Na engel Gabrièl taigi a yongu uma Maria taki a o kisi wan manpikin di o nen Yesus èn di o tiri leki Kownu fu têgo. Baka dati Maria aksi en: „Fa disi kan? Noiti mi no sribi nanga wan man.”​—Lukas 1:34.

Gabrièl piki en: „Santa yeye o kon na yu tapu èn a krakti fu a Moro Heiwan sa tapu yu. Fu dati ede sma o taki dati a pikin di o gebore santa èn den o kari en Gado Manpikin.”​—Lukas 1:35.

Gabrièl e taigi Maria: „We, srefi yu famiri Elisabet kon de nanga bere. A o kisi wan manpikin aladi a owru kaba. Na uma di sma ben taki fu en taki a no man kisi pikin, de nanga bere siksi mun kaba, bika Gado man du ala san a taki” (Lukas 1:36, 37). Kande Gabrièl e taigi Maria a sani disi fu overtoigi en taki den sani di a taigi en o pasa trutru.

Maria e bribi san Gabrièl taki. Wi kan si dati te wi e luku san a piki. Maria taki: „Luku, mi na a umasrafu fu Yehovah! Meki sani pasa nanga mi soleki fa yu taki.”​—Lukas 1:38.

Te Gabrièl gowe, Maria e bigin sreka sani fu go luku Elisabet. Elisabet nanga en masra Sakaria e libi na a bergikontren fu Yudea, krosibei fu Yerusalem. A kan teki dri dei noso fo dei fu waka fu Nasaret pe Maria e tan, go na a oso fu Elisabet nanga Sakaria.

Te fu kaba Maria doro na a oso fu Sakaria. Te a e waka go na inisei a e gi Elisabet odi. Na a momenti dati, Elisabet kon furu nanga santa yeye, dan a e taigi Maria: „Yu na a moro blesi uma di de. Blesi fu a pikin di de na ini yu bere! Fa a du kon dan taki mi kisi a grani disi, taki a mama fu mi Masra kon na mi? Bika di mi yere na odi fu yu, a pikin na ini mi bere dyompo fu prisiri.”​—Lukas 1:42-44.

Maria de nanga tangi fu a grani di a kisi. Dati meki a e taki: „Mi e prèise Yehovah. Mi ati e prisiri trutru nanga Gado, mi Frulusuman, bika a si taki en umasrafu abi sakafasi. Now ala ten sma o taki dati mi na wan koloku sma, bika a Maktiwan du bigi sani gi mi.” Aladi Maria kisi so wan bigi blesi, toku a e gi Gado ala grani. A e taki: „En nen santa. Someni langa kaba a ben abi sari-ati gi den sma di e lespeki en.”​—Lukas 1:46-50.

A santa yeye e meki Maria taki wan profeititori tu. A e prèise Gado nanga den wortu disi: „A du kefalek bigi sani nanga en anu èn ala den sma di abi heimemre na ini den ati, a panya go na ala sei. A puru den bigi tiriman na den kownusturu èn a opo den mofinawan hei. A gi bun sani na den sma di de nanga angri, so taki angri no e kiri den moro èn a seni den guduwan gowe nanga notinoti. A kon yepi en futuboi Israel. A sori taki a no frigiti fu sori sari-ati, soleki fa a pramisi den afo fu wi. Iya, fu têgo a o sori den sari-ati soleki fa a pramisi Abraham nanga den pikin fu en.”​—Lukas 1:51-55.

Maria e tan nanga Elisabet sowan dri mun langa. A no de fu taki dati a e yepi Elisabet na ini den lasti wiki di a de nanga bere. A moi taki den tu uma disi di lobi Yehovah èn di de nanga bere nanga yepi fu Gado, kan de nanga makandra na ini a pisi ten disi!

Wi si tu taki Yesus kisi grani fosi a gebore srefi. Elisabet kari en „mi Masra” èn a pikin na ini en bere „dyompo fu prisiri” di Maria doro. Ma soleki fa wi o si, dan bakaten sma no ben o gi grani na Maria nanga a pikin fu en di ben musu gebore ete.