LES 39
Fa Gado e si brudu?
Brudu prenspari. Nowan sma man libi sondro brudu. Na Gado musu taigi wi san wi mag du nanga brudu fu di na en meki wi. San a taki fu brudu? Wi mag teki brudu te wi siki noso wi mag nyan en? San o yepi wi fu teki bun bosroiti na ini a tori disi?
1. Fa Yehovah e si brudu?
Yehovah ben taigi den anbegiman fu en: „A libi fu iniwan sortu libisani de na ini en brudu” (Lefitikus 17:14). Gi Yehovah, brudu na libi. A libi na wan kado fu Gado èn a santa. Dati meki brudu srefi santa.
2. San Gado no wani taki wi du nanga brudu?
Syatu baka a frudu Yehovah ben taigi den anbegiman fu en taki den no musu nyan brudu. A ben gi den Israelsma a wet disi tu. (Leisi Genesis 9:4 nanga Lefitikus 17:10.) Baka di a Kresten gemeente seti, den anbegiman fu Yehovah ben musu hori densrefi na a wet disi ete. Den brada di ben teki fesi na a ten dati ben taigi den Kresten fu ’tan fara fu brudu’.—Leisi Tori fu den apostel 15:28, 29.
San a wani taki fu tan fara fu brudu? Efu wan datra ben taigi yu fu tan fara fu sopi, dan yu no ben o dringi en. Ma yu ben o nyan sani di abi sopi na ini noso yu ben o spoiti a sopi go na ini yu skin? Yu no ben o du dati. Na so a de tu nanga a wet fu Gado di e taki dati wi musu tan fara fu brudu. Wi no musu dringi brudu èn wi no musu nyan nowan sani pe sma poti brudu na ini. Èn efu sma no meki a brudu lon komoto na ini wan meti, wi no o nyan a meti dati.
Ma wi mag teki brudu te wi siki? Te wi luku san Bijbel e taki, dan a de krin taki wi no mag teki brudu. Wi no e teki den fo prenspari sani di de fu feni na ini brudu tu. Dati na redi brudu-cel, weti brudu-cel, brudu plaat nanga plasma. Ma datra e teki pikinpikin sani puru fu den fo prenspari sani disi. Wi mag teki den sani disi? Bijbel no e taki krin san wi musu du. Son leisi wi musu bosroiti tu san datra mag du nanga a brudu fu wi. Fu eksempre, te a musu ondrosuku a brudu fu wi noso te wi musu du wan oparâsi. Na ini ala den tu situwâsi disi wan sma musu teki en eigi bosroiti. a—Galasiasma 6:5.
SORTU TRA SANI YU KAN LERI?
Wi o luku san kan yepi wi fu teki bun bosroiti te a abi fu du nanga brudu.
3. Teki bosroiti di Yehovah feni bun
Te a abi fu du nanga brudu, dan san o yepi yu fu man teki wan bosroiti di Gado feni bun? Prei a FELEM. Baka dati taki fu san ede a prenspari fu du den sani disi:
-
Begi Gado fu gi yu koni.—Yakobus 1:5.
-
Ondrosuku sortu Bijbeltekst e taki fu a tori disi èn fa yu kan gebroiki den.—Odo 13:16.
-
Luku sortu sani den datra man du gi yu na ini a kondre pe yu e tan.
-
Luku sortuwan fu den sani disi yu no wani.
-
Teki wan bosroiti di no o trobi a konsensi fu yu.—Tori fu den apostel 24:16. b
-
Hori na prakseri taki nowan sma kan taigi yu san yu musu du. Yu trowpatna, wan owruman noso a sma di e studeri Bijbel nanga yu no man teki wan bosroiti gi yu.—Romesma 14:12.
-
Skrifi tapu papira sortu bosroiti yu teki so taki trawan kan sabi dati.
4. Yehovah Kotoigi e suku a moro bun yepi te den siki
Te yu siki, someni bun fasi de fa datra kan yepi yu sondro fu gi yu brudu. Prei a FELEM.
Leisi Titus 3:2 èn taki fu na aksi disi:
-
Fu san ede wi musu taki na wan lespeki fasi nanga den datra ala ten?
|
Sani di wi leki Kresten no e teki |
Sani pe wi musu teki wi eigi bosroiti |
|---|---|
|
A. Brudu plasma |
Pikinpikin sani di teki fu plasma |
|
B. Weti brudu-cel |
Pikinpikin sani di teki fu weti brudu-cel |
|
C. Brudu plaat |
Pikinpikin sani di teki fu brudu plaat |
|
D. Redi brudu-cel |
Pikinpikin sani di teki fu redi brudu-cel |
5. Te yu musu bosroiti efu yu o teki den pikinpikin sani di puru fu den fo prenspari pisi fu brudu
Brudu abi fo prenspari sani na ini: Redi brudu-cel, weti brudu-cel, brudu plaat nanga plasma. Datra e teki pikinpikin sani puru fu den fo prenspari sani disi. c Den e meki dresi nanga sonwan fu den pikinpikin sani disi noso den e gebroiki den te wan sma e lasi brudu fu tapu a brudu fu lon.
Te a abi fu du nanga den pikinpikin sani di puru na ini brudu, dan ibri Kresten musu teki en eigi bosroiti. Son sma e bosroiti fu teki nowan dresi di abi den pikinpikin sani disi na ini. Trawan e bosroiti fu teki den dresi disi di abi den pikinpikin sani na ini, fu di a no e trobi den konsensi.
Te yu o teki wan bosroiti, dan prakseri fa yu o piki na aksi disi:
-
Fa mi ben o fruteri wan datra fu san ede mi wani son dresi di abi den pikinpikin sani na ini, èn fu san ede mi no wani sonwan fu den?
WAN SMA KAN AKSI YU: „Fu san ede a fowtu fu teki brudu?”
-
Fa yu ben o piki en?
SAN YU LERI?
Yehovah wani taki wi si brudu leki wan santa sani.
Fa yu ben o piki den aksi disi?
-
Fu san ede brudu santa gi Yehovah?
-
Fa wi du sabi taki a wet fu Gado di e taki dati wi musu tan fara fu brudu, wani taki dati wi no mag teki brudu?
-
Te a abi fu du nanga brudu, dan san o yepi wi fu man teki bun bosroiti?
TRA SANI DI YU KAN LUKU
Na artikel disi o yepi yu fu sabi san yu musu du te datra wani gebroiki yu eigi brudu.
San yu musu hori na prakseri te yu musu bosroiti efu yu o teki den pikinpikin sani di datra puru na ini brudu?
San yepi wan datra fu si brudu leki fa Yehovah e si en?
„Ik aanvaardde Gods kijk op bloed” (Ontwaakt!, 8 december 2003)
Na ini a felem disi yu o si fa den owruman di de na ini na Ati-oso Kontakti Komte e yepi den brada nanga sisa.
b Luku penti 5 di nen „Te yu musu bosroiti efu yu o teki den pikinpikin sani di puru fu den fo prenspari pisi fu brudu”. Luku Ete wan tu sani 3 di nen „Difrenti sani di datra kan du nanga a brudu fu wan sma”.
c A no ala datra e si a tori disi na a srefi fasi. Dati meki a datra fu yu musu frustan bun taki yu no wani brudu. A musu frustan tu taki yu no wani redi brudu-cel, weti brudu-cel, brudu plaat nanga plasma.
