Kownoekondre preikiman e froeteri

A feni wan marki ini libi

JESUS e taki dati a sabi den skapoe foe en (Johanes 10:14). Efoe wan sma abi wan boen ati èn a lobi vrede nanga regtfardikifasi, a sma dati sa hari kon na Jesus en bakaman. So wan sma sa feni wan marki ini libi, so leki ben pasa nanga wan oema na België. Disi na san a e froeteri:

„Di Jehovah Kotoigi ben naki na tapoe mi doro, a ben de wan ten di mi ben firi brokosaka srefisrefi èn mi ben prakseri foe kiri misrefi. Mi ben lobi san den Kotoigi ben taki foe a loesoe foe den problema foe a siki grontapoe disi, ma mi no ben lobi a prakseri taki Gado ben sa abi wan sani foe doe nanga dati. Aiti jari na fesi mi ben tapoe foe go na kerki, foe di mi no ben wani si a hoigrifasi di mi ben si drape, na ai. Ma na den Kotoigi mi ben si taki san den ben taki ben de opregti èn mi ben kon froestan taki, te joe loekoe en boen, a de wan moeilek sani foe libi sondro Gado.

Ma a ben de wan sari taki, baka wan toe fisiti, mi ben lasi a kontakti nanga den Kotoigi. Mi ben firi takroe. Mi ben smoko toe paki sigaret ini wán dei èn ben bigin srefi foe gebroiki drug. Foe di mi ben wani foe taki nanga mi granpapa di dede, mi ben go proeberi afkodrei. Fa mi ben frede, te mi ben de mi wawan na neti èn te mi ben ondrofeni fa den ogri jeje ben moeilek mi leki bakapisi foe dati! Disi ben go doro foeroe moen langa. Ala neti mi ben frede na a prakseri taki mi ben sa de mi wawan.

Ne, wan dei di mi ben go koiri pikinso, mi ben waka na wan heri tra presi leki di mi ben gwenti, èn mi ben doro na wan bigi bowprojekt. Mi ben froewondroe foe si wan bigi ipi sma drape. Di mi ben kon moro krosibei, mi ben si taki a ben de Jehovah Kotoigi di ben e bow wan Kownoekondrezaal. Mi ben memre den fisiti di den Kotoigi ben tjari na mi oso èn mi ben prakseri o moi a ben sa de, efoe heri grontapoe ben sa kan libi leki den sma disi.

Mi ben wani troetroe foe den Kotoigi kon baka na mi oso, so boen mi taki nanga wan toe foe den di ben wroko na a zaal. Mi begi Gado, èn tin dei na baka a man di ben kon fisiti mi a fositron, ben tanapoe na mi doro. A ben gi leki rai taki wi ben moesoe go doro nanga a bijbelstudie èn nanga prisiri mi doe dati. Wantewante a kari mi foe kon na den konmakandra na a Kownoekondrezaal. Mi doe dati. Noiti mi ben si so wan sani ete! So langa mi ben soekoe sma di lobi makandra èn di de kolokoe. Èn djaso den ben de te foe kaba!

Baka dati mi go na ala den konmakandra. Baka so wan dri wiki, mi tapoe nanga a takroe gwenti foe smoko. Mi trowe den boekoe foe mi di ben taki foe astrologie èn den plaat foe mi di ben abi pokoe na tapoe di abi foe doe nanga Satan, èn mi ben kan firi taki den ogri jeje ben lasi a makti di den ben abi na mi tapoe. Mi ben kon drai mi libi poti kon reti, akroederi den bijbel markitiki foe Jehovah, èn baka dri moen mi bigin preiki a boen njoensoe. Baka siksi moen mi ben teki dopoe. Toe dei baka a dopoe foe mi, mi bigin nanga a jepipionierdienst.

Mi e taki Jehovah tangi foe ala den boen sani di a ben doe gi mi. Te foe kaba a libi foe mi abi wan marki. Ija, a nen foe Jehovah na wan tranga toren pe mi ben feni froeloesoe nanga kibri na ini (Odo 18:10). Mi e firi troetroe neleki fa a psalm singiman ben firi di a ben skrifi Psalm 84:10: ’Wán dei ini joe tempelprasi moro betre leki doesoen dei na wan tra presi! Mi teki a bosroiti foe tanapoe na a dromofo ini na oso foe mi Gado na presi foe waka lontoe ini den tenti foe ogridoe.’”

A safri-ati oema disi ben feni wan marki ini libi. So a kan de toe nanga iniwan sma di e soekoe Jehovah nanga wan boen ati.