Gi ala sma di lobi Yehovah:

Yesus ben taki: „Unu o sabi san tru èn dati o meki unu kon fri” (Yohanes 8:32). Den wortu disi e gi wi deki-ati trutru! Iya, wi kan kon sabi san tru, srefi na ini den muilek „lasti dei” disi pe falsi leri lai (2 Timoteyus 3:1). Yu e memre ete fa yu ben firi di yu kon sabi san tru soleki fa Gado Wortu e leri? A no de fu taki dati a sani dati ben gi yu furu prisiri!

Boiti taki a prenspari fu kon sabi finifini san na den tru leri fu Bijbel èn fu fruteri trawan den sani disi, wi musu du tu san wi e leri. Fu man du dati, dan wi musu du muiti so taki Gado tan lobi wi. Fa wi kan du dati? Den sani di Yesus ben taki a neti fosi a dede, e piki na aksi disi. Yesus ben taigi den apostel fu en: „Efu unu e gi yesi na den komando fu mi, dan mi o tan lobi unu, neleki fa mi Tata tan lobi mi, fu di mi e gi yesi na den komando fu en.”​—Yohanes 15:10.

Luku taki Gado tan lobi Yesus, fu di Yesus ben e gi yesi na den komando fu en Papa. Wi musu du a srefi na ini a ten disi. Efu wi wani taki Gado tan lobi wi, dan ibri dei wi musu libi soleki fa Bijbel e leri wi. A srefi neti dati, Yesus ben taki: „Efu unu sabi den sani disi, dan koloku fu unu te unu e du den.”​—Yohanes 13:17.

Wi e howpu trutru taki a buku disi o yepi yu fu tan du san Bijbel e leri. Te yu e du dati, dan ’Gado o tan lobi yu, so taki yu kan kisi têgo libi’.​—Yudas 21.