Sma di de fu frutrow e arki den wan di e teki fesi, den e taki san tru èn den e hori densrefi na san den pramisi. Furu tron papa nanga mama, mati nanga wroko basi e frutrow den sma disi.

Te yu papa nanga mama man frutrow yu, den o gi yu na okasi fu de moro vrij.

„A moro bun fasi fu meki yu papa nanga mama frutrow yu, na te yu e sori taki yu man teki bun bosroiti èn taki yu man tyari frantwortu. Yu no e du disi soso te yu de makandra nanga den, ma sosrefi te den no de nanga yu.”​—Sarahi.

BIJBELTEKST: „Tan buweisi sortu sma unu de.”​—2 Korentesma 13:5.

Efu yu wani taki trawan frutrow yu moro noso efu yu wani taki den frutrow yu baka, dan den sani di e kon now kan yepi yu.

Taki san tru. Sma no o frutrow yu efu yu e lei. Ma sma o frutrow yu moro te yu e taki san tru​—awinsi yu meki fowtu.

„A makelek fu taki san tru te sani e go bun. Ma te yu e taki san tru awansi yu du wan sani di no bun, sma o frutrow yu.”​—Caiman.

BIJBELTEKST : „Wi wani du ala sani nanga wan krin ati.”​—Hebrewsma 13:18.

Tyari den frantwortu fu yu. Wan ondrosuku na ini Amerika e sori taki 78 procent fu den wrokope e taki dati „wan fu den dri prenspari sani di den e luku te den o teki wan sma na wroko, na efu a sma e tyari en frantwortu bun.” Efu yu e leri fu tyari frantwortu nownow dan yu o kisi wini te yu kon bigi.

„Mi papa nanga mama e si fa mi e du muiti fu tyari den frantwortu fu mi sondro taki den abi fu memre mi. O moro den e si dati o moro den e frutrow mi.”​—Sarah.

BIJBELTEKST: „Mi sabi taki yu o du san mi aksi yu. . . . èn mi sabi taki yu o du moro srefi leki san mi taki.”​—Fileimon 21.

Abi pasensi. Te wi skin e gro, dan tra sma man si dati. Ma furu tron a e teki ten fosi sma si taki wi e gro ini a fasi fa wi e denki.

„Wi no kan fruwakti fu trawan taki den o frutrow wi fu di wi tyari wi frantwortu wan leisi nomo. A e teki moro ten fu sma frutrow yu.”​—Brandon.

BIJBELTEKST: „Un musu abi . . . pasensi.”​—Kolosesma 3:​12.