Yesus e gi leri na ini a kontren fu Sesareya Filipi di de sowan 25 kilometer fu Hermon-bergi. A e taigi den apostel a moi sani disi: „Fu tru mi e taigi unu taki sonwan fu unu di e tanapu dyaso, no sa dede kwetikweti fosi den si a Manpikin fu libisma e kon leki kownu na ini en Kownukondre.”​—Mateyus 16:28.

A musu fu de so taki den disipel e aksi densrefi san Yesus wani taki. Baka wan wiki so, Yesus e tyari den dri apostel Petrus, Yakobus, nanga Yohanes go na tapu wan hei bergi. A kan taki den e go na netiyuru fu di sribi e kiri den dri disipel. Te Yesus e begi, a e kenki kon de wan heri tra fasi leti na den fesi. Den apostel e si en fesi e brenki leki son. Boiti dati, den krosi fu en kon weti èn den e brenki srefisrefi.

Dan den e si tu sma, „Moses nanga Elia”. Den tu man disi e bigin taki nanga Yesus ’fu a ten te a o gowe’. A sani disi o „pasa na Yerusalem” (Lukas 9:30, 31). Soleki fa a sori, dan a gowe di Yesus o gowe abi fu du nanga a dede nanga na opobaka fu en soleki fa a ben taki no so langa pasa (Mateyus 16:21). A takimakandra disi e sori taki sani o de heri tra fasi leki fa Petrus ben wani. Yesus o dede na wan syen fasi èn a no kan wai pasi gi dati.

Den dri apostel de wikiwiki. Den e arki èn den e luku nanga opo mofo. Den e si wan fisyun, ma gi den a de leki a e pasa trutru. Dati meki Petrus e taki: „Leriman, a bun taki wi dya. Meki wi bow dri tenti, wán gi yu, wán gi Moses èn wán gi Elia” (Markus 9:5). Fu san ede yu denki taki Petrus wani meki tenti? Na fu di a wani taki a fisyun go doro?

Aladi Petrus e taki, wan brenki wolku e tapu den èn wan sten di komoto fu a wolku e taki: „Disi na mi Manpikin, a lobiwan di mi feni bun. Un arki en.” Te den disipel e yere a sten fu Gado, den e saka kindi, den e boigi den ede èn den e frede srefisrefi. Ma Yesus e taigi den: „Un opo, no frede” (Mateyus 17:5-7). Te den e opo den ede, den no e si nowan sma boiti Yesus. A fisyun kon na wan kaba. Te dei broko èn den e saka fu a bergi, Yesus e taigi den: „Solanga a Manpikin fu libisma no kisi wan opobaka, un no musu fruteri nowan sma a fisyun disi.”​—Mateyus 17:9.

Fu di den apostel ben si Elia na ini a fisyun, meki den e aksi: „Fu san ede den leriman fu Wèt e taki dati Elia musu kon fosi?” Yesus e piki den: „Elia kon kaba èn den no ben sabi taki na en” (Mateyus 17:10-12). Yesus e taki fu Yohanes a Dopuman di ben du a srefi sortu wroko di Elia du. Neleki fa Elia sreka a pasi gi Elisa, na so Yohanes sreka a pasi gi Krestes.

A fisyun tranga a bribi fu Yesus nanga den apostel trutru! A fisyun sori fa Krestes o de te a kisi glori leki Kownu fu Gado Kownukondre. Sobun, den disipel si „a Manpikin fu libisma e kon leki kownu na ini en Kownukondre”, soleki fa Yesus ben taigi den (Mateyus 16:28). Di den ben de na tapu a bergi den ’si a glori fu Krestes nanga den eigi ai’. Di den Fariseiman aksi Yesus fu gi den wan marki fu sori taki en na a sma di Gado poti leki Kownu, dan a no ben wani du dati. Ma den disipel fu Yesus di ben de nanga en ala ten ben kisi na okasi fu si fa Yesus kenki kon de wan heri tra fasi. Disi e sori krin taki na fu en den profeititori fu a Kownukondre e taki. Dati meki Petrus skrifi bakaten: „Wi kisi moro frutrow na ini den profeititori.”​—2 Petrus 1:16-19.