisrefi” (Markus 5:42). Iya, Yehovah ben meki taki den firi prisiri trutru, èn den no ben o frigiti dati noiti moro.

¹⁰ A no de fu taki dati den sma di Yesus ben gi wan opobaka, dede bakaten. A sani disi wani taki dati na fu soso den ben kisi wan opobaka? Kwetikweti. Den Bijbel tori disi e horibaka gi prenspari tru tori èn den e gi wi howpu.

SAN WI E LERI FU DEN TORI DI E TAKI FU SMA DI KISI WAN OPOBAKA

¹¹ Bijbel e leri wi taki den dedewan "no sabi notinoti”. Den no de na libi, èn den no de na wan tra presi. A tori fu Lasarus e sori taki disi de tru. San Lasarus fruteri sma baka di a kisi wan opobaka? A de so taki a fruteri den wan lo span tori fu hemel? Noso a ben e frede den sma nanga wan lo tori fu wan hel pe sma e bron? Nôno. Na nowan presi na ini Bijbel wi kan leisi taki Lasarus taki den sortu sani disi. Na ini den fo dei di a ben dede, a ’no ben sabi notinoti’ (Preikiman 9:5). Lasarus ben e sribi nomo na ini dede.—Yohanes 11:11.

¹² A tori fu Lasarus e leri wi tu taki na opobaka a no wan anansitori, ma a de wan trutru sani. Yesus gi Lasarus wan opobaka leti na fesi wan grupu fu sma di ben si san ben pasa. Srefi den kerki fesiman di ben abi bita-ati gi Yesus no ben man taki dati a wondru disi no ben pasa trutru. Na presi fu dati den ben taki: "San wi musu du, bika a man disi [Yesus] e du someni wondru?” (Yohanes 11:47) Furu sma ben go luku Lasarus, baka di a kisi wan opobaka. Leki bakapisi fu dati, moro sma ben poti bribi na ini Yesus. Gi den sma dati, Lasarus ben de wan libilibi buweisi taki na Gado ben seni Yesus kon. Disi ben de so wan bigi buweisi taki sonwan fu den ogri-ati Dyu kerki fesiman ben wani kiri Yesus, èn sosrefi Lasarus.—Yohanes 11:53; 12:9-11.

¹³ Ma yu denki taki a de wan don sani fu bribi taki na opobaka na wan trutru sani? Nôno, fu di Yesus ben leri sma taki wan dei sa kon te "ala den sma di de na ini den grebi” sa kisi wan opobaka (Yohanes 5:28). Yehovah na a Mekiman fu ala sani di de na libi. A musu muilek gi wi fu bribi taki A man gi wan sma libi baka? A no de fu taki dati Yehovah ben o abi fu memre furu sani. Yehovah man memre den lobiwan fu wi di dede? Milyardmilyard stari de na hemel, toku Gado sabi a nen fu ibriwan fu den! (Yesaya 40:26) Sobun, Yehovah Gado kan memre ibri pikinpikin sani fu den lobiwan fu wi di dede, èn a de klariklari fu gi den libi baka.

¹⁴ Ma fa Yehovah e firi fu a gi di a o gi den dedewan wan opobaka? Bijbel e leri wi taki a e angri fu gi den dedewan wan opobaka. A getrow man Yob ben aksi: "Efu wan tranga man dede, a kan libi baka?” Yob ben e taki fu a wakti di a ben o wakti na ini a grebi teleki a ten ben o doro fu Gado memre en. A ben taigi Yehovah: "Yu sa kari, èn misrefi sa piki yu. Yu sa angri fu a wroko fu yu anu.”—Yob 14:13-15.

¹⁵ Prakseri a sani disi! Te yu luku en bun, Yehovah e angri fu gi den dedewan libi baka. A no e prisiri yu ati fu sabi taki Yehovah wani du dati trutru? Ma fa a de nanga na opobaka di musu kon ete? Suma sa kisi wan opobaka, èn pe?

"ALA DEN SMA DI DE NA INI DEN GREBI”

¹⁶ Den tori di skrifi na ini Bijbel èn di e taki fu sma di kisi wan opobaka, e leri wi furu fu na opobaka di musu kon ete. Den sma di ben kisi wan opobaka leti dyaso na grontapu, ben miti baka nanga den lobiwan fu den. So a o de tu te sma kisi wan opobaka na ini a ten di e kon, ma na a ten dati a o moro bun srefi. Na ini kapitel 3 wi ben leri taki Gado wani taki heri grontapu musu tron wan paradijs. Sobun, den dedewan no sa kisi wan opobaka na ini wan grontapu di lai nanga orloku, ogridu, èn siki. Den sa abi na okasi fu libi fu têgo na tapu a grontapu disi, pe vrede sa de èn pe den sa prisiri.

¹⁷ Suma sa kisi wan opobaka? Yesus ben taki dati "ala den sma di de na ini den grebi o yere en [Yesus] sten, èn den o komopo drape” (Yohanes 5:28, 29). Openbaring 20:13 e taki tu: "A se lusu den dedesma di ben de na ini en, èn dede nanga Hades lusu den dedesma di ben de na ini den.” "Hades” e sori go na a grebi fu libisma (Luku a pisi tori di nen "Tra prenspari sani”). A grebi disi pe ala den dedewan de, sa kon leigi. Ala den milyardmilyard sma di e rostu drape sa libi baka. Na apostel Paulus ben taki: "Gado sa gi wan opobaka na den regtfardikiwan èn na den onregtfardikiwan” (Tori fu den Apostel 24:15). San dati wani taki?

¹⁸ Na mindri "den regtfardikiwan” disi yu abi furu sma fu suma wi e leisi na ini Bijbel èn di ben e libi fosi Yesus kon na grontapu. Kande yu e prakseri Noa, Abraham, Sara, Moses, Rut, Ester, èn furu tra sma. Kapitel 11 fu a Bijbel buku Hebrewsma e taki fu wan tu fu den man nanga uma disi di ben abi tranga bribi na ini Gado. Ma den futuboi fu Yehovah di e dede na ini a ten disi na "den regtfardikiwan” tu. Tangi fu na opobaka howpu meki wi no abi fu frede dede.—Hebrewsma 2:15.

¹⁹ Fa a de nanga ala den sma di no dini Yehovah, noso di no gi yesi na en, fu di den no ben sabi en srefisrefi? Gado no sa frigiti den milyardmilyard "onregtfardikiwan” disi. Den sa kisi wan opobaka tu èn den sa kisi na okasi fu kon leri sabi a tru Gado èn fu dini en. Na ini wan pisi ten fu wán dusun yari, den dedewan sa kisi wan opobaka èn den sa kisi na okasi fu dini Yehovah, makandra nanga tra getrow libisma na grontapu. A sa de wan tumusi moi ten. Disi na a pisi ten di Bijbel e kari a Krutudei.^#

²⁰ A sani disi wani taki dati ala sma di dede sa kisi wan opobaka? Nôno. Bijbel e taki dati sonwan fu den dedewan de na ini "Gehena” (Lukas 12:5). A nen Gehena teki puru fu wan doti-ipi di ben de na dorosei fu Yerusalem fu owruten. Sma ben e bron dedeskin nanga doti drape. Den dedeskin di den ben e trowe drape ben de fu sma di den Dyu ben e si leki sma di no warti fu poti na ini wan grebi èn fu kisi wan opobaka. Sobun, a fiti fu agersi Gehena nanga a têgo pori di sma kan kisi. Aladi na Yesus o krutu den libiwan nanga den dedewan, toku Yehovah srefi na a Krutuman (Tori fu den Apostel 10:42). Noiti Yehovah sa gi sma wan opobaka efu a e si den leki ogriman di no wani kenki.

NA OPOBAKA FU GO NA HEMEL

²¹ Bijbel e taki sosrefi fu wan tra sortu opobaka, namku na opobaka fu go libi na ini hemel leki wan yeye libisani. Na ini Bijbel wi e leisi fu wán sma nomo di kisi na opobaka disi; a sma dati na Yesus Krestes.

²² Baka di den kiri Yesus na grontapu, Yehovah no ben libi En getrow Manpikin na ini a grebi (Psalm 16:10; Tori fu den Apostel 13:34, 35). Gado ben gi Yesus wan opobaka, ma no leki wan libisma. Na apostel Petrus e taki dati ’sma kiri Krestes di a ben de wan libisma, ma taki a kon na libi leki wan yeye’ (1 Petrus 3:18). Disi ben de wan bigi wondru trutru. Yesus ben kisi libi baka leki wan makti yeye! (1 Korentesma 15:3-6) Yesus ben de a fosi sma di kisi a tumusi moi opobaka disi (Yohanes 3:13). Ma en no ben o de a lasti wan.

²³ Fu di Yesus ben sabi taki heri esi a ben o drai go baka na hemel, meki a taigi den getrow bakaman fu en dati a ben o go fu "sreka wan presi” gi den drape (Yohanes 14:2). Yesus ben kari den wan di ben o go na hemel en "pikin ipi” (Lukas 12:32). Omeni sma ben o de na ini a pikin grupu disi fu getrow Kresten? Na ini Openbaring 14:1 na apostel Yohanes e taki: "Mi si a Pikin Skapu [Yesus Krestes] e tanapu na tapu Sionbergi, makandra nanga wan hondro fotenti na fo dusun sma; a nen fu en nanga a nen fu en Tata ben skrifi na tapu den fesi-ede.”

²⁴ Den 144.000 Kresten disi e kisi wan opobaka fu libi na ini hemel; den getrow apostel fu Yesus de na ini a grupu disi tu. O ten den e kisi wan opobaka? Na apostel Paulus ben skrifi taki den ben o kisi wan opobaka na a ten fu a denoya fu Krestes (1 Korentesma 15:23). Soleki fa yu sa leri na ini kapitel 9, wi e libi now na ini a ten dati. Sobun, te sma fu a pikin grupu di tan abra fu den 144.000 e dede na ini a ten fu wi, dan wantewante den e kisi wan opobaka fu go libi na ini hemel (1 Korentesma 15:51-55). Ma a moro bigi pisi fu a libisma famiri abi a howpu fu kisi wan opobaka fu libi na wan Paradijs grontapu na ini a ten di e kon.

²⁵ Fu tru, Yehovah sa wini a feanti fu wi, namku dede, èn fu têgo dede no sa de moro! (Yesaya 25:8) Ma kande yu e aksi yusrefi: ’San den wan di kisi wan opobaka fu libi na ini hemel sa go du drape?’ Den sa de wan pisi fu wan tumusi moi Kownukondre tirimakti na ini hemel. Na ini a kapitel di e kon wi sa leri moro fu a tirimakti dati.

*  Den tra tori de fu feni na ini 1 Kownu 17:17-24; 2 Kownu 4:32-37; 13:20, 21; Mateyus 28:5-7; Lukas 7:11-17; 8:40-56; Tori fu den Apostel 9:36-42; nanga 20:7-12.

^#  Efu yu wani sabi moro fu a Krutudei èn fu a fasi fa sma sa kisi krutu, grantangi luku a pisi tori di nen "Tra prenspari sani”.