A no de fu taki dati yu lobi fu kisi bun nyunsu. We, bun nyunsu de gi yu nanga den lobiwan fu yu.

A bun nyunsu dati de na ini Bijbel, wan buku di Yehovah Gado, a Mekiman fu hemel nanga grontapu, meki sma skrifi furu yari pasa. Na ini a buku disi wi o poti prakseri na fo Bijbel buku di abi heri bun nyunsu gi wi alamala. Den buku disi abi den nen fu den sma di Gado gebroiki fu skrifi den. Den nen fu den buku na Mateyus, Markus, Lukas nanga Yohanes.

Furu sma e kari den Bijbel buku disi den fo Evangelietori. Ala den fo buku disi e taki fu na evangelie fu Yesus, noso a bun nyunsu fu Yesus. A bun nyunsu disi na taki Gado seni Yesus fu frulusu libisma. Boiti dati, te Yesus tron Kownu fu Gado Kownukondre a o tyari têgo blesi gi ala sma di e poti bribi na ini en.​—Markus 10:17, 30; 13:13.

Kande yu aksi yusrefi fu san ede Gado meki sma skrifi fo buku di e taki fu a libi fu Yesus èn fu den sani di a leri sma.

A bun taki difrenti sma skrifi fu den sani di Yesus taki èn du. Kon meki wi taki dati fo man e tanapu krosibei fu wan leriman di ala sma sabi. A man di e tanapu na fesi a leriman abi wan belasting-kantoro. A man di e tanapu na a reti-anusei fu a leriman na wan datra. A man di e tanapu na a kruktu-anusei na wan fisiman èn wan bun mati fu a leriman. A tra man e tanapu na bakasei. A yongu moro den trawan èn a e luku san e pasa. Ala den fo man disi na krin-ati man èn difrenti sani e hari den prakseri. Sobun, efu den fo man disi ben o skrifi fu den sani di a leriman taki èn du, wi kan frustan taki den ben o fruteri den sani disi na fo difrenti fasi. Te wi e hori a sani disi na prakseri te wi e leisi den fo Bijbel buku disi, dan wi o man frustan moro bun san a leriman ben taki èn san a ben du. Na so wi kan kisi wini fu den fo difrenti buku di e taki fu a libi fu a Bigi Leriman Yesus.

Kon meki wi taki dati a man di abi a belasting-kantoro abi a Dyu pipel na prakseri te a e skrifi sani. Fu dati ede, te a e skrifi a buku fu en, a e skrifi fu son leri èn fu son sani di e hari a prakseri fu den  Dyu. A e skrifi den sani disi na so wan fasi taki den Dyu kan kisi wini fu dati. A datra e taki moro furu fu a fasi fa a leriman dresi sikiwan nanga malengriwan. A no e taki fu son sani di a belasting-man skrifi èn a no e fruteri den sani soleki fa den pasa baka makandra. A bun mati fu a leriman e taki moro furu fu den fasi di a leriman ben abi èn fu a fasi fa a leriman ben e firi. A moro yongu man e skrifi syatu fu den sani di pasa. Toku ibriwan fu den man fruteri sani soleki fa den pasa trutru. A tori disi e yepi wi fu frustan fu san ede a bun taki fo sma skrifi fu a libi fu Yesus. Te wi e leisi den buku fu den man disi, wi o man frustan moro bun san Yesus du, san a leri sma èn fa a ben de.

Son sma di e taki fu den buku disi, e kari den ’na Evangelietori fu Mateyus’, ’na Evangelietori fu Yohanes’ èn so moro fara. A sani disi no fowtu, fu di ibriwan fu den buku disi abi „bun nyunsu fu Yesus Krestes” (Markus 1:1). Ma te yu luku en bun, wán evangelietori noso bun nyunsu nomo de fu Yesus. Wi kan leisi a tori disi na ini den fo Bijbel buku disi.

Furu sma di e studeri Gado Wortu ondrosuku fa den sani di skrifi na ini Mateyus, Markus, Lukas, nanga Yohanes e kruderi nanga makandra. Na a ten fu a yari 170 a skrifiman Tatianus fu Siria pruberi fu du dati. A kon si taki den fo buku disi e fruteri sani soifri èn taki sma skrifi den nanga yepi fu santa yeye. Na ini a buku Diatessaron, a skrifi den fo Bijbel buku disi leki wán tori.

Na ini a buku disi di nen Yesus​—En na a pasi, en na san tru, en na a libi den tori seti na wan srefi sortu fasi. Ma a buku disi e fruteri den tori moro soifri èn a e taki fu ala den tori di skrifi na ini den fo buku di e taki fu Yesus libi. Fu san ede wi e taki disi? Fu di wi e frustan moro bun now fa furu fu den profeititori nanga agersitori fu Yesus kon tru. Dati meki wi e frustan moro krin san a taki èn san a du. Wi e frustan tu sortu sani pasa baka makandra. Boiti dati, owruten sani di sabiman feni yepi wi fu kon frustan son sani moro bun èn wi man si tu fu san ede den skrifiman ben skrifi son sani na wan spesrutu fasi. A no de fu taki dati nowan sma sabi soifri o ten sonwan fu den tori ben pasa. Ma nanga ala den buweisi di de wi pruberi fu seti den tori na ini a buku disi soleki fa sani waka.

Te yu e leisi a buku disi, dan pruberi fu hori na prakseri san na a moro prenspari sani di yu nanga den lobiwan fu yu kan leri fu a buku disi. Memre taki Yesus Krestes srefi ben taigi na apostel Tomas: „Mi na a pasi, mi na san tru, èn mi na a libi. Nowan sma kan kon na a Tata sondro mi.”​—Yohanes 14:6.

A buku disi o yepi yu fu frustan fu san ede wi kan bribi taki Yesus na „a pasi” trutru. Wi kan begi Yehovah Gado soso nanga yepi fu Yesus. Boiti dati, Yesus wawan kan yepi wi fu kon bun baka nanga Gado (Yohanes 16:23; Romesma 5:8). Sobun, soso nanga yepi fu Yesus wi kan tron mati fu Gado.

Yesus taki tu dati en na „san tru”. A ben e taki san tru èn a heri fasi fa a ben e libi e sori krin san tru. A meki bun furu profeititori kon tru. Den profeititori disi tron „’Iya’ nanga yepi fu en” (2 Korentesma 1:20; Yohanes 1:14). Den profeititori disi e yepi wi fu kon si na sortu prenspari fasi Gado e gebroiki Yesus fu meki a wani fu en kon tru.​—Openbaring 19:10.

Yesus na „a libi” sosrefi. A gi en libi nanga en brudu leki lusu-paiman, so taki wi abi na okasi fu kisi „a trutru libi”, noso „têgo libi” (1 Timoteyus 6:12, 19; Efeisesma 1:7; 1 Yohanes 1:7). En na „a libi” tu gi milyunmilyun sma di dede. Den sma disi o kisi wan opobaka èn den o man libi na ini Paradijs fu têgo.​—Yohanes 5:28, 29.

Wi alamala musu frustan sortu frantwortu Yesus abi èn wi musu frustan o prenspari a frantwortu dati de. Wi howpu taki yu o prisiri fu leri moro fu Yesus di taki: „Mi na a pasi, mi na san tru, èn mi na a libi.”