Te Yesus de na ini Yudea, a e go nyan na a oso fu wan Fariseiman. A sori leki a sani disi e pasa na deiten (Lukas 11:37, 38). Fosi den bigin nyan, den Fariseiman e wasi den anu te na den baka-anu, soleki fa a gwenti de. Ma Yesus no e du dati (Mateyus 15:1, 2). A no fowtu te wan sma e wasi en anu te na en baka-anu, ma Gado Wet no e taki dati wan sma musu fu du dati.

Den Fariseiman e fruwondru taki Yesus no e hori ensrefi na a gwenti dati. Yesus sabi san den e denki. Dati meki a e taki: „Un Fariseiman, unu e krin dorosei fu a kan èn fu a preti, ma soso gridi nanga ogri de na inisei fu unu. Un donman! A sma di meki dorosei, meki inisei tu, a no so?”​—Lukas 11:39, 40.

A no fowtu taki den Fariseiman e wasi den anu fosi den go nyan, ma a problema na a hoigrifasi fu den. Den man disi e du leki den e anbegi Gado fayafaya, aladi dati no de so. Den Fariseiman nanga tra sma di abi a gwenti fu wasi den anu te na den baka-anu, no e krin na ati fu den di lai nanga ogridu. Dati meki Yesus e gi den a rai disi: „Un musu du bun gi pôti sma èn un musu gi den san de na ini unu, dan ala tra sani fu unu o de krin” (Lukas 11:41). A sani disi tru! Te sma e gi sani, dan den musu du dati fu di den abi lobi na ini den ati. Den no musu gi sani fu di den wani meki sma denki taki den na reti-ati sma.

A no de so taki den man disi no e gi sani. Yesus e taki: „Unu e gi Gado a di fu tin pisi fu a menti-wiwiri, fu a wijnruit-wiwiri, èn fu ala sortu gruntu, ma unu no e prakseri a retidu nanga a lobi fu Gado! Unu de fruplekti fu gi Gado a di fu tin pisi, ma un musu sorgu taki unu du den tra sani tu” (Lukas 11:42). A Wet fu Gado ben e taki dati sma musu pai a di fu tin pisi fu den nyanyan di den koti na den gron (Deuteronomium 14:22). Dati ben de sosrefi a menti-wiwiri nanga a wijnruit-wiwiri. Den sani disi na spesrei di sma e gebroiki fu gi nyanyan tesi. Den Fariseiman ben e sorgu ala ten taki den ben e gi a di fu tin pisi fu den spesrei disi. Ma den no ben e hori densrefi na den moro prenspari sani fu a Wet. Den ben musu du san reti èn den ben musu abi sakafasi aladi den ben e waka nanga Gado.​—Mika 6:8.

Yesus e taki moro fara: „Helu fu unu, un Fariseiman, bika unu lobi sidon na fesisei na ini den snoga èn unu lobi te sma e gi unu odi na wowoyo! Helu fu unu, bika unu de leki den grebi di no de fu si, èn sma e waka na den tapu sondro fu den sabi!” (Lukas 11:43, 44) A Wet e taki dati wan sma di fadon na tapu so wan grebi, no krin. Yesus e gebroiki a sani disi fu sori taki sma no man si wantewante taki den Fariseiman no krin.​—Mateyus 23:27.

Wan man di sabi Gado Wet heri bun e krutu: „Leriman, te yu e taki den sani disi, dan yu e kosi wi tu.” Ma den man disi musu frustan taki den no e yepi a pipel. Yesus e taki: „Helu fu unu di sabi a Wèt heri bun, bika unu e poti lai na sma tapu di hebi fu tyari, ma unu srefi no e fasi a lai nanga wán finga srefi! Helu fu unu, bika unu e meki den grebi fu den profeiti, ma na den afo fu unu kiri den!”​—Lukas 11:45-47.

Yesus e sori taki son gwenti di den Dyu abi èn a fasi fa den Fariseiman e fruklari a Wet, de leki hebi gi a pipel. Na presi taki den Fariseiman e meki a libi makriki gi a pipel, den de nomonomo taki ala sma tyari den hebi lai disi. Sensi a ten fu Abel, den afo fu den kiri den profeiti fu Gado. Now den e meki grebi gi den profeiti disi, fu meki a gersi leki den e gi den profeiti grani. Ma den abi den srefi fasi fu den afo fu den èn den e du den srefi sani. Den e suku srefi fu kiri a moro prenspari Profeiti fu Gado. Yesus taki dati Gado o strafu den sma disi. Na dati a du sowan 38 yari baka dati, na ini a yari 70.

Yesus e taki moro fara: „Helu fu unu! Unu sabi a Wèt heri bun, ma unu puru a sroto di e opo a doro fu kon sabi Gado. Unu srefi no e  go na inisei èn unu e pruberi fu tapu a pasi gi den sma di wani go na inisei!” (Lukas 11:52) Na presi taki den man disi e yepi sma fu kon frustan san Gado Wortu wani taki, den e tapu pasi gi sma fu kon sabi a Wortu èn fu frustan en.

Fa den Fariseiman nanga den leriman fu Wet feni a sani di Yesus taigi den? Den ati e bron. Fu dati ede, te Yesus e gowe, den e bigin trobi en, èn den e poti wan lo aksi gi en. Den no e aksi en den sani disi fu di den wani teki leri fu en. Na presi fu dati, den wani Yesus fu taki wan sani di kan gi den na okasi fu grabu en.