1-3. (a) Sortu ogri den Egeptesma ben e suku fu du nanga den Israelsma? (b) Fa Yehovah ben feti gi a pipel fu en?

DEN Israelsma no ben man go nowan sei. Den ben fasi na mindri hei klepston nanga wan bigi se di den no ben man abra. A legre fu Egepte di no ben abi trobi fu kiri sma, ben de nomonomo fu kisi den Israelsma èn fu pori den krinkrin. * Toku Moses ben gi a pipel fu Gado deki-ati fu no lasi howpu. A ben gi den a dyaranti: „Yehovah srefi sa feti gi unu.”​—Exodus 14:14.

² Toku, a sori taki Moses ben bari kari Yehovah, èn Gado piki en: „Fu san ede yu e bari kari mi? . . . Opo yu wakatiki èn langa yu anu abra a se èn prati en na tu” (Exodus 14:15, 16). Prakseri nomo san pasa baka dati. Wantewante Yehovah e komanderi na engel fu en, èn a bigi wolku e skoifi go na bakasei fu den Israelsma. Kande a wolku e bradi ensrefi leki wan bigi skotu di e meki taki den Egeptesma no man du noti nanga Israel (Exodus 14:19, 20; Psalm 105:39). Moses e langa en anu èn dan wan bigi winti e kon di e prati a se na tu. Den watra fu a se e tan tanapu na ala tu sei leki tu bigi skotu, so taki wan bigi pasi e kon de di bradi nofo fu a heri pipel waka na tapu!​—Exodus 14:21; 15:8.

³ Di Farao si a bigi makti fu Gado, dan a ben musu meki a legre fu en drai go baka na oso. Na presi fu dati, a bigimemre Farao disi e gi den a komando fu hari go feti (Exodus 14:23). Sondro fu prakseri srefi, den Egeptesma e hari go na ini a se, ma heri esi a feti fu den e tron wan bigi bruya te den banti fu den  fetiwagi e bigin frei komoto. Te ala den Israelsma de na abrasei, dan Yehovah e taigi Moses: „Langa yu anu abra a se, so taki den watra kan saka kon na tapu den Egeptesma, na tapu den fetiwagi fu den, èn na tapu den asi-tyariman fu den.” Den bigi watra skotu disi e saka kon na tapu Farao nanga en heri legre!​—Exodus 14:24-28; Psalm 136:15.

4. (a) San Yehovah sori na a Redi Se? (b) Fa son sma kan firi fu a fasi disi fa Yehovah tyari ensrefi?

⁴ Gado du furu sani fu yepi a libisma famiri, ma a fasi fa a frulusu Israel na a Redi Se, ben de wan tumusi aparti sani. Drape Yehovah sori taki en na „wan mansma fu orloku” (Exodus 15:3). Ma fa yu e firi te Bijbel e taki so fu Yehovah? A tru taki orloku tyari furu pina nanga sari gi a libisma famiri. Ma fa yu e denki fu a tori disi? Yu feni taki a fasi fa Gado e gebroiki a makti di a abi fu pori sani, e meki taki yu e frede En, na presi taki a e gi yu deki-ati fu go krosibei na en?

5, 6. (a) Fu san ede a fiti fu kari Gado „Yehovah fu den legre”? (b) Na sortu fasi den orloku fu Gado e difrenti fu den di fu libisma?

⁵ Sowan dri hondro tron den Hebrew Buku fu Bijbel e kari Gado „Yehovah fu den legre”, èn na ini den Kresten Griki Buku fu Bijbel yu e feni den wortu disi tu tron (1 Samuel 1:11). Yehovah leki a Moro Hei Tiriman, e tiri wan bigi legre fu engel (Yosua 5:13-15; 1 Kownu 22:19). A makti di a legre disi abi fu pori sani, bigi srefisrefi (Yesaya 37:36). A no switi fu sidon prakseri fa libisma e kisi pori. Ma wi musu hori na prakseri taki den orloku fu Gado no de leki den pikinpikin feti fu libisma. Kande srudati nanga politiek tiriman e suku fu sori taki den e feti nanga wan bun marki. Ma ala ten den feti fu libisma abi fu du nanga gridi lostu èn nanga wini di sma e suku gi densrefi.

⁶ Ma Yehovah de tra fasi, fu di a no e du wan sani nomo te a  e firi fu du en. Deuteronomium 32:4 e taki: „A Klepston, den wroko fu en bun dorodoro, bika ala san a e du na retidu. Wan Gado fu getrowfasi, èn na en kruktudu no de; a de regtfardiki èn opregti.” A Wortu fu Gado e krutu sma di no man dwengi densrefi te den e kisi atibron, èn a e krutu den sma sosrefi di e du ogri nanga tranga (Genesis 49:7; Psalm 11:5). Sobun, noiti Yehovah e du wan sani soso fu di a e firi fu du en. Wanwan leisi nomo a e gebroiki a makti di a abi fu pori sani, èn a e du dati soso te nowan tra fasi no de fu lusu wan problema. A de neleki fa a ben taki nanga yepi fu a profeiti Esekièl: „’Un denki taki mi e prisiri te wan ogri sma e dede’, na so a Moro Hei Masra Yehovah e aksi, ’noso taki mi no e prisiri te a sma dati drai gowe libi den sani di a ben e du, so taki a tan na libi trutru?’”​—Esekièl 18:23.

7, 8. (a) Sortu fowtu prakseri Yob ben abi di a ben si fa a e pina? (b) Fa Elihu ben sori Yob taki a fasi fa a ben e prakseri no ben bun? (c) Sortu prenspari sani wi kan leri fu na eksempre fu Yob?

⁷ Ma now, fu san ede Yehovah e gebroiki a makti di a abi fu pori sani? Bifo wi piki na aksi dati, dan a bun fu memre a regtfardiki man Yob. Satan ben aksi efu Yob ben sa tan hori en soifri retifasi te a ben o kisi tesi. Te yu luku en bun, dan a no ben tyalensi Yob nomo, ma iniwan tra libisma. Yehovah gi piki tapu a tyalensi dati fu di a gi Satan pasi fu tesi Yob tapu a soifri retifasi fu en. Dati meki Yob ben kisi wan hebi siki, a ben lasi ala en gudu, èn sosrefi ala en pikin (Yob 1:1–2:8). Fu di Yob no ben sabi sortu bigi strei ben de ini a tori, meki a ben go prakseri taki a ben e pina fu di Gado ben e strafu en fu soso. A ben aksi Gado fu san ede A ben meki a kon tron „wan fonfon tiki” noso „wan feanti” fu en.​—Yob 7:20; 13:24.

⁸ Wan yonkuman di ben nen Elihu, ben sori Yob taki a fasi fa a ben e denki no ben fiti. Elihu ben taigi en: „Yu taki: ’Mi regtfardiki moro Gado’” (Yob 35:2). Iya, a de wan don sani fu denki taki wi sabi sani moro Gado, noso taki A no e handri nanga reti. „A tru Gado no sa handri na wan kruktu fasi noiti, èn noiti na Almaktiwan sa du san no de reti”, na so Elihu ben  taki. Bakaten a taki tu: „Na Almaktiwan fu en sei, wi no ben kon sabi en finifini; a abi makti moro iniwan tra sma, èn a no sa si retidu nanga furu regtfardikifasi leki wan soso sani” (Yob 34:10; 36:22, 23; 37:23). Wán sani di wi sabi, na taki te Gado e feti wan feti, dan a sabi fu san ede a e du dati. Nanga a pisi tori disi na prakseri, wi wani go ondrosuku fu san ede a Gado fu vrede e tyari ensrefi son tron leki wan fetiman.​—1 Korentesma 14:33.

9. San meki a Gado fu vrede e feti orloku son tron?

⁹ Baka di Moses prèise Gado leki „wan mansma fu orloku”, dan a ben taki: „Suma na mindri den gado de leki yu, o Yehovah? Suma de leki yu, di e sori taki yu de makti na ini santafasi?” (Exodus 15:11) A profeiti Habakuk ben skrifi wan srefi sortu sani: „Yu ai soifri tumusi fu si ogri sani; èn a no switi gi yu fu si taki problema de” (Habakuk 1:13). Aladi Yehovah na wan Gado fu lobi, toku en na wan Gado tu fu santafasi, regtfardikifasi, nanga retidu. Son tron den fasi disi e meki a gebroiki a makti di a abi fu pori sani (Yesaya 59:15-19; Lukas 18:7). Sobun, Gado no e pori a santafasi fu en te a e feti orloku. Na presi fu dati, a e feti fu di a de santa.​—Exodus 39:30.

10. (a) O ten èn fa a ben kon de fanowdu gi Gado fu feti orloku? (b) San na a wan-enkri fasi fa a feantifasi di Genesis 3:15 e taki fu en, kan kon na wan kaba? Sortu blesi dati o abi gi regtfardiki libisma?

¹⁰ Prakseri san ben pasa baka di den fosi libisma, Adam nanga Eva, ben opo densrefi teige Gado (Genesis 3:1-6). Efu Yehovah no ben strafu den gi na onregtfardikifasi fu den, dan a ben o wisiwasi en eigi posisi leki a Moro Heiwan fu hemel nanga grontapu. Leki wan regtfardiki Gado a ben musu fu gi den dedestrafu (Romesma 6:23). Na ini a fosi profeititori fu Bijbel, A ben taki na fesi taki feantifasi ben o de na mindri en eigi futuboi nanga den bakaman fu a „sneki”, Satan (Openbaring 12:9; Genesis 3:15). Fu meki a feantifasi disi kon na wan kaba, dan Satan musu kisi pori nomonomo (Romesma 16:20). Ma a krutustrafu dati ben o tyari bigi blesi gi regtfardiki libisma. Na  a fasi dati grontapu ben o kon fri fu a krakti fu Satan èn dati ben o meki taki heri grontapu kon tron wan paradijs (Mateyus 19:28). Teleki a ten dati, dan den wan di teki a sei fu Satan ben o suku fu du ogri nanga a pipel fu Gado, na skin sei èn na yeye sei. Dati meki ten na ten, Yehovah ben o abi fu yepi en pipel.

11. Fu san ede Gado ben feni en fanowdu fu tyari wan frudu kon na heri grontapu?

¹¹ A Frudu na ini a ten fu Noa ben de wan fu den okasi pe Gado yepi libisma. Genesis 6:11, 12 e taki: „Grontapu ben kon pori na ini na ai fu a tru Gado èn grontapu ben kon furu nanga ogridu. Sobun, Gado ben si a grontapu èn luku! a ben pori, bika ala skin ben pori den libi na grontapu.” Ma Gado ben o gi pasi taki den ogriwan meki ala bun gwenti nanga gronprakseri lasi gowe fu grontapu? Nôno. Yehovah ben feni en fanowdu fu tyari wan frudu kon na heri grontapu fu puru den wan di ben e prakseri soso ogridu nanga hurudu.

12. (a) San Yehovah ben taki na fesi fu a „siri” fu Abraham? (b) Fu san ede den Amoriet ben musu kisi pori krinkrin?

¹² So a ben de tu di Gado krutu den Kanansma. Yehovah ben fruteri Abraham taki wan „siri” ben o komoto fu en, èn taki nanga yepi fu a siri dati ala pipel fu grontapu ben o blesi densrefi. Nanga a sani dati na prakseri, Gado ben taki dati den bakapikin fu Abraham ben musu kisi a kondre Kanan, wan kondre pe den sma di den ben kari Amoriet ben e libi. San ben gi Gado a reti fu yagi den sma dati puru na ini a kondre fu den? Yehovah ben taki na fesi dati sowan 400 yari ben o pasa bifo a yagi den puru na ini a kondre fu den, iya, teleki a „sondu fu den Amoriet” ben „kon na wan kaba” (Genesis 12:1-3; 13:14, 15; 15:13, 16; 22:18). * Na ini a pisi ten dati, den Amoriet ben sungu go moro dipi na ini a pori libi fu den. Kanan ben tron wan kondre fu afkodrei, pe brudu ben e lon furufuru, èn  pe sma ben e libi wan doti fisti seks libi (Exodus 23:24; 34:12, 13; Numeri 33:52). Den sma fu a kondre ben e bron den pikin fu den srefi leki ofrandi. Wan santa Gado ben kan meki a pipel fu en moksi densrefi nanga a sortu ogridu dati? Nôno! A ben taki: „A kondre no krin, èn mi sa strafu a kondre gi den fowtu fu en, èn a kondre sa pio den sma di de na ini” (Lefitikus 18:21-25). Ma Yehovah no ben kiri den bun sma makandra nanga den ogri sma. Kanansma soleki Rakab nanga den Gibeonsma, ben kisi kibri fu di den ben de klariklari fu du san A ben taki.​—Yosua 6:25; 9:3-27.

13, 14. (a) Fu san ede Yehovah ben musu fu meki a nen fu en kon santa? (b) Fa Yehovah puru a porinen di a ben kisi?

¹³ Fu di Yehovah de santa, meki a nen fu en santa tu (Lefitikus 22:32). Yesus ben leri den disipel fu en fu begi: „Yu nen musu kon santa” (Mateyus 6:9). Di den fosi sma opo densrefi teige Gado na ini Eden, dan den lagi a nen fu Gado, èn den meki sma tweifri na a bun nen fu Gado èn na a fasi fa a e tiri. Noiti Yehovah no ben o si den sortu ogri-ati lei dati nanga a sortu opruru dati leki bun sani. A ben musu fu puru a porinen di a ben kisi.​—Yesaya 48:11.

¹⁴ Poti prakseri baka na den Israelsma. Gado ben pramisi Abraham taki ala libisma ben o blesi densrefi nanga yepi fu a Siri fu en. Solanga leki den Israelsma ben de srafu na ini Egepte, a pramisi dati ben kan gersi wan soso sani. Ma di Yehovah puru den na katibo èn di a meki den tron wan pipel, dan a puru ala porinen di a ben kisi. Fu dati ede a profeiti Danièl ben taki na ini begi: „O Yehovah, wi Gado, yu . . . ben tyari a pipel fu yu komoto na a kondre Egepte nanga wan tranga anu èn baka dati yu ben meki wan nen gi yusrefi.”​—Danièl 9:15.

15. Fu san ede Yehovah frulusu den Dyu komoto fu katibo na ini Babilon?

¹⁵ A moi fu si taki Danièl ben e begi na a fasi disi na wan pisi ten pe Yehovah ben musu yepi den Dyu baka, fu En nen ede.  Den trangayesi Dyu ben tron katiboman baka, ma disi leisi na ini Babilon. Yerusalem, a mamafoto fu den, ben tron wan broko presi. Danièl ben sabi taki a nen fu Yehovah ben o kisi glori efu den Dyu ben sa drai go baka na a kondre fu den. Dati meki a ben begi: „O Yehovah, gi pardon grantangi. O Yehovah, grantangi, poti prakseri èn du wan sani. No draidrai, fu yu eigi bun, o mi Gado, bika yu eigi nen kari na tapu a foto disi èn na tapu a pipel fu yu.”​—Danièl 9:18, 19.

16. Fruteri fu san ede a no de so taki Yehovah no abi firi gi sma èn taki a e prakseri ensrefi nomo, te a e feti gi a nen fu en.

¹⁶ A tru taki Yehovah e feti gi a nen fu en, ma dati wani taki dati a no abi firi gi sma èn taki a e prakseri ensrefi nomo? Nôno, a e kibri a pipel fu en na a fasi dati. Poti prakseri na Genesis kapitel 14. Drape wi e leisi fu fo kownu di ben fadon kon na ini a kondre èn di ben tyari Lot, a brada pikin fu Abraham gowe, makandra nanga na osofamiri fu Lot. Gado ben yepi Abraham fu wini na wan tumusi moi fasi, aladi den kownu ben tranga omeni tron moro en! Soleki fa a sori, dan a tori fu a fasi fa a wini, na wan fu den fosi tori di skrifi na ini „a buku fu den Orloku fu Yehovah”. A sori leki dati ben de wan buku pe sma ben e skrifi fu difrenti orloku, sosrefi den wan di no kari na ini Bijbel (Numeri 21:14). Ma den no ben kaba wini ete.

17. San e sori taki Yehovah feti gi den Israelsma baka di den hari go na ini a kondre Kanan? Gi wan tu eksempre.

¹⁷ Leti bifo den Israelsma hari go na ini a kondre Kanan, dan Moses gi den a dyaranti: ’Yehovah un Gado na a sma di e hari go na un fesi. A o feti gi unu akruderi ala den sani di a ben du di unu ben de na ini Egepte’ (Deuteronomium 1:30; 20:1). Fu sensi a ten fu Yosua di ben teki a wroko fu Moses abra, te go miti a ten fu den Krutuman nanga den getrow kownu fu Yuda, Yehovah tan feti gi a pipel fu en trutru. A tan yepi den fu wini den feanti fu den na wan tumusi kefalek fasi.​—Yosua 10:1-14; Krutuman 4:12-17; 2 Samuel 5:17-21.

18. (a) Fu san ede wi kan de nanga tangi na ati taki Yehovah no kenki? (b) San o pasa te a feantifasi di Genesis 3:15 e taki fu en o doro en heimarki?

 ¹⁸ Yehovah no kenki, èn te now ete a wani taki a planeiti disi musu tron wan paradijs pe vrede de (Genesis 1:27, 28). Te now ete Gado e tegu gi ogridu. Ma na a srefi ten a lobi a pipel fu en srefisrefi, èn heri esi a sa opo du wan sani fu yepi den (Psalm 11:7). Wi e fruwakti taki a feantifasi di Genesis 3:15 e taki fu en, sa doro wan prenspari heimarki, èn wi sabi taki bigi kenki de fu kon. Ete wan tron Yehovah sa tron „wan mansma fu orloku” fu meki a nen fu en kon santa èn fu kibri a pipel fu en!​—Sakaria 14:3; Openbaring 16:14, 16.

19. (a) Gebroiki wan eksempre fu sori fa a makti di Gado abi fu pori sani kan meki wi kon krosibei na en. (b) Fa wi musu firi te wi hori na prakseri fa Gado de klariklari fu feti gi wi?

¹⁹ Prakseri na agersitori disi: Kon meki wi taki dati wan man e si taki wan ogri meti e suku fu du ogri nanga en osofamiri, èn taki a man disi e dyompo kon na ini a feti èn e kiri na ogri meti dati. Yu denki taki en wefi nanga den pikin fu en sa kon frede fu di a du so wan sani? Kwetikweti! Na presi fu dati yu e fruwakti taki a sa naki den ati srefisrefi taki a lobi den sondro fu prakseri ensrefi nomo. Na wan srefi sortu fasi wi no musu frede Gado fu di a e gebroiki a makti di a abi fu pori sani.  Fu di a de klariklari fu feti fu kibri wi, meki wi musu lobi en moro srefi. Wi musu kisi moro lespeki sosrefi gi a makti di a abi fu du ala sani. Na so wan fasi wi kan „du santa diniwroko gi Gado na wan fasi di a feni bun, aladi wi e frede èn e lespeki en”.​—Hebrewsma 12:28.

20. Te wi e leisi Bijbel tori di e taki fu den orloku di Gado ben feti, ma di wi no man frustan so bun, dan san wi musu du? Fu san ede wi musu du dati?

²⁰ A no de fu taki dati a no ala ten Bijbel e sori finifini fu san ede Yehovah ben bosroiti fu go feti son leisi. Ma wán sani no abi misi: A tru taki Yehovah abi makti fu pori sani, ma noiti a e gebroiki a makti dati na wan fasi di no reti noso na wan ogri-ati fasi. Furu tron wi kan kon frustan wan tori moro bun te wi luku fa a situwâsi ben de di a spesrutu Bijbel tori dati feni presi, noso te wi e suku fu kon frustan san na den sani di meki taki a tori waka so (Odo 18:13). Son leisi wi no sabi a fini fu wan tori. Ma a kan de wan bigi yepi gi wi te wi e leri moro fu Yehovah èn te wi e denki dipi fu den moi fasi fu en. Den sani disi kan yepi wi fu puru iniwan tweifri di kan opo kon. Te wi e du disi, dan wi sa si taki nofo sani de di e meki taki wi kan frutrow wi Gado, Yehovah.​—Yob 34:12.

21. Aladi Yehovah na „wan mansma fu orloku” te a de fanowdu, toku fa en ati de trutru?

²¹ Aladi Yehovah na „wan mansma fu orloku” te a de fanowdu, toku disi no wani taki dati na ini en ati a de wan sma di lobi feti. Na ini a fisyun fu a hemel wagi di Esekièl ben si, a si Yehovah leki wan sma di de klariklari fu feti nanga den feanti fu en. Toku Esekièl ben si wan alenbo lontu Yehovah, èn dati na wan marki fu vrede (Genesis 9:13; Esekièl 1:28; Openbaring 4:3). A de krin taki Yehovah na wan Gado di lobi vrede èn di no lobi dyugudyugu. Na apostel Yohanes ben skrifi: „Gado na lobi” (1 Yohanes 4:8). Yehovah sabi soifri fa fu gebroiki ala den fasi fu en. Dati meki a de wan bigi grani taki wi kan kon krosibei na so wan makti, ma lobi-ati Gado!