1, 2. San Yehovah srefi taigi dri apostel fu Yesus èn san den du?

 SAN yu ben o du efu Yehovah Gado srefi ben o aksi yu fu du wan sani? Yu ben o draidrai fu du en? Kwetikweti! A no de fu taki dati yu ben o wani du en wantewante, awinsi san a ben o aksi fu yu.

² Syatu baka a Pinksterfesa fu a yari 32, wan srefi sortu sani pasa nanga den apostel Petrus, Yakobus nanga Yohanes. (Leisi Mateyus 17:1-5.) Di den ben de nanga Masra Yesus na tapu „wan hei bergi”, den si na ini wan fisyun fa Yesus ben o de wan makti Kownu na hemel. A fisyun ben de so krin, taki Petrus ben wani bow tenti gi den sma di a ben si na ini a fisyun. Petrus ben e taki ete, di wan wolku tapu den. Dan en nanga den tra apostel yere wan sani di wan tu sma nomo kisi a grani fu yere. Den yere Yehovah en eigi sten. Baka di Yehovah taki dati Yesus na en Manpikin, a taigi den krin: „Un arki en.” Den apostel ben teki a rai di Gado gi den. Den arki den sani di Yesus leri den èn den ben gi tra sma deki-ati fu du a srefi sani tu.​—Tori 3:19-23; 4:18-20.

3. (a) Fu san ede Yehovah wani taki wi musu arki en Manpikin? (b) Fu sortu sani wi musu kon sabi moro?

³ Te wi e gi yesi na den wortu „Un arki en”, dan wi srefi kan kisi wini (Rom. 15:4). Fu san ede? Fu di Yesus na Yehovah en Boskopuman. Ibri tron te Yesus ben e opo en mofo fu gi sma leri, a ben taki sani di en Papa ben wani wi fu sabi (Yoh. 1:1, 14). A moro prenspari sani di Yesus ben taki fu en, ben de Gado Kownukondre. Disi na a Mesias tirimakti pe Krestes Yesus o tiri makandra nanga 144.000 sma. Fu di a Kownukondre ben de so prenspari gi Yesus, meki a bun te wi srefi kon sabi moro fu dati (Openb. 5:9, 10; 14:1-3; 20:6). Ma fosi wi du dati, meki wi luku fu san ede Yesus ben e taki so furu fu Gado Kownukondre.

4. Fa Yesus ben sori taki a Kownukondre prenspari gi en trutru?

⁴ Fu san ede wi kan taki dati a Kownukondre prenspari srefisrefi gi Yesus? Fu di den sani di wan sma e taki e sori san de na ini en ati. Sobun, den sani di wi e taki e sori san prenspari gi wi trutru. Yesus srefi ben taki: „San furu na ati, na dati mofo e taki” (Mat. 12:34). Ibri okasi di Yesus ben kisi, a ben e taki wan sani fu a Kownukondre. Na ini den Bijbel buku di e taki fu Yesus libi, moro leki 100 leisi wan sani skrifi fu a Kownukondre. Furu fu den sani dati na sani di Yesus ben taki. A moro prenspari sani di a ben e preiki, ben de a Kownukondre. Ensrefi ben taki: „Mi musu go fruteri a bun nyunsu fu Gado Kownukondre na tra foto tu, bika na fu disi Gado ben seni mi kon” (Luk. 4:43). Srefi baka di a kisi wan opobaka, Yesus ben e fruteri den disipel fu a Kownukondre (Tori 1:3). A no de fu taki dati Yesus ati ben furu nanga warderi gi a Kownukondre èn disi ben meki taki a ben e taki fu en ala ten.

5-7. (a) Fa wi du sabi taki a Kownukondre prenspari gi Yehovah? Gi wan eksempre. (b) Fa wi kan sori taki a Kownukondre prenspari gi wi tu?

⁵ A Kownukondre prenspari gi Yehovah tu. Fa wi du sabi dati? We, Yehovah ben seni en wan-enkri Manpikin kon na grontapu. Den sani di en Manpikin ben taki èn leri sma, na sani di kon fu Yehovah (Yoh. 7:16; 12:49, 50). Na Yehovah meki sma skrifi ala sani tu di de na ini den Bijbel buku di e taki fu Yesus libi nanga en diniwroko. Prakseri san disi wani taki.

⁶ Kon meki wi taki dati yu wani poti fowtow fu yu famiri na ini wan fowtow-album. Yu abi bun furu fowtow, ma na album no abi nofo presi fu poti ala den fowtow. San yu o du? We, yu o abi fu luku sortuwan yu o poti na ini na album. Yu kan taki dati den Bijbel buku di e taki fu Yesus libi de leki wan fowtow-album. Yehovah no meki den skrifiman fu den buku dati skrifi ala san Yesus taki èn du di a ben de na grontapu (Yoh. 20:30; 21:25). Na presi fu dati, den sani di Yehovah en santa yeye meki den skrifi, na sani di ben o yepi wi fu frustan suma na Yesus, fu san ede a kon na grontapu èn san prenspari trutru gi Yehovah (2 Tim. 3:16, 17; 2 Petr. 1:21). Den Bijbel buku di e taki fu Yesus libi abi furu sani di Yesus leri sma fu Gado Kownukondre. Disi e sori krin taki a Kownukondre prenspari trutru gi Yehovah. Prakseri a sani disi: Yehovah wani trutru taki wi sabi sani fu a Kownukondre!

 ⁷ Fu dati ede a bun fu aksi yusrefi: ’Gado Kownukondre prenspari gi mi tu?’ Efu disi de so, dan wi o wani sabi trutru san Yesus taki èn san a leri sma fu a Kownukondre dati. Wi o wani sabi o prenspari a Kownukondre de, fa a o kon, èn o ten a o kon.

8. Fa Yesus sori nanga wan tu wortu nomo o prenspari a Kownukondre de?

⁸ Meki wi luku a Wi Tata begi. Nanga wan tu wortu nomo Yesus sori krin o prenspari a Kownukondre de èn san a o du. Na ini a begi disi a aksi seibi sani. Den fosi dri sani abi fu du nanga Yehovah: (1) A nen fu Yehovah musu kon santa, (2) en Kownukondre musu kon, èn (3) en wani musu pasa na grontapu soleki fa a e pasa na hemel. (Leisi Mateyus 6:9, 10.) Den dri sani disi abi furu fu du nanga makandra. A Mesias Kownukondre na a sani di Yehovah o gebroiki fu meki en nen kon santa èn fu meki sani pasa soleki fa a wani.

9, 10. (a) San Gado Kownukondre o du te a kon? (b) Sortuwan fu den pramisi fu Bijbel yu wani si kon tru?

⁹ San Gado Kownukondre o du te a kon? Te wi e begi „Meki yu Kownukondre kon”, dan wi e aksi taki a Kownukondre musu tyari kenki kon. Te a Kownukondre kon, a o tiri heri grontapu. A o tyari wan kaba kon na a ogri grontapu disi nanga ala den tirimakti fu libisma èn a o tyari wan nyun grontapu kon pe retidu o de (Dan. 2:44; 2 Petr. 3:13). Te a Kownukondre o tiri, dan heri grontapu o tron wan paradijs (Luk. 23:43). Den dedewan di de na Gado prakseri o kisi libi baka èn den o de makandra baka nanga den famiri èn mati fu den (Yoh. 5:28, 29). Den libisma di e gi yesi na Gado, no o abi sondu moro èn den o man libi fu têgo (Openb. 21:3-5). Te fu kaba ala sani o waka bun na grontapu soleki fa a e pasa na hemel èn soleki fa Yehovah Gado wani. Yu no e angri fu si fa den pramisi disi fu Bijbel o kon tru? Memre taki ibri tron te yu e begi taki Gado Kownukondre musu kon, yu e begi taki den moi pramisi disi musu kon tru.

¹⁰ A de krin taki Gado Kownukondre no „kon” ete soleki fa wi e begi na ini a Wi Tata begi. Te now ete libisma e tiri grontapu èn wi no e libi na ini wan nyun grontapu pe retidu de. Ma bun nyunsu de. Gado Kownukondre seti kaba soleki fa wi o si na ini a tra kapitel. Meki wi luku fa Yesus sori o ten a Kownukondre ben o seti èn o ten a Kownukondre o tiri grontapu.

11. San Yesus sori fu a ten di a Kownukondre ben o seti?

¹¹ Son disipel fu Yesus ben denki taki a Kownukondre ben o seti na ini a fosi yarihondro, ma Yesus ben sori taki disi no ben o pasa na a ten dati (Tori 1:6). Luku san a taki na ini tu agersitori di a fruteri na ini a pisi ten fu a yari 31 nanga a yari 33.

12. Fa na agersitori fu na aleisi nanga a takru wiwiri e sori taki a Kownukondre no ben seti na ini a fosi yarihondro?

¹² Na agersitori fu na aleisi nanga a takru wiwiri. (Leisi Mateyus 13:24-30.) Soleki fa a sori, dan Yesus fruteri na agersitori disi na a bigin fu a yari 31. Baka di a fruteri na agersitori a sori den san a wani taki (Mat. 13:36-43). Disi na san na agersitori wani taki: Baka a dede fu den apostel, Didibri ben o sai takru wiwiri (falsi Kresten) na mindri na aleisi („den manpikin fu a Kownukondre” noso salfu Kresten). Na aleisi nanga a takru wiwiri ben o gro makandra wan heri pisi ten teleki a kotiten doro. A kotiwroko na „a pisi ten te a kaba fu a grontapu disi de krosibei”. Baka te a kotiten bigin, den ben o puru a takru wiwiri na mindri na aleisi èn baka dati den ben o tyari na aleisi kon na wán. Soleki fa na agersitori e sori, dan a Kownukondre no ben o seti na ini a fosi yarihondro, ma a ben o seti baka a pisi ten di na aleisi nanga a takru wiwiri ben gro makandra. Wi  kon si taki a kaba fu a pisi ten disi èn a bigin fu a kotiten ben de na ini a yari 1914.

13. Fa Yesus sori taki a no ben o tron a Mesias Kownu wantewante te a ben drai go baka na hemel?

¹³ Na agersitori fu den solfru moni. (Leisi Lukas 19:11-13.) Yesus fruteri na agersitori disi na ini a yari 33 di a ben de na pasi fu go na Yerusalem fu a lasti leisi. Sonwan fu den sma di ben e arki en ben denki taki a ben o seti a Kownukondre te den ben o doro Yerusalem. Yesus fruteri na agersitori disi fu sori den sma taki a Kownukondre no ben o seti na a ten dati, ma a ben o seti wan heri pisi ten baka dati. Yesus ben agersi ensrefi nanga „wan heihei man” di ben musu go „na wan farawe kondre fu tron kownu”. a A „farawe kondre” pe Yesus ben o go ben de hemel, pe en Tata ben o meki en tron Kownu. Ma Yesus ben sabi taki a no ben o tron a Mesias Kownu wantewante te a ben drai go baka na hemel. Na presi fu dati, a ben o sidon wakti na Gado reti-anusei teleki a ten doro fu tron Kownu. Soleki fa a sori, a ben wakti hondrohondro yari.​—Ps. 110:1, 2; Mat. 22:43, 44; Hebr. 10:12, 13.

14. (a) Sortu piki Yesus gi tapu na aksi fu den fo apostel? (b) San a kontru fu a profeititori fu Yesus e sori fu a Kownukondre èn a ten te a ben o kon?

¹⁴ Wan tu dei fosi den kiri Yesus, fo fu den apostel aksi en: „San o de a marki taki yu kon èn taki a kaba fu a grontapu disi de krosibei?” (Mat. 24:3; Mark. 13:4) Fu piki na aksi fu den, Yesus fruteri den furu sani na ini wan profeititori di wi kan leisi na ini Mateyus kapitel 24 nanga 25. Yesus ben taki finifini fu difrenti sani di ben o pasa na grontapu èn di ben o de leki wan marki fu a pisi ten te a ben o „kon”. A Kownukondre ben o seti na a bigin fu a pisi ten te Yesus ben o kon. A Kownukondre ben o kon fu tiri na grontapu na a kaba fu a pisi ten te Yesus ben o kon. Nofo buweisi de taki den sani di Yesus taki na ini a profeititori e kon tru sensi 1914. b Fu dati ede wi kan taki dati a bigin fu a pisi ten te Yesus ben o kon ben de na ini a yari 1914 èn na ini a srefi yari dati a Kownukondre seti.

15, 16. Di Yesus ben taki fu „den sma fu a ten disi”, dan suma a ben abi na prakseri?

¹⁵ Ma o ten Gado Kownukondre o kon fu tiri grontapu? Yesus no ben taki krin o ten dati ben o pasa (Mat. 24:36). Ma toku a taki wan sani di e meki wi frustan taki a ten dati de krosibei trutru. Yesus ben sori taki a Kownukondre ben o kon baka te „den sma fu a ten disi” si fa a profeititori kon tru. (Leisi Mateyus 24:32-34.)  Suma na „den sma fu a ten disi”? Meki wi luku moro fini san Yesus taki fu a pisi tori disi.

¹⁶ „Den sma fu a ten disi.” Nofo tron te Bijbel e taki fu den sma fu wan spesrutu ten, dan den wortu dati abi fu du nanga sma di abi difrenti yari, ma di e libi na ini a srefi ten dati. A pisi ten dati no langa tumusi, èn a e kon na wan kaba (Eks. 1:6). Sobun, Yesus ben e taki fu sma di ben e libi na ini a ten fu en. Ma de so taki Yesus ben e taki dyaso fu sma di no e bribi? Nôno. Luku nanga suma a ben e taki. Yesus ben fruteri a profeititori disi na wan tu fu den apostel di ben „kon na en di nowan tra sma ben de drape” (Mat. 24:3). A no langa baka dati den apostel ben o salfu nanga santa yeye. Luku den tekst tu fosi Yesus taki fu „den sma fu a ten disi”. Yesus taki: „Luku a figabon èn leri a sani disi fu en: Te unu e si taki wan nyun taki e bigin gro na a bon èn a e bigin sproiti, dan unu sabi taki a waran ten fu a yari de krosibei. Sosrefi, te unu e si ala den sani disi, dan un musu sabi taki a Manpikin fu libisma de krosibei èn taki a e tanapu leti na mofodoro.” Sobun, a no den sma di no ben e bribi ben o si den sani di a ben taki na ini a profeititori, ma na den salfu bakaman fu en ben o si dati  èn na den ben o frustan san den sani disi ben wani taki. Na den ben o sabi taki Yesus „de krosibei èn taki a e tanapu leti na mofodoro”. Sobun, di Yesus ben taki fu „den sma fu a ten disi” a ben e taki fu den salfu bakaman fu en.

17. San den wortu „ala den sani disi” wani taki?

¹⁷ Den „no o dede kwetikweti, fosi ala den sani disi pasa”. Fa den wortu disi o kon tru? Fu piki na aksi disi, wi no musu sabi nomo san den wortu „den sma fu a ten disi” wani taki, ma wi musu sabi tu san den wortu „ala den sani disi” wani taki. Den wortu „ala den sani disi” na ala den sani di ben o pasa na ini a pisi ten te Yesus ben o kon. Sobun, disi na ala den sani di bigin pasa na ini 1914 te na a ten fu a „bigi banawtu”.​—Mat. 24:21.

18, 19. (a) Fa wi na ini a ten disi musu frustan den wortu „den sma fu a ten disi”? (b) San wi leri na ini a kapitel disi?

¹⁸ Ma fa wi na ini a ten disi musu frustan den wortu „den sma fu a ten disi”? „Den sma fu a ten disi” na tu grupu salfuwan di ben e libi na a srefi ten. A fosi grupu na den salfuwan di si a bigin fu a kontru fu a marki na ini 1914. A di fu tu grupu na den sma di tron salfuwan na ini a srefi ten di sonwan fu a fosi grupu ben de na libi ete. Wan tu fu den sma fu a di fu tu grupu o de na libi ete na a bigin fu a bigi banawtu. Den salfu Kresten fu den tu grupu disi na „den sma fu a ten disi”, fu di wan pisi ten ben de taki den sma fu den tu grupu disi ben de na libi na ini a srefi ten. c

¹⁹ San wi leri na ini a kapitel disi? Wi sabi taki na heri grontapu a marki de krin fu si taki Yesus e tiri leki Kownu. Wi sabi tu taki den salfuwan di de na ini a grupu fu „den sma fu a ten disi” e kon moro owru èn furu fu den dede kaba. Wi sabi tu taki a no alamala o dede fosi a bigi banawtu bigin. Fu dati ede wi e frustan taki heri esi Gado Kownukondre o kon fu tiri heri grontapu! A o de wan span sani fu si a kontru fu a begi di Yesus leri wi: „Meki yu Kownukondre kon”!

20. Sortu prenspari sani wi o luku na ini a buku disi èn san wi o luku na ini a tra kapitel?

²⁰ Noiti wi musu frigiti den wortu di Yehovah srefi taki komoto fu hemel. A ben taki fu en Manpikin: „Un arki en.” Leki tru Kresten wi wani gi yesi na a rai disi trutru. Wi wani sabi ala sani di Yesus taki èn leri sma fu Gado Kownukondre. Wan tu prenspari sani di wi o luku na ini a buku disi na san a Kownukondre du kaba èn san a o du na ini a ten di e kon. Na ini a tra kapitel wi o luku den span sani di pasa na a ten di Gado Kownukondre seti na ini hemel.