1, 2. (a) San furu sma kan si leki wan sani di no kan kwetikweti, ma sortu dyaranti Bijbel e gi wi? (b) Sortu grani Abraham ben kisi, èn fu san ede?

FA YU ben o firi efu a Mekiman fu hemel nanga grontapu ben sa taki dati yu na wan mati fu En? Kande furu sma e prakseri taki so wan sani no kan kwetikweti, bika fa wan libisma leki wi kan tron wan mati fu Yehovah Gado? Toku Bijbel e gi wi a dyaranti taki wi kan de mati fu Gado trutru.

² Abraham fu owruten ben abi so wan bun banti nanga Gado. Yehovah ben e kari a famiri-edeman dati, „mi mati” (Yesaya 41:8). Iya, Yehovah ben e si Abraham leki en mati. Abraham ben kisi a grani fu tron wan bun mati fu Gado fu di a ben e „bribi na ini Yehovah” (Yakobus 2:23). Na ini a ten disi sosrefi, Yehovah e suku okasi fu ’sori taki a e prisiri’ nanga den wan di e dini en fu di den lobi en (Deuteronomium 10:15). A Wortu fu en e gi wi a deki-ati: „Kon krosibei na Gado, èn a sa kon krosibei na unu” (Yakobus 4:8). Disi na wan kari di abi wan pramisi na ini tu.

3. Sortu kari Yehovah e gi wi? Sortu pramisi de ini a tori dati tu?

³ Yehovah e kari wi fu kon krosibei na en. A de klariklari fu teki wi leki en mati. Na a srefi ten, a e pramisi wi taki efu wi du muiti fu kon krosibei na en, dan en o du a srefi sani tu. Iya, a sa kon krosibei na wi. Na so fasi wi kan kisi wan tumusi warti sani, namku wan bun matifasi nanga Yehovah (Psalm 25:14). Wan bun mati na wan sma di yu kan fruteri den inibere tori fu yu.​—Amos 3:7.

4. O ten yu e kari wan sma wan bun mati? Fa Yehovah e sori taki a e tron wan bun mati fu iniwan sma di e kon krosibei na en?

⁴ Yu abi wan bun mati di yu kan fruteri ala yu inibere tori? So wan mati na wan sma di e broko en ede nanga yu. Yu e frutrow en fu di yu kon si fa a e tan horibaka gi yu. Yu e kisi moro  prisiri te yu e taki nanga en fu sani di e meki yu firi bun. Te wan sani e moro yu, dan a e arki yu na wan fasi di e sori taki a e frustan fa yu e firi, èn dati e gi yu krakti baka. A e frustan yu, srefi te yu e firi leki nowan tra sma man frustan yu. So a de tu taki te yu e kon krosibei na Gado, dan yu e kon abi wan spesrutu Mati di e warderi yu trutru, di e broko en ede nanga yu, èn di e frustan yu bun (Psalm 103:14; 1 Petrus 5:7). Yu e fruteri en den moro dipi firi fu yu, bika yu sabi taki a e tan getrow na den wan di e tan getrow na en (Psalm 18:25). Ma wi musu hori na prakseri taki wi no ben o abi a grani fu de bun mati fu Gado, efu Gado srefi no ben du sani fu meki dati pasa.

5. San Yehovah du fu meki taki wi kan de mati fu en?

⁵ Efu wi leki sondari no ben o kisi yepi, dan wi no ben o man de mati fu Gado noiti (Psalm 5:4). „Ma Gado e sori taki a lobi wi fu di Krestes dede gi wi, aladi wi ben de sondari ete”, na so Paulus ben skrifi (Romesma 5:8). Iya, Yehovah ben seti sani fu meki Yesus „gi en libi leki wan lusu-paiman gi furu sma” (Mateyus 20:28). Te wi e bribi na ini a frulusu-ofrandi, dan dati e opo a pasi gi wi fu kon krosibei na Gado. Fu di „Gado fosi lobi wi”, meki en na a sma di bigin seti sani fu meki wi tron mati fu en.​—1 Yohanes 4:19.

6, 7. (a) Fa wi du sabi taki Yehovah a no wan Gado di kibri ensrefi gi sma èn di wi no man kon sabi? (b) Na sortu fasi Yehovah tyari kon na krin suma na en?

⁶ Ma Yehovah du ete wan sani: A fruteri wi suma na en. Te wi e tron bun mati fu wan sma, dan dati wani taki dati wi kon sabi en bun, taki wi e lespeki en, èn taki wi lobi fa a de. Sobun, efu Yehovah ben de wan Gado di kibri ensrefi gi trawan, wan Gado di yu no man kon sabi, dan wi no ben o man tron mati fu en noiti. Ma na presi fu kibri ensrefi gi sma, a wani taki wi musu kon sabi en (Yesaya 45:19). Moro fara, a de so taki ibriwan sma kan kon sabi suma na en. Iya, srefi den wan di grontapu e si leki sma di no de prenspari kan kon sabi suma na en.​—Mateyus 11:25.

 ⁷ Na sortu fasi Yehovah tyari kon na krin suma na en? Den sani di Gado meki e yepi wi fu kon sabi moro fu a fasi fa a de. Den e sori wi o furu makti a abi, o bigi a koni fu en de, èn o furu lobi a abi (Romesma 1:20). Ma den sani di Yehovah meki a no den wan-enkri sani di a e gebroiki fu yepi wi fu kon sabi suma na en. Fu di Yehovah lobi fu gi sma furu bun leri, meki a sorgu taki sma skrifi sani fu en na ini en Wortu, Bijbel.

8. Fu san ede wi kan taki dati a Bijbel srefi na wan krin buweisi taki Yehovah lobi wi?

⁸ A Bijbel srefi na wan krin buweisi taki Yehovah lobi wi. Yehovah e gebroiki a Wortu fu en fu fruteri wi suma na en, èn a e du dati na wan fasi di wi man frustan. Dati e sori wi taki Gado lobi wi, èn a wani taki wi musu sabi en èn lobi en tu. Den sani di wi e leisi na ini a prenspari buku disi e yepi wi fu kon si ’o switi Yehovah de’, èn dati e meki taki wi wani de mati fu en (Psalm 90:17). Meki wi go luku wan tu fu den tumusi moi fasi fa Yehovah e gebroiki en Wortu fu meki wi kon sabi en.

9. San na wan tu Bijbel eksempre di e sori krin san na den fasi fu Gado?

⁹ Na difrenti presi na ini den Buku fu Bijbel wi kan leisi san na den fasi fu Gado. Luku wan tu eksempre. „Yehovah na wan sma di lobi retidu” (Psalm 37:28). Gado „abi makti moro iniwan tra sma” (Yob 37:23). „’Mi de loyaal’, na so Yehovah taki” (Yeremia 3:12). „En ati furu nanga koni” (Yob 9:4). A de „wan Gado di abi sari-ati nanga switifasi, di no e atibron esi-esi èn di abi lobi bun-ati nanga waarheid pasa marki” (Exodus 34:6). „Yu, o Yehovah, na wan sma di bun èn di de klariklari fu gi pardon” (Psalm 86:5). Soleki fa wi ben si na ini a fosi kapitel, dan wán fu den fasi fu Gado prenspari moro ala trawan: „Gado na lobi” (1 Yohanes 4:8). Te yu e prakseri den moi fasi disi di Gado abi, dan yu e kon lobi a Gado disi di yu  no kan teki gersi nanga trawan.

10, 11. (a) San Yehovah poti na ini en Wortu fu yepi wi fu kon frustan moro bun suma na en? (b) Sortu eksempre na ini Bijbel e yepi wi fu si fa Gado e sori a makti fu en?

¹⁰ Boiti taki Yehovah fruteri wi san na den fasi fu en, dan a sorgu tu taki a Wortu fu en abi eksempre na ini di e sori wi fa den fasi fu en e kon na krin na ini den sani di a e du. Den tori disi skrifi na so wan fasi taki a gersi leki den sani di wi e leisi e pasa leti na wi fesi. Na so fasi wi kan kon frustan moro bun fa Gado de, èn dati sa yepi wi fu kon krosibei na en. Prakseri na eksempre disi.

¹¹ Te yu e leisi taki Gado „tranga srefisrefi”, dan dati no e sori yu ete san disi wani taki trutru (Yesaya 40:26). Ma te yu e leisi fa Gado meki Israel pasa na ini a Redi Se èn fa a sorgu a pipel na ini a gran sabana 40 yari langa, dan dati na wan tra tori. Yu man si na yu fesi kaba fa den bigi skwala e prati densrefi. Yu man si tu fa a heri pipel, ala nanga ala kande sowan 3.000.000 sma, e abra a se na tapu drei gron, aladi a watra opo tanapu na ala tu sei leki bigi skotu (Exodus 14:21; 15:8). Yu man si sosrefi fa Gado kibri den Dyu na ini a gran sabana. Watra ben e komoto fu wan stonbergi. Nyanyan di ben gersi wan sortu weti siri ben e fadon na gron (Exodus 16:31; Numeri 20:11). Dyaso Yehovah no e sori nomo taki a abi makti, ma sosrefi taki a e gebroiki a makti fu en fu a bun fu en pipel. A e gi wi deki-ati trutru fu sabi taki den begi fu wi e opo go na wan makti Gado di „de wi kibripresi nanga wi krakti; a de wan yepi di de fu feni makriki na ini ten fu banawtu”.​—Psalm 46:1.

12. Fa Yehovah e yepi wi fu „si” en na wan fasi di wi man frustan?

 ¹² Fu di Yehovah na wan yeye, meki a du moro srefi fu meki wi kon sabi en. Wi leki libisma no man si ala sani. Den wan-enkri sani di wi man si, na sani di meki na so wan fasi taki wi ai kan si den. Fu dati ede wi no man si den yeye. Efu Gado ben sa fruteri wi fa en leki wan yeye de trutru, dan a ben o de neleki te yu e pruberi fu fruteri wan sma di gebore breni, san na a kloru fu yu ai, noso taki yu abi flaka na ini yu fesi. Ma na presi fu dati, Yehovah e yepi wi na wan switi fasi fu kon frustan fa a de trutru, so taki a gersi leki wi man „si” en. Son leisi a e taki sani na wan agersi fasi, pe a e teki ensrefi gersi nanga sani di wi sabi. Son tron a e taki fu ensrefi neleki a abi wan skin leki a di fu libisma. *

13. San yu e si na yu fesi te yu luku Yesaya 40:11? San a tori dati abi fu du nanga yu?

¹³ Luku san Yesaya 40:11 e taki fu Yehovah: „Leki wan skapuman a sa tiri en eigi ipi. Nanga en anu a sa tyari den pikin skapu kon na wan, èn na en borsu a sa tyari den.” Dyaso Bijbel e agersi Yehovah nanga wan skapuman di e opo den pikin skapu nanga „en anu”. Disi wani taki dati Gado man fu kibri èn horibaka gi a pipel fu en, iya, srefi gi den swakiwan na den mindri. Na ini den tranga anu fu en wi no abi fu frede noti, bika efu wi no gowe libi en, dan ensrefi no sa gowe libi wi tu (Romesma 8:38, 39). A Gran Skapuman e tyari den pikin skapu fu en „na en borsu”. Den wortu disi abi fu du nanga den ploi fu a tapusei krosi fu wan skapuman. Ten na ten wan skapuman ben e syow wan nyun-gebore pikin skapu na a fasi dati. Den wortu disi e gi wi a dyaranti taki wi warti gi  Yehovah èn taki a e sorgu wi nanga furu lobi. A no e fruwondru wi fu dati ede, te wan sma wani de krosibei fu en.

14. Fu san ede wi kan taki dati Yehovah e gebroiki Yesus fu fruteri wi den moro soifri tori fu en?

¹⁴ Den moro soifri tori di Yehovah e fruteri fu ensrefi na ini a Wortu fu en, na sani di a tyari kon na krin nanga yepi fu en lobi Manpikin, Yesus. Boiti Yesus, dan nowan tra sma ben man sori wi moro krin fa Gado e denki noso e firi, èn nowan sma ben man fruteri wi moro soifri fa Gado de. Dati no e fruwondru wi, bika a fosi gebore Manpikin disi ben de kaba nanga a Tata, bifo Gado meki den yeye noso iniwan tra sani di wi kan si (Kolosesma 1:15). Yesus ben sabi Yehovah dorodoro. Dati meki a ben kan taki: „Nowan sma sabi a Manpikin, boiti a Tata; nowan sma sabi a Tata, boiti a Manpikin, nanga a sma di a Manpikin wani taki a kon sabi a Tata” (Lukas 10:22). Di Yesus ben de na grontapu leki wan libisma, dan na tu difrenti fasi a meki wi kon sabi suma na en Tata.

15, 16. San na tu fasi fa Yesus sori wi fa en Tata de?

 ¹⁵ Na a fosi presi, den sani di Yesus leri wi e yepi wi fu kon sabi en Tata. A fasi fa Yesus e fruteri wi fu Yehovah e naki wi ati trutru. Leki eksempre: Fu sori taki Gado na wan sari-ati sma di de klariklari fu teki sondari baka te den abi berow fu den sondu, dan Yesus teki Yehovah gersi nanga wan sari-ati papa. Te a papa disi e si taki a manpikin fu en di ben go libi wan yayo libi, e drai kon baka, dan a e prisiri so te, taki a e lon go brasa a boi, aladi a e bosi en na wan switi fasi (Lukas 15:11-24). Yesus sori tu taki Yehovah na wan Gado di e „hari” reti-ati sma kon na en fu di a lobi ibriwan fu den (Yohanes 6:44). A sabi srefi te wan pikin fowru e fadon na gron. Yesus ben taki: „Un no musu frede: unu warti moro leki furu pikin fowru” (Mateyus 10:29, 31). A no de fu taki dati so wan lobi-ati Gado e hari wi trutru.

¹⁶ Leki a di fu tu sani, wi e kon sabi fa Yehovah de te wi e luku na eksempre fu Yesus. A fasi fa Yesus teki na eksempre fu en Tata ben de so soifri, dati a ben kan taki: „A sma di si mi, si a Tata tu” (Yohanes 14:9). Sobun, te wi e leisi na ini den Evangelie tori fa Yesus ben e firi èn fa a ben e libi nanga tra sma, dan yu kan taki dati wi e kon sabi soifri fa a Tata de. Na eksempre fu Yesus na a moro bun sani di Yehovah ben kan gebroiki fu sori wi san na den fasi fu En. Fu san ede?

17. Gi wan eksempre fu sori san Yehovah du fu yepi wi fu kon frustan fa a de.

¹⁷ Fu gi yu wan eksempre: Prakseri taki yu e pruberi fu fruteri wan sma san na bunfasi. Kande yu sa gebroiki wortu fu fruteri san dati wani taki. Ma efu yu man sori go na wan sma di e du wan bun sani trutru èn efu yu man taki: „San a sma dati du, dati na bunfasi”, dan a ben o de moro krin san a wortu bunfasi wani taki trutru. We, Yehovah du wan srefi sortu sani tu fu yepi wi fu kon frustan fa ensrefi de. Boiti taki a gebroiki wortu, dan gebroiki na eksempre fu en Manpikin sosrefi fu sori wi fa a de. Te wi e luku Yesus, dan wi e si fa Gado e du sani. Te yu luku en bun, dan Yehovah e gebroiki den Evangelie tori di e fruteri wi fu Yesus, fu taigi wi: „Neleki fa en de, na so mi  de tu.” San den tori fu Bijbel di Gado meki sma skrifi, e taki fu Yesus di a ben de na grontapu?

18. Fa Yesus ben gebroiki a makti, a retidu, nanga a koni fu en?

¹⁸ Te wi e luku Yesus dan wi e si na wan tumusi moi fasi san na den fo moro prenspari fasi fu Gado. A ben abi makti fu puru siki, angri, nanga dede srefi. Toku Yesus no ben de leki tra libisma di lobi fu gebroiki a makti fu den na wan fowtu fasi. Noiti a gebroiki a makti di a ben abi fu du wondru gi ensrefi, noso fu du trawan ogri (Mateyus 4:2-4). A ben lobi retidu. Nanga reti a ben atibron di a si fa den kruka bisnisman ben e fufuru a pipel (Mateyus 21:12, 13). A no ben lobi a wan sma moro a trawan, ma a ben sori taki a ben lobi den pôtiwan tu nanga den sma di ben lasi-ati, aladi a ben e yepi den sortu sma dati fu „kisi krakti baka” gi den sili (Mateyus 11:4, 5, 28-30). Den sani di Yesus ben e leri sma ben e sori taki a ben abi bun furu koni, iya, Yesus ben bigi „moro leki Salomo” (Mateyus 12:42). Ma noiti Yesus meki bigi nanga a koni fu en. Den wortu fu en ben e naki na ati fu mofina sma, bika a fasi fa a ben e gi leri ben de krin èn makriki fu frustan, èn sma ben kan gebroiki san den ben e leri wantewante.

19, 20. (a) Fa Yesus ben de wan moi eksempre na ini a fasi fa a sori lobi gi sma? (b) San wi musu hori na prakseri te wi e leisi èn e denki fu na eksempre fu Yesus?

¹⁹ Yesus gi wan tumusi moi eksempre na ini a fasi fa a sori lobi. Na ini a diniwroko fu en a sori lobi na furu difrenti fasi; a ben sori taki a e firi gi sma èn taki a ben abi sari-ati gi den. A no ben man si fa trawan e pina, sondro fu firi sari gi den. Ibri tron te a ben e si a nowtu fu trawan a ben e yepi den wantewante (Mateyus 14:14). A tru taki Yesus dresi sikiwan èn taki a gi nyanyan na sma di ben de nanga angri, ma toku a sori sari-ati gi sma na wan moro prenspari fasi srefi. A yepi trawan fu kon sabi a waarheid fu a Kownukondre fu Gado di sa tyari têgo blesi kon gi a libisma famiri. Yesus yepi sma tu fu teki a waarheid dati, èn fu kon lobi a waarheid (Markus 6:34; Lukas 4:43). Boiti den sani dati, dan Yesus ben sori taki a ben lobi sma  so te, taki a ben de klariklari fu gi en sili gi a bun fu trawan.​—Yohanes 15:13.

²⁰ Efu yu hori na prakseri taki Yesus ben abi switifasi èn taki a ben abi den sortu dipi firi dati, dan a no e fruwondru yu taki ala sortu sma ben lobi en, a no so? (Markus 10:13-16) Ma te wi e leisi èn e denki fu na eksempre fu Yesus, dan a bun fu hori na prakseri taki a fasi fa a Manpikin disi tyari ensrefi e sori wi krin fa a Tata de.​—Hebrewsma 1:3.

21, 22. San wan sma musu du te a e suku Yehovah? Sortu sani na ini a buku disi kan yepi wi fu du dati?

²¹ Yehovah gebroiki a Wortu fu en fu sori wi krin suma na en. Na so fasi a e sori wi krin dati a wani taki wi musu de krosibei fu en. Toku Gado no e dwengi wi fu kon kisi wan bun banti nanga en. A de na wi fu suku Yehovah, ’aladi wi kan feni en’ (Yesaya 55:6). Fu suku Yehovah wani taki dati wi musu kon sabi a fasi fa a de èn fa a e du sani, soleki fa Bijbel e sori wi. A buku di yu e leisi na a momenti disi meki spesrutu fu yepi yu fu man du dati.

²² Yu sa si taki a buku disi prati na fo pisi, fu di a e taki fu den fo moro prenspari fasi fu Yehovah: makti, retidu, koni, nanga lobi. Ibriwan fu den pisi disi e bigin nanga wan syatu fruklari fu a spesrutu fasi fu Gado di o kon na krin na ini a pisi dati.  Den kapitel di e kon baka dati, e fruteri yu fa Yehovah e sori a fasi dati na difrenti okasi. Ibriwan fu den fo pisi fu a buku disi abi wan kapitel sosrefi di e fruteri fa Yesus ben sori a fasi dati, èn a lasti kapitel fu ibri pisi e fruteri fa wi kan sori a srefi fasi dati na ini wi eigi libi.

23, 24. (a) Fruteri fa wi musu gebroiki a faki „Denki dipi fu den aksi disi”. (b) Fa wi e kon moro krosibei na Gado te wi e denki dipi fu sani?

²³ Bigin nanga a kapitel disi, yu sa si wan spesrutu faki di nen „Denki dipi fu den aksi disi”. Luku a faki na tapu bladzijde 24 leki eksempre. Den bijbeltekst nanga den aksi na ini a faki no de fu fruteri yu syatu san yu ben leri na ini a kapitel. Na presi fu dati, den musu yepi yu fu go prakseri fu wan tu tra prenspari sani, di abi fu du nanga den tori na ini a kapitel. San na a moro bun fasi fa yu kan gebroiki den aksi disi? Suku ibriwan fu den tekst di kari na ini a faki, èn leisi den bun. Dan yu musu luku na aksi di skrifi baka a tekst. Prakseri bun fu a piki tapu den aksi dati. Kande yu wani go ondrosuku wan tu sani moro fini. Poti wan tu tra aksi gi yusrefi tu, soleki: ’San den tori disi e leri mi fu Yehovah? San a tori disi abi fu du nanga a libi fu mi? Fa mi kan gebroiki en fu yepi trawan?’

²⁴ Te wi e denki dipi fu sani na a fasi disi, dan dati kan yepi wi fu kon moro krosibei na Yehovah. Fu san ede? Bijbel e sori taki a denki di wan sma e denki dipi fu sani, abi fu du nanga na ati (Psalm 19:14). Te wi e warderi san wi e leri fu Gado èn te wi e denki dipi fu dati, dan a de neleki den sani di wi e leri e sungu go na ini na agersi ati fu wi. Na so fasi a abi krakti tapu wi frustan, a e naki wi ati, èn te fu kaba a e pusu wi fu du wan sani. A lobi di wi abi gi Gado e kon moro tranga, èn a srefi lobi dati e meki taki wi wani plisi Gado bika en na a moro bun Mati di wi abi (1 Yohanes 5:3). Ma fu kisi so wan banti nanga Yehovah, dan wi musu kon sabi san na den fasi fu en èn fa a e du sani. Ma bifo wi go luku den tori dati, dan meki wi go luku wan prenspari sani di abi fu du nanga a fasi fa Gado de; wan fu den fasi fu en di o sori wi fu san ede a de tumusi prenspari taki wi musu wani kon krosibei na en. A fasi dati na a santafasi fu en.