Yairus si taki Yesus dresi na uma di ben lasi brudu furu yari langa. A no de fu taki dati Yesus o man yepi en umapikin tu. Ma a gersi leki a sabi taki nownow a pikin ’sa musu fu dede kaba’ (Mateyus 9:18). A meisje kan kisi yepi ete?

Te Yesus e taki ete nanga na uma di a dresi didyonsro, wan tu man e kon fu Yairus en oso, dan den e taigi en: „Yu umapikin dede!” Den e taki tu: „No trobi a leriman moro.”​—Markus 5:35.

Disi na sari nyunsu trutru! A man disi di abi wan hei posisi èn di furu sma na ini a foto e lespeki, no sabi moro san fu du. En wan-enkri umapikin dede. Ma Yesus yere san den man taki. A e drai luku Yairus èn a e taigi en: „No frede, na bribi yu musu bribi nomo.”​—Markus 5:36.

Yesus e go makandra nanga Yairus na en oso. Te den doro, wan lo sma de drape di e sari trutru. Den e krei bun tranga èn den e meki babari. Yesus e go na inisei, dan a e taki wan sani di den sma no fruwakti. A e taki: „A yongu pikin no dede, ma a e sribi” (Markus 5:39). Te den sma e yere disi, den e lafu Yesus. Den sabi taki a meisje dede. Ma nanga a krakti di Gado gi en, Yesus o sori taki a kan wiki den dedewan neleki fa wan sma di e sribi dipi kan wiki baka.

Now Yesus e seni ala sma go na dorosei, boiti Petrus, Yakobus, Yohanes, nanga a papa nanga a mama fu a meisje. Makandra nanga den feifi sma disi Yesus e go na ini a kamra pe a meisje e didon. A e hori na anu fu a pikin, dan a e taki: „’Talita kumi.’ Disi wani taki: ’Meisje, mi e taigi yu: Opo!’” (Markus 5:41) Wantewante a meisje e opo èn a e bigin waka. Yairus nanga en wefi e prisiri srefisrefi! Yesus e taigi den fu gi a pikin wan sani fu nyan. Disi e buweisi tu taki a meisje de na libi trutru.

Yesus ben taigi den sma di a ben dresi taki den no musu fruteri trawan san a du gi den. Na dati a e taigi a papa nanga a mama fu a meisje tu. Ma a papa nanga a mama èn den tra sma sosrefi breiti so te, taki den e panya a tori „na ini a heri kontren” (Mateyus 9:26). Efu yu ben si fa wan lobiwan fu yu kisi wan opobaka, yu ben o fruteri ala sma fu a tori, a no so? Disi na a di fu tu tori na ini Bijbel di e fruteri fa Yesus gi wan sma wan opobaka.