A lasti Paskafesa di Yesus ben hori ben de wan prenspari wan. Fu di a ben o dede meki a ben seti sani fu nyan a Paska makandra nanga den apostel fu en. Na so a seti na Avondmaal fu Masra, di den disipel ben musu hori ibri yari. Dati meki a ben seni Petrus nanga Yohanes fu go sreka a kamra (Lu 22:7-13; luku a prenki na a kafti). A sani disi e memre wi fu sreka wisrefi gi na Avondmaal di o hori tapu 27 maart. A no de fu taki dati a gemeente seti sani kaba fu hori wan lezing, fu sorgu gi a brede nanga a win, noso tra sani. Ma san wisrefi kan du fu sreka gi a prenspari okasi disi?

Sreka yu ati. Leisi èn denki dipi fu a Bijbel leisipisi fu a Memrefesa. Yu kan feni a schema disi na ini a buku Ondrosuku den buku fu Bijbel ala dei. Yu kan feni wan schema tu na bakasei fu a Bijbel na: Moro sani, penti 23, A lasti pisi fu Yesus en wroko na ini Yerusalem (Yu kan luku a Wi Kresten libi nanga preikiwroko Studie-buku fu april 2020 tu). Yu kan gebroiki a buku Ondrosuku Bijbel moro fini na a Osofamiri Anbegi fu kon sabi moro fu a lusu-paiman.

Kari sma fu kon. Kari so furu sma leki yu man fu kon na a Memrefesa. Suma yu kan kari? Den gobaka fu yu, sma di ben e studeri Bijbel fosi, mati nanga famiri. Den owruman no musu frigiti fu kari den brada nanga sisa di no e preiki moro. Efu wan sma no e tan na ini a kontren fu yu, dan go na a website èn suku pe na Avondmaal o hori na ini a kontren dati. Go na jw.org na SUMA NA WI na a pisi „Memrefesa.”

San wi kan du moro fu sreka wisrefi?