Den skotu fu Yerusalem kaba bow moro leki 400 yari kaba. Wan priester di nen Sakaria nanga en frow Elisabet e libi krosibei fu a foto. Den ben trow omeni yari kaba, ma den no ben abi nowan pikin. Wan dei di Sakaria ben e bron switismeri leki ofrandi na ini a tempel, na engel Gabrièl kon na en. Sakaria ben frede, ma Gabrièl taigi en: ’No frede. Mi tyari bun nyunsu fu Yehovah kon gi yu. Yu frow Elisabet o kisi wan boi èn yu musu kari en Yohanes. Yehovah teki Yohanes fu du wan spesrutu wroko.’ Sakaria aksi na engel: ’Fa mi kan sabi taki disi tru? Mi nanga mi frow owru tumusi fu kisi wan pikin.’ Gabrièl taki: ’Na Gado seni mi kon fu gi yu a boskopu disi. Ma fu di yu no bribi san mi taki, meki yu o kon babaw teleki a beibi gebore.’

Sakaria tan na ini a tempel moro langa leki san a ben gwenti. Dati meki di a kon na dorosei, den sma di ben e wakti en ben wani sabi san pasa. Sakaria no ben man taki. Nanga en anu a ben e sori den san pasa. Ne den sma kon frustan taki a ben kisi wan boskopu fu Gado.

Baka wan pisi ten, Elisabet kon de nanga bere èn a kisi wan boi soleki fa na engel ben taki. Den mati fu en nanga en famiri kon luku a beibi. Den ben breiti gi en. Elisabet taki: ’Wi o kari en Yohanes.’ Den taigi en: ’Nowan famiri fu yu abi a nen Yohanes. Kari en Sakaria, neleki en papa.’ Ma Sakaria skrifi na tapu wan planga: ’En nen na Yohanes.’ Wantewante Sakaria ben man taki baka! Ala sma na ini heri Yudea yere a nyunsu fu a beibi èn den ben e prakseri: ’San a yongu pikin disi o tron?’

Ne santa yeye kon na tapu Sakaria èn a bigin taki profeititori. A taki: ’Prèise Yehovah. A ben pramisi Abraham taki a ben o seni wan sma kon di ben o frulusu  wi, a Mesias. Yohanes o tron wan profeiti èn a o sreka a pasi gi a Mesias.’

Wan aparti sani pasa tu nanga Maria, wan famiri fu Elisabet. Na ini a tra les wi o taki fu dati.