Baka di den sma fu Nasaret pruberi fu kiri Yesus, a e go na a foto Kaperna-um, di de krosibei fu a Se fu Galilea di sma e kari sosrefi „a se fu Geneisaret” (Lukas 5:1). Na so a profeititori na ini a buku Yesaya e kon tru di e taki dati den sma fu Galilea di e libi krosibei fu a se ben o si wan bigi leti.​—Yesaya 9:1, 2.

Iya, dyaso na ini Galilea Yesus e tan preiki taki „a Kownukondre fu hemel kon krosibei” (Mateyus 4:17). Yesus e go suku fo fu den disipel fu en. Den ben e waka nanga en wan pisi ten kaba. Ma di den disipel nanga Yesus drai kon baka fu Yudea den go na oso, dan den bigin du a fisiwroko baka (Yohanes 1:35-42). Ma now Yesus wani taki den musu de nanga en ala ten, so taki a kan leri den fa fu du a preikiwroko te a no de na grontapu moro.

Te Yesus e waka na sesyoro, a e si Simon Petrus, en brada Andreas nanga wan tu mati fu den e wasi den fisinet fu den. Yesus e go na den, a e kren go na ini a boto fu Petrus, dan a e aksi en fu pari a boto gowe pikinso fu a syoro. Dan Yesus e go sidon èn a e bigin gi leri na den ipi-ipi sma di kon na a sesyoro fu arki san a o taki fu a Kownukondre.

Baka dati Yesus e taigi Petrus: „Go pe a watra dipi, dan un musu saka den fisinèt fu unu go na ini a watra, so taki unu kan kisi fisi.” Ma Petrus e piki en: „Leriman, heri neti wi wroko tranga èn wi no kisi noti, ma fu di yu e aksi dati, meki mi o saka den fisinèt go na ini a watra.”​—Lukas 5:4, 5.

Te den e saka den fisinet go na ini a watra den e fanga so furu fisi, taki den net e bigin priti! Wan tu mati fu den de krosibei na ini wan tra boto. Wantewante den e kari den fu kon yepi den. Di den kon, den furu ala tu boto nanga so furu fisi, taki den boto bigin sungu. Di Petrus si disi, a e saka kindi na fesi Yesus èn a e taki: „Mi Masra, mi no warti fu de krosibei fu yu, bika mi na wan sondu sma.” Yesus e taigi en: „No frede moro. Now yu o bigin kisi sma libilibi.”​—Lukas 5:8, 10.

Yesus e taigi Petrus nanga Andreas: „Un tron bakaman fu mi, dan mi o meki unu tron fisiman di e fanga libisma” (Mateyus 4:19). Baka dati, a e kari tu tra fisiman fu de bakaman fu en. Dati na Yakobus nanga Yohanes, den manpikin fu Sebedeyus. Den srefi e bigin waka na en baka wantewante. Sobun, den fo man disi e gowe libi a fisiwroko fu den èn den tron den fosi disipel di o de nanga Yesus ala ten.