SAN yu lobi moro? Fu wroko, noso fu prei?— A no de fu taki, dati a no de wan takru sani taki yu e prei. Bijbel e taki dati Yerusalem ben ’lai nanga boi nanga meisje di ben e prei na tapu den publiki pren fu en’.​—Sakaria 8:5.

A Bigi Leriman ben lobi fu luku fa pikin-nengre ben e prei. Bifo a ben kon na grontapu, a ben taki: ’Mi ben tron leki wan tumusi bun wrokoman na [Gado] sei . . . èn mi ben breiti na en fesi ala ten.’ Luku taki Yesus ben de wan wrokoman makandra nanga Yehovah na ini hemel. Èn di a ben de drape, dan a taki: „Den sani di mi ben lobi trutru, ben de den manpikin fu libisma.” Iya, soleki fa wi ben leri kaba, dan a Bigi Leriman ben lobi poti prakseri na ala sma trutru, sosrefi na yonguwan.​—Odo 8:30, 31.

 Yu denki taki Yesus ben e prei di a ben de pikin?— A ben musu fu de so. Yesus ben de „wan tumusi bun wrokoman” na ini hemel. Ma a ben e wroko na grontapu tu?— We, sma ben e kari Yesus „a manpikin fu a temreman”. Ma den ben e kari en sosrefi „a temreman”. San disi e sori?— A ben musu de so taki Yosef, di ben kweki Yesus leki en manpikin, ben gi en leri. Na so Yesus kon tron wan temreman tu.​—Mateyus 13:55; Markus 6:3.

O bun Yesus ben e du a temreman-wroko?— Fu di a ben de wan tumusi bun wrokoman na ini hemel, dan yu no denki taki a ben tron wan tumusi bun temreman na grontapu?— Luku o tranga a temreman-wroko  ben de na a ten dati. Kande Yesus ben musu go kapu wan bon. Dan baka dati, a ben musu kapu en na pisipisi, a ben musu tyari na udu go na oso, èn te fu kaba a ben musu meki tafra, bangi, nanga tra sani nanga na udu.

Yu denki taki a wroko disi ben e gi Yesus prisiri?— Yu ben o breiti efu yu ben kan meki moi tafra, sturu, nanga tra sani di sma kan gebroiki?— Bijbel e taki dati a bun te wan sma e ’prisiri nanga den wroko fu en’. Te yu e wroko, dan dati e gi yu wan sortu prisiri di yu no e kisi te yu e prei.​—Preikiman 3:22.

Iya, wroko na wan sani di bun gi wi frustan èn gi wi skin. Furu pikin e sidon nomo e taki tori, noso den e prei nanga den mati fu den. Den e kon lesi, den tranga-ede, èn den no de koloku trutru. Den no e gi tra sma prisiri tu. San wi musu du fu de koloku?—

Wi leri na ini kapitel 17 fu a buku disi dati wi e firi koloku te wi e gi trawan sani èn te wi e du sani fu yepi den (Tori fu den Apostel 20:35). Bijbel e kari Yehovah „a koloku Gado” (1 Timoteyus 1:11). Èn soleki fa wi e leisi na ini Odo, dan Yesus ben „breiti na en fesi ala ten”. Fu san ede Yesus ben de koloku?— We, soleki fa a ben taki, dan wán fu den sani di ben meki a firi koloku, na disi: „Mi Tata tan wroko teleki now, èn mi e tan wroko tu.”​—Yohanes 5:17.

Di Yesus ben de na grontapu, dan a no du a temreman-wroko en heri libi langa. Yehovah Gado ben abi wan spesrutu wroko gi en fu du na grontapu. Yu sabi san ben de a wroko dati?— Yesus ben taki: ’Mi musu go fruteri a bun nyunsu fu Gado kownukondre, bika na fu disi Gado seni mi kon’ (Lukas 4:43). Son leisi te Yesus ben e preiki gi sma, dan den ben e bribi en èn den ben e fruteri tra sma den sani di a ben taki. Na dati a Samaria-uma di yu e si dyaso ben du.​—Yohanes 4:7-15, 27-30.

 Fa Yesus ben feni a wroko disi? Yu denki taki a ben wani du en trutru?— Yesus ben taki: ’Mi nyanyan na taki mi musu du a wani fu a sma di seni mi kon èn mi musu klari a wroko fu en sosrefi’ (Yohanes 4:34). Fa yu e feni en te yu e nyan wan sani di yu lobi kefalek?— Disi e yepi yu fu frustan omeni Yesus ben lobi a wroko di Gado ben gi en fu du.

Gado meki wi na so wan fasi taki wi e kisi prisiri te wi leri fu wroko. A e taki dati a presenti di A gi libisma, na taki den musu ’prisiri nanga a tranga wroko di den e du’. Sobun, efu yu e leri fu wroko te yu de yongu ete, dan yu sa abi moro prisiri na ini yu libi.​—Preikiman 5:19.

Dati no wani taki dati wan yongu pikin kan du a wroko fu wan moro owru sma, ma wi alamala kan du wan pikin wroko. Kande yu papa nanga mama e go wroko ibri dei fu meki moni so taki yu famiri kan abi nyanyan èn wan presi fu tan. Èn soleki fa yu sabi, dan bun furu wroko de fu du na oso fu man hori en krin.

Sortu wroko yu kan du di sa gi a heri famiri prisiri?— Yu kan yepi seti a tafra, wasi doti sani, krabu a prasi, krin yu kamra, èn piki den preisani fu yu poti baka na den presi. Kande yu e du wan tu fu den sani disi kaba. Disi e gi a heri famiri prisiri trutru.

Meki wi luku fu san ede a bun fu du den sortu wroko dati. Yu musu poti yu preisani baka na den presi te yu kaba prei nanga den. Fu san ede yu denki taki a de prenspari fu du dati?— Na so fasi na oso e tan krin, èn sma no sa kisi mankeri. Efu yu no e piki den preisani fu yu, dan te yu mama e kon na oso wan dei nanga wan lo sani na ini en anu, a ben kan trapu na tapu wan fu den preisani dati. Yu mama ben kan fadon kisi mankeri. Kande a sa musu go na ati-oso srefi. A ben o de wan sari sani efu dati ben pasa, a no so?— Sobun te yu e poti yu preisani baka na den presi te yu kaba prei, dan dati o gi ala sma prisiri.

 Tra wroko de tu di pikin-nengre musu du. Fu gi wan eksempre, den abi skorowroko. Na skoro yu e leri leisi. Son pikin lobi leisi, ma trawan fu den e taki dati a muilek. Srefi te yu feni en muilek na ini a bigin, yu sa breiti bakaten te yu e leri fu leisi bun. Te yu sabi leisi, dan yu kan leri furu moi sani. Iya, yu sa man leisi Gado en eigi buku, Bijbel gi yusrefi. Sobun, te yu e wroko bun na skoro, dan yu sa kisi prisiri fu dati trutru, a no so?—

Son sma e suku ala fasi fu no wroko. Kande yu sabi wan sma di e du dati. Ma fu di Gado meki wi fu wroko, dan wi musu leri fu lobi dati. A Bigi Leriman ben lobi a wroko fu en?— Iya, a ben lobi en neleki fa a ben lobi wan kefalek switi nyanyan. Èn fu sortu wroko a ben taki?— A wroko fu fruteri trawan fu Yehovah Gado èn fa den kan kisi têgo libi.

We, luku wan sani di kan yepi wi fu prisiri nanga a wroko di wi musu du. Aksi yusrefi: ’Fu san ede mi musu du a wroko disi?’ Te yu sabi fu san ede wan sani de prenspari, dan a moro makriki fu du en. Èn awansi a wroko bigi noso pikin, du en bun. Te yu e du dati, dan yu kan prisiri nanga a wroko fu yu anu, neleki a Bigi Leriman fu wi.