Na ini september wi o du ala muiti fu aksi sma na ibri oso efu den wani studeri Bijbel nanga yepi fu a Koloku fu têgo!-brochure. Preikiman di o go na ini a yepipionier-wroko a mun dati kan wroko 30 yuru. Fa wi o du a spesrutu wroko disi?

• Na a fosi takimakandra: Gebroiki bakasei fu a brochure fu hari a sma prakseri èn sori en fa wi e studeri Bijbel nanga sma. No frigiti den wan di sori taki den wani sabi moro èn no frigiti den gobaka tu. Awinsi den no ben wani studeri ini a ten di pasa, kande a nyun fasi fa wi e studeri nanga a brochure kan hari den prakseri. Wi no musu libi den brochure na den oso pe wi no miti sma, noso seni den na ini wan brifi gi sma di no taki dati den wani sabi moro. Na ini a mun september a diniwroko komte fu a gemeente o sorgu taki unu man hori moro preikiwroko konmakandra.

• Tra okasi: Efu a gemeente fu yu e gebroiki a bukuwagi, dan sori den sma a Koloku fu têgo!-brochure. Fruteri den wan di wani kon sabi moro fu Bijbel taki den kan kisi wan fu a brochure disi èn wi kan studeri Bijbel nanga den sondro fu pai. Yu kan sori en syatu fa wi e hori Bijbelstudie, noso yu kan meki mofo nanga en fu sori en wan tra leisi. A dienst-opziener kan sorgu taki preikiman di abi ondrofeni kan go na den bisnispresi na ini un kontren fu bigin wan Bijbelstudie nanga sma. Yu kan bigin wan Bijbelstudie tu nanga den sma na wrokope noso nanga den sma di yu e miti te yu e du okasi preiki.

Yesus gi wi a komando fu „meki den tron disipel” èn fu „leri den” (Mt 28:19, 20). Meki a de so taki wi doro a marki di wi abi na prakseri nanga yepi fu a spesrutu preikiwroko disi, èn nanga a Koloku fu têgo!-brochure di wi o gebroiki.