Yesus nanga den apostel de na pasi ete fu go na Yerusalem. Den e waka pasa na ini Perea go moro na zuidsei, dan den e abra Yordan-liba krosibei fu Yerikow. Tra sma e waka nanga den tu fu go na a Paskafesa fu a yari 33.

Yesus e waka na fesi, fu di a wani doro biten na ini a foto fu hori a Paskafesa. Ma den disipel e frede. Wan pisi ten na fesi di Lasarus dede, Yesus ben o gowe libi Perea fu go na Yudea. Na a ten dati, Tomas taigi den tra disipel: „Kon meki wi go tu, dan wi o dede nanga en” (Yohanes 11:16, 47-53). Sobun, wi kan frustan taki den disipel e frede fu go na Yerusalem, fu di ogri kan miti den drape.

Yesus wani sreka den disipel gi den sani di o pasa. Dati meki a e kari den na wan sei èn a e taigi den: „Luku, wi de na pasi fu go na Yerusalem èn sma o tyari a Manpikin fu libisma go na den edeman fu den priester èn na den leriman fu Wèt. Dan den o krutu en taki a musu dede. Den o tyari en go na den trakondre sma, den o spotu en, den o wipi en, èn den o spikri en na wan postu. Dan a o kisi wan opobaka na a di fu dri dei.”​—Mateyus 20:18, 19.

Disi na a di fu dri leisi di Yesus taigi den disipel fu en taki a o dede èn taki a o kisi wan opobaka (Mateyus 16:21; 17:22, 23). Ma disi leisi a e taigi den taki sma o spikri en na wan pinapostu. Den yere san a taki, ma den no e frustan san a wani taigi den. Kande den e denki taki a kownukondre fu Israel o seti baka na grontapu. Kande den wani kisi glori nanga grani makandra nanga Krestes na ini wan kownukondre na grontapu.

Salome, a mama fu den apostel Yakobus nanga Yohanes, de nanga den tu. Yesus ben kari den tu apostel disi „Manpikin fu Dondru” (Markus 3:17; Lukas 9:54). A no de fu taki dati a kari  den so, fu di den ati e bron esi. Wan pisi ten kaba den tu man disi e suku fu kisi hei posisi na ini a Kownukondre fu Krestes. A mama fu den sabi dati. Now a e go na Yesus fu taki gi den. A e boigi gi Yesus èn a e aksi en fu du wan sani gi en. Yesus e aksi en: „San yu wani?” Salome e taigi en: „Pramisi mi taki den tu manpikin fu mi o sidon na yu sei na ini a Kownukondre fu yu, wan fu den na yu reti-anusei èn a trawan na yu kruktu-anusei.”​—Mateyus 20:20, 21.

Fu taki en leti, na Yakobus nanga Yohanes wani a sani disi. Didyonsro Yesus fruteri den taki sma o wisiwasi en èn a o kisi syen. Dati meki a e taigi den: „Unu no sabi san unu e aksi. Unu o man dringi san mi o dringi?” Den e piki en: „Wi o man” (Mateyus 20:22). Ma a sori leki den no e frustan san disi wani taki gi den.

Toku Yesus e taigi den: „A tru taki unu o dringi san mi o dringi, ma a no mi musu taki suma kan go sidon na mi reti-anusei èn suma kan go sidon na mi kruktu-anusei. Na mi Tata sreka a presi dati gi suma a wani.”​—Mateyus 20:23.

Di den tra tin apostel kon sabi san Yakobus nanga Yohanes ben aksi Yesus, den mandi srefisrefi. Wan leisi den apostel ben e haritaki nanga makandra kaba suma na a moro bigiwan. Kande Yakobus nanga Yohanes ben taigi den trawan taki na den na den moro bigiwan (Lukas 9:46-48). Awansi fa a no fa, a sani di Yakobus nanga Yohanes aksi Yesus now, e sori taki den 12 apostel no teki a rai di Yesus ben gi den fu tyari densrefi leki a moro lagiwan. Te nanga now den e suku fu kisi biginen.

Yesus e bosroiti fu yepi den fu di a problema disi e tyari trobi kon. A e kari den 12 disipel kon na wán, dan a e gi den rai na wan switi fasi. A e taigi den: „Unu sabi taki den wan di sma e si leki tiriman fu den pipel e basi den èn den bigiman fu den abi makti na den tapu. Ma nanga unu a no musu de so. Efu wan sma wani de wan bigiwan na un mindri, dan a musu de un dinari. Efu wan sma wani de a fosiwan na un mindri, dan a musu de srafu fu un alamala.”​—Markus 10:42-44.

Yesus e sori den taki den musu teki na eksempre fu en. A e taigi den: „A Manpikin fu libisma no kon fu sma dini en, ma a kon fu dini sma èn fu gi en libi leki wan lusu-paiman fu frulusu furu sma” (Mateyus 20:28). Sowan dri yari langa, Yesus dini trawan. A o dede srefi gi libisma! Den disipel fu en musu abi a srefi denki fu Krestes. Den musu lobi fu dini trawan na presi fu fruwakti taki trawan dini den. Den musu tyari densrefi leki a moro lagiwan na presi fu tyari densrefi leki a moro bigiwan.