No so langa pasa, Yesus fruteri den sma baka fa den musu begi. Ma tra sani de tu di a leri sma moro leki wán leisi na ini a diniwroko fu en. Di Yesus ben e du wondru na ini Galilea, sma krutu en taki a ben e du dati nanga yepi fu a makti fu a tiriman fu den ogri yeye. Now sma e krutu en fu a srefi sani dati baka na ini Yudea.

Wan man drape abi wan ogri yeye di e meki taki a no man taki. Te Yesus e puru na ogri yeye na a man tapu, den sma e fruwondru srefisrefi. Ma den sma di e krutu en e denki tra fasi èn den e taki baka: „A e yagi ogri yeye puru na sma tapu nanga yepi fu Beyelsebub, a tiriman fu den ogri yeye” (Lukas 11:15). Tra sma e aksi Yesus fu gi den wan marki fu hemel fu buweisi suma a de trutru.

Fu di Yesus e si taki den wani tesi en, meki a e gi den a srefi piki di a ben gi den sma di ben krutu en na ini Galilea. A e taigi den taki ibri kownukondre di prati o fadon. A e taki: „Efu Satan en kownukondre prati, dan fa a kownukondre fu en sa man tan?” Ne Yesus e taigi den krin: „Efu mi e yagi ogri yeye puru na sma tapu nanga yepi fu Gado [noso, nanga a finga fu Gado], dan a Kownukondre fu Gado kon sondro taki unu sabi.”​—Lukas 11:18-20; luku a futuwortu na Lukas 11:20.

Te Yesus e taki „nanga yepi fu Gado” [noso, nanga a finga fu Gado], dan den arkiman e memre kande san ben pasa nanga a pipel fu Israel hondrohondro yari pasa. Di Moses du wan wondru na ini a kownu-oso fu Farao, dan den sma di si a wondru bari: „Disi de da finga foe Gado” (Eksodes 8:19, Da Bijbel). Na „Gado finga” ben skrifi den Tin Komando tu na tapu den tu plata ston (Eksodes 31:18). „Gado finga” na a santa yeye fu Gado. Na a krakti disi e meki now taki Yesus man puru ogri yeye na sma tapu èn taki a man dresi siki sma. A Kownukondre fu Gado kon sondro taki den gensman disi sabi, fu di Yesus, a sma di Gado o poti leki Kownu fu a Kownukondre, de leti drape e du den wondru disi.

Fu di Yesus man puru ogri yeye na sma tapu, meki a de krin taki a abi makti moro Satan. A de leki te wan tranga man e go feti nanga wan man di e hori wakti na wan kownu-oso èn a e wini a man. Yesus e fruteri na agersitori baka fu wan ogri yeye di ben komoto na wan man tapu. Efu a man no e furu en prakseri nanga bun sani, dan a yeye e drai kon baka nanga seibi trawan. A situwâsi fu a man disi e kon ogri moro leki san a ben de fosi (Mateyus 12:22, 25-29, 43-45). Na so a de nanga a pipel fu Israel.

Wan uma di e arki Yesus e bari: „Koloku fu na uma di ben tyari yu na ini en bere èn di ben gi yu bobi!” Dyu uma ben e howpu taki den kan tron a mama fu wan profeiti, spesrutu fu a Mesias. Dati meki a kan taki na uma disi feni taki Maria musu breiti srefisrefi taki a de a mama fu so wan leriman. Ma Yesus e sori na uma san e meki taki wan sma de koloku trutru. A e taki: „Nôno, koloku fu den sma di e yere a wortu fu Gado èn di e du san a wortu e taki!” (Lukas 11:27, 28) Noiti Yesus taki dati sma musu gi Maria spesrutu grani. Wan man noso wan uma no o de koloku te a de famiri fu wan prenspari sma noso te a man du spesrutu sani. Na presi fu dati, a o de koloku trutru te a e dini Gado nanga en heri ati.

Te den sma e aksi Yesus fu gi den wan marki fu hemel, dan a e piri-ai gi den neleki fa a ben du dati na ini Galilea. A taki dati den no o kisi nowan marki boiti „a marki fu Yona”. Yesus ben taki dati Yona de leki wan marki fu di a ben de dri dei na ini a bere fu a fisi èn fu di a ben e preiki nanga deki-ati. A preikiwroko fu en meki taki den Ninefeisma ben abi berow. Ma Yesus taki: „Wan sma di bigi moro Yona de dya” (Lukas 11:29-32). Boiti dati, Yesus bigi moro Salomo di ben abi so furu koni taki na umakownu fu Skeiba ben kon fu arki en.

Yesus taki tu: „Te wan sma leti wan lampu, a no e poti en na wan kibripresi noso na ondro wan baskita. Na presi fu dati a e poti en na tapu wan hei presi” (Lukas 11:33). Kande Yesus e taki disi fu sori taki a leri di a e gi den sma disi èn den wondru di a e du  na den mindri de neleki te wan sma ben o kibri wan lampu na ondro wan baskita. Fu di den no e si sani krin, meki den no man frustan fu san ede Yesus e du den sani disi.

Didyonsro Yesus puru wan ogri yeye na wan man tapu èn now a man e taki. A sani disi musu meki sma gi Gado glori èn den musu fruteri trawan fu den sani di Yehovah e du. Ma den sma disi di e krutu Yesus no e du dati. Dati meki a e warskow den: „Fu dati ede, de na ai. Luku bun taki a leti di de na ini yu, no kon dungru. Sobun, efu yu heri skin e brenki èn nowan pisi fu en dungru, dan a heri skin o brenki neleki te wan lampu e skèin leti gi yu.”​—Lukas 11:35, 36.