YU E taki nanga Yehovah Gado?— A wani yu fu taki nanga en. Te yu e taki nanga Gado, dan dati wani taki dati yu e begi. Yesus ben taki furu tron nanga en Tata na ini hemel. Son leisi a ben wani de en wawan te a ben e taki nanga Gado. Bijbel e taki dati wan leisi, ’a kren na tapu a bergi fu go begi. A ben lati kaba, ma toku en wawan ben de drape.’​—Mateyus 14:23.

Pe yu kan go fu begi Yehovah yu wawan?— Kande yu kan de yu wawan fu taki nanga Yehovah fosi yu e go sribi te neti. Yesus ben taki: „Te yu e begi, dan go na ini yu kamra, èn baka te yu tapu yu doro, begi yu Tata” (Mateyus 6:6). Yu e begi Yehovah ibri neti fosi yu e go sribi?— A ben o bun te yu e du dati.

Yesus ben begi tu te tra sma ben de nanga en. Di Yesus en mati Lasarus dede, dan a begi nanga tra sma na a  presi pe den ben poti Lasarus en dedeskin (Yohanes 11:41, 42). Èn Yesus ben gwenti fu begi tu te a ben e kon makandra nanga den disipel fu en. Yu e go na konmakandra pe wan sma e begi gi ala den sma di kon drape?— Furu tron wan moro owru sma sa begi. Arki bun san a e taki, bika a e taki nanga Gado gi yu. Dan yu sa man taki „Amen” na a kaba fu a begi. Yu sabi fu san ede yu musu taki „Amen” na a kaba fu wan begi?— Na so fasi yu e sori taki yu lobi a begi. Yu e sori sosrefi taki yu e agri nanga a begi, èn taki yu wani dati a musu de yu begi tu.

Yesus ben begi tu te a ben de ten fu nyan. A ben taki Yehovah tangi gi a nyanyan fu en. Ala ten yu e taki Yehovah tangi fosi yu e nyan?— A bun te wi e taki Yehovah tangi gi a nyanyan fosi wi e bigin nyan. Wan tra sma ben kan begi te unu e nyan nanga makandra. Ma fa a de te yu wawan e nyan? Noso fa a de te yu e nyan makandra nanga sma di no e taki Yehovah tangi?— Dan yusrefi musu begi.

Yu musu taki tranga ala ten te yu e begi? Noso, Yehovah kan yere yu te yu e begi sondro fu taki?— Wi kan kisi piki tapu den aksi dati te wi e luku san ben pasa nanga Nehemia. A ben de wan  anbegiman fu Yehovah di ben wroko na ini na oso fu Kownu Artakserkses fu Persiakondre. Wan dei, Nehemia ben e firi sari srefisrefi fu di a ben yere taki den skotu fu Yerusalem, a mamafoto fu en pipel, ben broko fadon.

Di a kownu aksi Nehemia fu san ede a ben e sari, dan Nehemia begi fosi na ini en ati. Baka dati, Nehemia taigi a kownu fu san ede a ben e sari èn a aksi en efu a ben kan go na Yerusalem fu bow den skotu baka. San ben pasa?—

Iya, Gado piki a begi fu Nehemia. A kownu taigi en taki a ben kan go! A kownu gi Nehemia wan lo udu di a ben kan gebroiki fu bow den skotu. Sobun, Gado kan piki den begi fu wi trutru, srefi te wi e begi na ini wi ati.​—Nehemia 1:2, 3; 2:4-8.

 Now, prakseri a sani disi. Yu musu boigi yu ede te yu e begi? Yu musu saka kindi? San yu denki?— Son leisi Yesus ben saka kindi te a ben e begi. Tra leisi a ben opo tanapu. Èn wanwan leisi a ben opo en ede go na loktu te a ben e begi, soleki fa a ben du dati di a ben e begi gi Lasarus.

We, san disi e sori?— Iya, disi e sori taki a no prenspari efu yu e sidon noso efu yu e tanapu. Son leisi a bun fu boigi yu ede en fu tapu yu ai. Tra leisi, kande yu sa wani saka kindi srefi, soleki fa Yesus ben du dati. Ma memre taki wi kan begi Gado iniwan ten, awansi na neti noso deiten, èn a sa arki wi. A sani di de prenspari te wi e begi, na taki wi musu bribi trutru taki Yehovah e arki wi. Yu e bribi taki Yehovah e arki den begi fu yu?—

San wi musu taki te wi e begi Yehovah?— Taigi mi: Te yu e begi, dan fu sortu sani yu e taki nanga Gado?— Yehovah e gi wi so furu bun sani, èn a bun fu taki en tangi gi den sani disi, a no so?— Wi kan taki en tangi gi a nyanyan di wi e nyan. Ma oiti yu taki en tangi gi a blaw hemel, den grun bon, nanga den moi bromki?— A meki den sani dati tu.

Den disipel fu Yesus ben aksi en wan leisi fu leri den fa fu begi. Sobun a Bigi Leriman du dati, èn a sori den disipel san ben de den moro prenspari sani di wi musu aksi Gado na ini den begi fu wi. Yu sabi san na den sani disi?— Teki yu Bijbel, èn opo en na  Mateyus kapitel 6. Na ini vers 9 te go miti vers 13, wi e feni san furu sma e kari a Wi Tata Begi. Meki wi leisi en nanga makandra.

Dyaso wi e leri taki Yesus ben taigi wi fu begi fu Gado nen. A ben taigi wi fu begi taki Gado en nen musu kon santa. San na Gado nen?— Iya, dati na Yehovah, èn wi musu lobi a nen dati.

Leki a di fu tu sani, Yesus ben leri wi fu begi taki a Kownukondre fu Gado musu kon. A Kownukondre disi de prenspari fu di a sa tyari vrede kon na grontapu èn a sa meki grontapu tron wan paradijs.

Leki a di fu dri sani, a Bigi Leriman ben taigi wi fu begi taki a wani fu Gado musu pasa na grontapu neleki fa a e pasa na hemel. Te wi e begi gi a sani disi, dan wi musu du san Gado wani.

Baka dati, Yesus leri wi fu begi gi a nyanyan di wi abi fanowdu fu a dei. A ben taki sosrefi taki wi musu fruteri Gado taki wi e firi sari te wi du sani di no bun. Èn wi musu aksi Gado pardon. Ma fosi Gado sa du dati, dan wi musu gi trawan pardon te den du wan ogri nanga wi. A makriki gi yu fu du a sani dati?—

Te fu kaba, Yesus ben taki dati wi musu begi Yehovah Gado fu kibri wi gi na ogriwan, Satan Didibri. Sobun ala den sani disi na bun sani di wi kan aksi Gado te wi e begi en.

Wi musu bribi taki Yehovah e arki den begi fu wi. Boiti taki wi e aksi en fu yepi wi, wi musu tan taki en tangi tu. A e prisiri te den sani di wi e taki na ini den begi fu wi e komoto fu wi ati, èn te wi e aksi en sani di fiti. Èn a sa gi wi den sani disi. Yu e bribi dati?—