1, 2. San wi kan du fu meki Gado tan lobi wi?

 FU DI wi alamala wani abi wan bun gosontu, meki wi e du muiti fu nyan bun nyanyan, wi e oefen wi skin, èn wi e sorgu bun gi wisrefi. Den sani disi e meki taki wi e kon moro tranga. Aladi a no makriki fu du den sani disi, toku wi e feni wini te wi du den èn dati meki wi e tan du den. Ma wi musu tranga na wan tra fasi tu.

² Aladi wi kon sabi Yehovah kaba, toku wi musu tan meki muiti fu tron wan moro bun mati fu en. Di Yudas taigi den Kresten brada nanga sisa fu en fu du muiti so taki ’Gado tan lobi den’, dan a sori den tu fa den musu du dati. A taigi den: „Meki a santa bribi fu unu yepi unu fu kon moro tranga” (Yudas 20, 21). Sobun, fa wi kan tranga a bribi fu wi?

3-5. (a) Fa Satan wani taki wi musu si den wet fu Yehovah? (b) Fa yu e prakseri fu den wet nanga den gronprakseri fu Yehovah?

³ A prenspari taki yu srefi e bribi taki den wet fu Yehovah na den moro bunwan. Satan wani yu denki taki den wet fu Gado hebi tumusi èn taki yu o de moro koloku te yu srefi e bosroiti san bun èn san no bun. Sensi a ten fu a dyari fu Eden, Satan wani sma  bribi a sani disi (Genesis 3:1-6). Na ini a ten disi, a e tan meki muiti fu meki sma bribi a sani dati.

⁴ Satan abi leti? A tru taki den wet fu Yehovah e tapu wi fu du san wi wani? Nôno. Kon meki wi taki dati yu e waka na ini wan moi dyari. Ma dan yu e si taki wan pisi fu a dyari abi wan hei skotu. Kande yu e aksi yusrefi: ’Fu san ede a skotu disi de dya? Now mi no man waka go doro.’ Ma fa yu e denki a sani dati, yu e yere wan lew e bari na a tra sei fu a skotu. Fa yu e prakseri fu a skotu now? A musu de taki yu breiti taki a e kibri yu so taki a lew no nyan yu! Den gronprakseri fu Yehovah de leki a skotu dati èn Didibri de leki a lew. Gado Wortu e warskow wi: „Tan nanga krin frustan. De na ai. Didibri, a feanti fu unu, e waka lontu leki wan lew di e bari, fu di a e suku fu swari wan sma.”​—1 Petrus 5:8.

⁵ Yehovah wani taki wi abi wan bun libi. A no wani taki Satan kori wi. Dati meki a gi wi wet nanga gronprakseri fu kibri wi èn fu meki wi de koloku (Efeisesma 6:11). Yakobus ben skrifi: „Efu wan sma e luku finifini san skrifi na ini a wèt di bun srefisrefi èn di e meki sma kon fri èn a e tan du dati . . . a o de koloku.”​—Yakobus 1:25.

6. San kan yepi wi fu si moro krin taki den leri fu Gado na den moro bunwan?

⁶ Te wi e du san Yehovah taki, wi libi e kon moro bun èn wi e tron moro bun mati fu en. Fu eksempre, wi e kisi wini te wi abi a gwenti fu begi Yehovah soleki fa a taigi wi (Mateyus 6:5-8; 1 Tesalonikasma 5:17). Yehovah taigi wi tu fu kon makandra fu anbegi en, fu  gi makandra deki-ati, fu wroko fayafaya fu preiki a bun nyunsu, èn fu gi sma leri. Wi o de koloku te wi e du den sani disi (Mateyus 28:19, 20; Galasiasma 6:2; Hebrewsma 10:24, 25). Te wi e prakseri fa den sani disi yepi wi fu tranga a bribi fu wi, dan disi e yepi wi fu si moro krin taki den leri fu Yehovah na den moro bunwan.

7, 8. San kan yepi wi fu no broko wi ede nanga tesi di kan miti wi na ini a ten di e kon?

⁷ Kande wi e frede taki wi o kisi tesi di hebi tumusi. Efu oiti yu firi so, dan memre den wortu fu Yehovah: „Mi, Yehovah, na yu Gado. Mi na a sma di e leri yu fu kisi wini. Mi na a sma di e meki yu waka a pasi di yu musu waka. Mi winsi taki yu ben o poti prakseri na den komando fu mi! Dan a freide fu yu ben o de leki wan liba, èn a retidu fu yu ben o de leki den skwala fu se.”​—Yesaya 48:17, 18.

 ⁸ Te wi e gi yesi na Yehovah, dan a freide fu wi o de leki wan liba di no e lon drei èn retidu fu wi o de leki den skwala fu se di e wasi kon na syoro doronomo. Awinsi san miti wi na ini wi libi wi man tan gi yesi na Gado. Bijbel e pramisi: „Trowe yu hebi na tapu Yehovah, dan en srefi o horibaka gi yu. Noiti a o gi pasi taki wan reti-ati sma degedege.”​—Psalm 55:22.

9, 10. San a wani taki fu de wan lepi sma?

⁹ Te yu e du ala muiti fu tron wan moro bun mati fu Yehovah, dan yu o „tron wan lepi sma” (Hebrewsma 6:1). San a wani taki fu de wan lepi sma?

¹⁰ Wi no e tron lepi sma soso fu di wi e kon moro owru. Fu tron lepi sma, wi musu meki Yehovah tron wi moro bun Mati èn wi musu pruberi fu si sani soleki fa en e si den (Yohanes 4:23). Paulus ben skrifi: „Den sma di e du san a skin wani, e prakseri soso den sani di abi fu du nanga a skin. Ma den sma di e du san a yeye wani, e prakseri soso den sani di abi fu du nanga a yeye” (Romesma 8:5). Wan lepi sma no e prakseri soso prisiri nanga gudu. Na presi fu dati, a e du ala muiti fu dini Yehovah èn a e teki koni bosroiti na ini en libi (Odo 27:11; leisi Yakobus 1:2, 3). A no e meki sma kori en fu du ogri. Wan lepi sma sabi san bun èn a e du ala muiti fu tan du dati.

11, 12. (a) San kan yepi wan sma fu „si sani krin”, soleki fa Paulus taki? (b) Nanga san wi kan agersi a muiti di wan sma musu du fu tron wan lepi Kresten?

¹¹ Wi musu meki muiti fu tron lepi sma. Na apostel Paulus ben skrifi: „Tranga nyanyan na gi lepi sma.  A de gi sma di leri fa fu gebroiki den frustan fu man si sani krin, so taki den kan sabi san bun èn san no bun” (Hebrewsma 5:14). A wortu „leri” abi fu du nanga na oefen di wan sma e oefen fu kan du wan sani. Disi kan meki wi prakseri wan sma di e oefen fu plèi futubal.

¹² Te wi e si fa wan man e plèi futubal bun, dan wi sabi taki a teki ten fu leri plèi so bun. A no gebore leki wan futubal man. Te wan beibi gebore, a no sabi ete fa fu gebroiki en anu nanga en futu. Ma baka wan pisi ten a e leri fa fu hori sani èn fa fu waka. Efu a oefen bun, a kan leri fa fu plèi futubal bun. Na a srefi fasi a e teki ten fu leri fa fu tron wan lepi Kresten.

13. San kan yepi wi fu denki soleki fa Yehovah e denki?

¹³ Na ini a buku disi wi leri fa wi kan denki soleki fa Yehovah e denki èn fa wi kan si sani soleki fa en e si den. A buku disi yepi wi fu kon lobi den wet fu Yehovah èn fu warderi den. Te wi musu teki wan bosroiti, wi e aksi wisrefi: ’Sortu wet noso gronprakseri fu Bijbel kan yepi mi na ini a situwâsi disi? Fa mi kan gebroiki den? San Yehovah ben o wani taki mi du?’​—Leisi Odo 3:5, 6; Yakobus 1:5.

14. San wi musu du fu meki wi bribi kon moro tranga?

¹⁴ Ala ten wi e tan leri fa fu meki a bribi fu wi na ini Yehovah kon moro tranga. Neleki fa gosontu nyanyan e gi wi skin krakti, na so den sani di wi e leri fu Yehovah e yepi wi fu meki wi bribi kon moro tranga. Di wi bigin studeri Bijbel, wi leri den moro prenspari sani fu Yehovah èn fu a fasi fa a e denki. Ma te fu kaba, wi musu kon frustan den moro dipi tori tu. Na  dati Paulus ben abi na prakseri di a taki dati „tranga nyanyan de gi lepi sma”. O moro wi e du den sani di wi leri, o moro wi e kon koni. Bijbel e taki: „Koni na a moro prenspari sani.”​—Odo 4:5-7; 1 Petrus 2:2.

15. O prenspari a de taki wi lobi Yehovah nanga den Kresten brada nanga sisa fu wi trutru?

¹⁵ Kande wan sma gosontu èn a tranga. Ma a sabi taki efu a wani tan gosontu èn tranga, a musu tan sorgu ensrefi bun. Na a srefi fasi wan lepi sma musu tan wroko tranga fu kan de wan bun mati fu Yehovah. Paulus e memre wi: „Tan ondrosuku efu unu de na bribi. Tan buweisi sortu sma unu de” (2 Korentesma 13:5). Ma moro de fanowdu leki wan tranga bribi nomo. A lobi di wi abi gi Yehovah èn gi den brada nanga sisa fu wi musu tan gro. Paulus ben taki: „Awinsi . . . mi sabi . . . ala sani di de fu sabi, èn awinsi mi abi so wan tranga bribi taki mi man opo bergi poti na wan tra presi, ma mi no abi lobi, dan toku mi no de noti.”​—1 Korentesma 13:1-3.

16. Fa Satan wani taki wi musu firi?

¹⁶ Satan wani gi wi a firi taki Yehovah no o feni wi bun noiti, awinsi sortu muiti wi e meki. A wani taki wi lasi-ati èn a wani meki wi denki taki lusu no de gi den problema fu wi. A no wani taki wi frutrow wi Kresten brada nanga sisa èn a no wani taki wi de koloku (Efeisesma 2:2). Satan sabi taki te wi e denki so, dan dati kan pori wi libi èn a kan pori wi nanga Gado. Ma Yehovah gi wi wan sani fu yepi wi fu no denki na a fasi dati. A gi wi howpu.

17. Fu san ede a prenspari fu abi howpu?

 ¹⁷ Na ini 1 Tesalonikasma 5:8, Bijbel e agersi a howpu fu wi nanga wan helm di wan srudati ben e weri fu kibri en ede na ini feti. Bijbel e kari a helm disi „a howpu di wi abi taki wi o kisi frulusu”. A howpu di wi abi taki den sani di Yehovah pramisi o kon tru e kibri wi frustan èn a e yepi wi fu no prakseri sani di o meki wi lasi-ati.

18, 19. Fa a howpu fu Yesus ben gi en krakti?

¹⁸ A howpu di Yesus ben abi ben gi en krakti. Na a lasti neti fu en libi dya na grontapu, a kisi a wan tesi baka a trawan. Wan bun mati fu en tori en. Wan trawan lei taki a no sabi en. Tra mati fu en lon gowe libi en. En eigi kondreman opo densrefi teige en èn den ben wani taki sma pina en teleki a dede. San yepi en fu pasa ala den tesi disi? „Na fu di a ben sabi taki  prisiri ben e wakti en, meki a ben de klariklari fu dede na a pinapostu sondro fu broko en ede taki a ben o kisi syen. A go sidon na a reti-anusei fu a kownusturu fu Gado.”​—Hebrewsma 12:2.

¹⁹ Yesus ben sabi taki efu a ben tan gi yesi na Gado, dan en Papa ben o kisi glori èn a ben o sori taki Satan na wan leiman. Na a howpu disi ben e gi en furu prisiri. A ben sabi tu taki heri esi a ben o de baka nanga en Papa na ini hemel. Na a howpu disi yepi en fu horidoro. Neleki Yesus, wi musu tan prakseri a howpu fu wi. A o yepi wi fu horidoro awinsi san pasa.

20. San kan yepi yu fu no lasi howpu?

²⁰ Yehovah e si a bribi fu yu èn a e si fa yu e horidoro (Yesaya 30:18; leisi Maleaki 3:10). A e pramisi taki „a o gi yu san yu ati wani” (Psalm 37:4). Sobun, tan prakseri a howpu di yu abi. Satan wani taki yu  lasi howpu èn a wani meki yu denki taki den sani di Yehovah pramisi no o kon tru noiti. Ma yu no musu denki so! Efu yu si taki yu e lasi howpu, dan begi Yehovah fu a yepi yu. Prakseri san skrifi na Filipisma 4:6, 7: „No broko un ede nanga nowan sani, ma begi Gado ala ten, begi en fayafaya èn taki en tangi tu. Na so a o kon sabi san unu wani aksi en, dan a freide fu Gado di bigi moro iniwan sani di libisma man frustan, o kibri un ati nanga un frustan nanga yepi fu Krestes Yesus.”

21, 22. (a) San Yehovah abi na prakseri gi grontapu? (b) San yu o du?

²¹ Abi a gwenti fu denki dipi fu den moi sani di Yehovah pramisi wi gi a ten di e kon. Heri esi, ala sma o anbegi Yehovah (Openbaring 7:9, 14). Prakseri fa a libi na ini a nyun grontapu o de. A o moi srefisrefi! Satan nanga den ogri yeye fu en no o de moro. Nowan ogri no o de moro. Yu no o siki èn yu no o dede tu. Na presi fu dati, yu o wiki ala dei nanga furu krakti èn yu o breiti taki yu de na libi. Ala sma o wroko makandra fu meki grontapu tron wan paradijs. Wi alamala o abi bun nyanyan èn wan tanpresi pe ogri no o miti wi. Sma no o du ogri nanga makandra, ma den o abi switifasi. Te fu kaba, ala libisma na grontapu „o kon fri na wan tumusi moi fasi leki pikin fu Gado”.​—Romesma 8:21.

²² Yehovah wani taki yu meki a tron yu moro bun Mati. Sobun, du ala san yu man fu du san Yehovah taki èn fu kon moro krosibei na en ibri dei. Iya, meki a de so taki Gado tan lobi wi alamala fu ala ten!​—Yudas 21.